بيلل گەيتس بايلىعىن تۇگەلىمەن قايىرىمدىلىققا جۇمساماق

استانا. KAZINFORM - الداعى جيىرما جىل ىشىندە  Microsoft-تىڭ نەگىزىن قالاۋشى بيلل گەيتس ءوزىنىڭ بايلىعىنىڭ 99 پايىزىن قايىرىمدىلىققا جۇمساۋعا شەشىم قابىلداعانىن حابارلادى، دەپ جازدى BBC.

- مەن ولگەندە مەن تۋرالى سان ءتۇرلى پىكىرلەر ايتىلۋى مۇمكىن، ءبىراق مەنىڭ باستى ماقساتىم - «ول باي كۇيىندە كوز جۇمدى» دەپ ايتپاسا ەكەن، - دەپ جازدى بيلل گەيتس ءوزىنىڭ سايتىندا.

ول بۇل ويدى امەريكالىق ماگنات ءارى مەتسەنات ەندريۋ كارنەگيدىڭ: «باي كۇيىندە ولگەن ادام - ابىرويسىز ولگەن ادام» دەگەن سوزىمەن تولىقتىردى.

الايدا قازىرگى جاعدايعا قارايتىن بولساق، گەيتس بايلىعىنىڭ 99 پايىزىن تاراتسا دا، ميللياردەر كۇيىندە قالا بەرەدى. ول جاريالاعان مالىمەتكە سايكەس، ونىڭ قازىرگى بايلىعى شامامەن 108 ميلليارد دوللار.

بيلل مەن مەليندا گەيتس قورى ۇزاق جىلدار بويى دەنساۋلىق ساقتاۋ جانە باسقا دا سالالارعا قارجى قۇيىپ كەلەدى. ءبىراق قازىر Microsoft-تىڭ نەگىزىن قالاۋشى قور قاراجاتىن جۇمساۋ قارقىنىن ارتتىرۋعا شەشىم قابىلداعان. بۇعان دەيىن قور ولاردىڭ قايتىس بولعانىنان كەيىن دە ونداعان جىلدار جۇمىس ىستەيدى دەپ جوسپارلانعان بولاتىن. ەندى گەيتس قوردىڭ بارلىق قارجىسىن 2045 -جىلعا دەيىن تولىق جۇمساپ، كەيىن جابىلاتىنىن ايتتى.

بيىل كۇزدە بيلل گەيتس 70 جاسقا تولادى.

گەيتستىڭ ەسەبىنشە، كەلەسى جيىرما جىلدا قور شامامەن 200 ميلليارد دوللار جۇمسايدى - ناقتى سوما نارىقتاعى جاعداي مەن ينفلياتسياعا بايلانىستى بولماق. ال وتكەن 25 جىل ىشىندە گەيتس قورى الەمنىڭ ءارتۇرلى ەلدەرىندە دەنساۋلىق ساقتاۋ مەن دامۋ سالالارىنا 100 ميلليارد دوللار بولگەن.

الداعى كەزەڭدە قور ءۇش نەگىزگى ماقساتتى كوزدەيدى:

انا مەن بالالاردى ولتىرەتىن، ءبىراق الدىن الۋعا بولاتىن اۋرۋلارمەن كۇرەسۋ، مالايريا مەن قىزىلشا سياقتى جۇقپالى اۋرۋلاردى جويۋ، الەمنىڭ ءتۇرلى ەلدەرىندەگى جۇزدەگەن ميلليون ادامدى كەدەيلىكتەن قۇتقارۋ.

بۇل شەشىمنىڭ سەبەبى جايلى BBC ارناسىنا بەرگەن سۇحباتىندا گەيتس: «جيىرما جىلدان كەيىن باسقا باي ادامدار پايدا بولادى، جانە ولار ادامداردىڭ ماسەلەلەرىن شەشۋگە قالاي كومەكتەسۋگە بولاتىنىن جاقسىراق تۇسىنەدى»، - دەدى.

- مۇنداعى باستى سەبەپ - جەدەلدىك. ەگەر ماڭگى ءومىر ءسۇرۋدى جوسپارلاماساق، الدەقايدا كوپ قارجى جۇمساۋىمىز كەرەك. مەن بۇل شىعىنداردىڭ مەنىڭ قۇندىلىقتارىما ساي كەلەتىنىن بىلەمىن، - دەدى ول.

بيلل گەيتس پەن پول اللەن Microsoft كومپانياسىن 1975 -جىلى قۇرعان. بيىل بۇل كومپيۋتەر جانە اقپاراتتىق تەحنولوگيالار الىبىنا 50 جىل تولادى. گەيتس كومپانيانىڭ باس ديرەكتورى قىزمەتىنەن 2000 -جىلى، ال ديرەكتورلار كەڭەسىنىڭ ءتوراعاسى قىزمەتىنەن 2014 -جىلى كەتكەن. 2020 -جىلى ول كومپانيانىڭ ديرەكتورلار كەڭەسىنەن ءبىرجولا شىقتى.

BBC ارناسىنا بەرگەن سۇحباتىندا بۇرىنعى الەمدەگى ەڭ باي ادام يلون ماسكتى قاتتى سىنادى. گەيتستىڭ ايتۋىنشا، ماسكتىڭ ترامپ اكىمشىلىگىندەگى مەملەكەتتىك باسقارۋ تيىمدىلىگى دەپارتامەنتى دامۋشى ەلدەرگە كومەكتى قىسقارتۋ ارقىلى بالالاردىڭ ولىمىنە سەبەپكەر بولىپ وتىر.

- بۇل قىسقارتۋلار جاي عانا بالالاردى ولتىرمەيدى، ولار ميلليونداعان بالانىڭ ءومىرىن جالمايدى. الەمدەگى ەڭ باي ادامنان بۇلاي ىستەيدى دەپ كۇتپەگەن ەدىم، - دەدى گەيتس.

ايتا كەتەيىك، گەيتس قورى BBC Media Action — BBC- ءدىڭ قايىرىمدىلىق تارماعىنىڭ دەمەۋشىسى بولىپ تابىلادى. بۇل ۇيىم BBC- ءدىڭ جاڭالىق بولىمىنەن تاۋەلسىز جۇمىس ىستەيدى.

ەسكە سالا كەتەيىك، بيلل گەيتس حارريستىڭ سايلاۋ ناۋقانىنا 50 ميلليون دوللار بەرگەن ەدى.