شينحۋا مالىمەتىنشە، 28-شىلدە 24:00-گە دەيىن بەيجىڭنىڭ سولتۇستىك- شىعىسىنداعى تاۋلى ايماقتا ورنالاسقان ميۋن اۋدانىندا جاۋىن-شاشىن مولشەرى 543,4 ميلليمەترگە جەتىپ، 28 ادام قازا تاپتى. بەيجىڭ قالاسى بويىنشا ورتاشا جاۋىن-شاشىن مولشەرى 165,9 ميلليمەتردى قۇرادى. سولتۇستىك- باتىستاعى يانتسين اۋدانىندا ەكى ادام قايتىس بولدى.
زارداپ شەككەن ايماقتاردا 31 جول بولىگى قيراپ، 136 اۋىلدا ەلەكتر قۋاتى ءۇزىلدى، سونداي-اق قوعامدىق بايلانىس ينفراقۇرىلىمى دا ايتارلىقتاي زاقىمداندى. قازىرگى ۋاقىتتا بەيجىڭ قالاسى بويىنشا 80332 ادام قاۋىپسىز جەرگە كوشىرىلدى.
ايتا كەتەرلىگى، زارداپ شەككەن ايماقتار اكىمشىلىك جاعىنان بەيجىڭ قالاسىنا قاراعانىمەن، نەگىزىنەن اۋىلدىق جەرلەردى قامتيدى.
دۇيسەنبى كۇنى كەشكە، قازا بولعاندار سانى جاريالانار الدىندا رەسمي باق قىتاي باسشىسى شي جينپيڭنىڭ شەنەۋنىكتەرگە سۋ تاسقىنىنا قارسى شارالار مەن قۇتقارۋ جۇمىستارىن كۇشەيتۋدى تاپسىرعانىن حابارلادى.
ايتا كەتەيىك، ق ح ر سۋ شارۋاشىلىعى مينيسترلىگى جانىنداعى حايحى وزەنىنىڭ سۋ شارۋاشىلىعى ىستەرى كوميتەتى لۋانحى وزەنىندە دۇيسەنبى كۇنى بولعان تاسقىن ەلدىڭ نەگىزگى وزەندەرىنىڭ اراسىندا 2025 -جىلى «ءنومىر ءبىرىنشى سۋ تاسقىنى» ساناتىنا جاتقىزىلعانىن حابارلاعان بولاتىن.
اۆتور
مۇقتار مۇرات