بەيجىڭدە روبوتتار ەنەرگيا بلوگىن جەتكىزۋ ساپارىن باستادى
استانا. قازاقپارات - 15-شىلدەدە «بولاشاقتى ەنەرگيامەن جارىقتاندىرۋ» تاقىرىبىمەن وتەتىن الەمدىك گۋمانويدتى روبوتتار سپورتتىق جارىسىنىڭ اشىلۋ سالتاناتى بەيجىڭدە ۇيىمداستىرىلماق، دەپ حابارلايدى قىتايدىڭ CCTV تەلەارناسى.
وسىعان وراي باداليندە ورنالاسقان ۆانتسزين مادەني الاڭىندا «روبوتتاردىڭ ەنەرگيا بلوگىن جەتكىزۋ» اتتى ەرەكشە ءىس- شارا باستالدى.
بۇل ءىس- شارا قىتايدا جاسالعان 8 وزىق گۋمانويدتى روبوتتىڭ ۇلى قىتاي قورعانىنا شىعىپ، تەحنولوگيانىڭ مۇراگەرلىگىن بەينەلەيتىن «ەنەرگيا بلوگىن » جەتكىزۋىمەن ەرەكشەلەندى. جارىسقا ارنالعان «ەنەرگيا جەتكىزۋ» سەريالى ءىس- شارالارى 14 تامىزدا باستالاتىن سپورتتىق جارىستىڭ اشىلۋىنا دەيىن جالعاسادى.
ءىس-شارا روبوتتار توبىنىڭ «ەنەرگيا بلوگىن» الىپ، بەيجىڭنىڭ مادەني مۇرالارى مەن بەلگىلى نىساندارىن ارالاۋى تۇرىندە وتەدى. ەنەرگيا بلوگىن جەتكىزۋدىڭ سوڭعى نۇكتەسى جارىستىڭ نەگىزگى ارەناسى - وليمپيادالىق ۇلتتىق كونكي تەبۋ ستاديونى بولماق.
بارلىق ەنەرگيا بلوگى جينالعان سوڭ، ولار «اقىل- وي وزەگى» دەپ اتالاتىن ءبىرىڭعاي قۇرىلىمعا بىرىكتىرىلىپ، جارىستىڭ اشىلۋ سالتاناتىندا جارىقتاندىرىلادى. بۇل «اقىل-وي وزەگى» جارىس بارىسىندا ۇزدىكسىز جانىپ، جابىلۋ سالتاناتىنا دەيىن جالعاسادى.
وليمپيادالىق الاۋدى جەتكىزۋگە ۇقساس سيمۆولدىق ماعىنادان بولەك، «اقىل-وي وزەگى» بولاشاق جارىستاردا روبوتتاردىڭ دەرەكتەرى مەن ەستەلىكتەرىن ساقتاپ، گۋمانويدتى روبوتتاردىڭ ەۆوليۋتسيالىق تاريحىن بەينەلەيتىن ناقتى نىسانعا اينالادى.
2025 -جىلعى الەمدىك گۋمانويدتى روبوتتار رپورتتىق جارىسى بەيجىڭ قالاسىنىڭ ۇكىمەتى جانە ورتالىق راديو مەن تەلەديدار باس باسقارماسى سياقتى ۇيىمداردىڭ بىرلەسكەن قولداۋىمەن وتەدى. بۇل - گۋمانويدتى روبوتتار قاتىساتىن الەمدەگى العاشقى كەشەندى جارىس جانە 14-17-تامىز ارالىعىندا بەيجىڭدە ۇيىمداستىرىلادى. جارىس نەگىزگى جانە قوسىمشا باسەكەلەرگە ءبولىنىپ، جالپى 21 ءتۇرلى سايىستى قامتيدى.
جارىستى ۇيىمداستىرۋشىلاردىڭ مالىمدەۋىنشە، الەمدەگى العاشقى گۋمانويدتى روبوتتاردىڭ الەمدىك جارىسى - عالامدىق جەتەكشى تەحنولوگيالاردى، ينجەنەرلىك ونەردى جانە سپورتتىق رۋحتى بىرىكتىرەتىن ەڭ جوعارى دەڭگەيدەگى شارا.
قىتاي باسەكەلەستىك كورسەتىلىم الاڭىن قۇرۋ، جارىس سىناقتارى مەن شىنايى سەناريلەردە تەستىلەۋ ارقىلى گۋمانويدتى روبوتتار تەحنولوگياسىنىڭ جىلدام دامۋىن ىنتالاندىرۋدى جانە ولاردىڭ ادام ومىرىنە تەزىرەك ءارى ءتيىمدى ەنۋىن ماقسات ەتەدى.
بۇدان بۇرىن قىتاي اسكەري جاتتىعۋلارعا روبوتتاردى پايدالانىپ كورگەنىن جازعان ەدىك.
اۆتور
مۇقتار مۇرات