بەيجىڭدە قازاقستان مەن قىتاي اراسىنداعى ەكىجاقتى ساۋدا ماسەلەسى تالقىلاندى

بەيجىڭ. KAZINFORM - قازاقستاننىڭ قىتايداعى ەلشىسى شاحرات نۇرىشيەۆ ق ح ر كوممەرتسيا مينيسترلىگىنىڭ سىرتقى ساۋدانى دامىتۋ بيۋروسىنىڭ ديرەكتورى ليۋ ديانسيۋنمەن كەزدەسۋ وتكىزدى.

تاراپتار قازاقستان مەن قىتايدىڭ ساۋدا-ەكونوميكالىق سالاداعى ءوزارا ءىس-قيمىلىنىڭ وزەكتى ماسەلەلەرىن تالقىلادى، سونداي-اق ءوزارا ساۋدانى دامىتۋ سالاسىنداعى الماسۋلاردى تەرەڭدەتۋ جونىندەگى جوسپارلاردى بەلگىلەدى.

Фото: ҚР СІМ

«قىتايلىق تاراپ ق ح ر- دىڭ سىرتقى ساۋدانى ىنتالاندىرۋ جونىندەگى ساياساتىنىڭ اعىمداعى احۋالى مەن دامۋ پەرسپەكتيۆالارى تۋرالى، سونداي-اق ساۋدا-ەكونوميكالىق الماسۋلاردى تەرەڭدەتۋگە باعىتتالعان ءبىرقاتار كوپجاقتى ءىس-شارالاردى وتكىزۋ جوسپارلارى تۋرالى حابارلادى. ليۋ ديانسيۋن قىتايلىق تاراپتىڭ 2024 -جىلعى 23-25- تامىزدا استانادا وتەتىن قازاقستانداعى قىتاي تاۋارلارىنىڭ 19- كورمەسىنە دايىندىق بارىسى تۋرالى حابارلاپ، كورمە شەڭبەرىندە جوعارى ەكسپورتتىق الەۋەتى بار قازاقستاندىق ونىمدەر ءۇشىن كورمە ايماعىن ورنالاستىرۋ بويىنشا جۇرگىزىلىپ جاتقان جۇمىستار تۋرالى اتاپ ءوتتى. قىتايلىق تاراپتىڭ ق ر جانە ق ح ر اۋماقتارىندا بىرلەسكەن ءىس-شارالاردى بىرگە وتكىزۋگە دايىن ەكەندىگىن جەتكىزدى»، - دەلىنگەن حابارلامادا.

ءوز كەزەگىندە ش. نۇرىشيەۆ سۇحباتتاستى ق ح ر- مەن ساۋدانى ىلگەرىلەتۋ بويىنشا ق ر ۇكىمەتى قابىلداعان شارالارمەن تانىستىردى، سونداي-اق ساۋدا قىزمەتىن ىنتالاندىرۋ ءۇشىن بىرلەسكەن ءىس-شارالاردى وتكىزۋدى قۇپتادى. ول سوڭعى جىلدارى ق ر مەن ق ح ر اراسىنداعى ءوزارا ساۋدانىڭ سەرپىندى دامۋىن، ونىڭ ىشىندە 2023 -جىلعى قورىتىندىسى بويىنشا ءوزارا ساۋدانىڭ رەكوردتىق 41 ميلليارد دوللارعا جەتۋىن حابارلادى. قازاقستان ەلشىسى قىتايلىق تاراپتىڭ اعىمداعى ەكىجاقتى ساۋدانىڭ ءوسۋ قارقىنىن ساقتاۋ ءۇشىن قولايلى جاعدايلار جاساۋ قاجەتتىگىنە نازارىن اۋداردى، سونداي- اق ەكى ەلدىڭ بيزنەس-توپتارى اراسىندا بايلانىس ورناتۋعا جانە تاۋار اينالىمى كولەمىن ارتتىرۋدى ىنتالاندىرۋعا، ق ر مەن ق ح ر اراسىنداعى تاۋار پوزيتسيالارىنىڭ ساناتتارىن ۇلعايتۋعا باعىتتالعان بىرلەسكەن كورمەلەر مەن كونفەرەنسيالار وتكىزۋدىڭ ماڭىزدىلىعىن اتاپ ءوتتى.

كەزدەسۋ قورىتىندىسى بويىنشا ليۋ ديانسيۋن قازاقستاندىق تاراپتى 2024 -جىلعى 25 -قىركۇيەكتە حاڭجوۋ قالاسىندا وتەتىن «3- جاھاندىق سيفرلىق ساۋدا كورمەسىنە» قاتىسۋعا شاقىردى. ول اتالعان ءىس-شارا تاراپتاردىڭ ەلەكتروندىق ساۋدا سالاسىنداعى ىنتىماقتاستىعىن نىعايتۋعا مۇمكىندىك بەرەتىنىنە سەنىم ءبىلدىردى.

2003 ج. قۇرىلعان سىرتقى ساۋدانى دامىتۋ بيۋروسى ق ح ر كوممەرتسيا مينيسترلىگىنە تىكەلەي باعىنادى. بيۋرو ۇلتتىق سىرتقى ساۋدا جانە ەكونوميكالىق ساياساتتى ىسكە اسىرۋمەن، سىرتقى ساۋدانى دامىتۋعا بايلانىستى مەملەكەتتىك قىزمەتتەردى ۇسىنۋمەن، قىتايدا دا جانە شەتەلدە دە ءىرى ساۋدا- ەكونوميكالىق الماسۋلار مەن كورمەلەردى ۇيىمداستىرۋ ارقىلى شەتەلدىك كاسىپورىندارمەن ىنتىماقتاستىققا جاردەمدەسۋمەن، سونداي-اق بيزنەس-وقىتۋدى جانە يمپورت پەن ەكسپورتتى ىلگەرىلەتۋ جونىندەگى مامانداندىرىلعان جۇمىستى دامىتۋمەن اينالىسادى.

قازاقستانداعى قىتاي تاۋارلارىنىڭ 19- كورمەسى 2024 ج. 23-25-تامىز ارالىعىندا EXPO Center Astana-دا وتەدى. بيىل كورمە كولەمى 6 مىڭ شارشى مەتردى قۇرايدى.

اۆتور

باقىتگۇل اباي قىزى