بەيجىڭدە ش ى ۇ-عا مۇشە مەملەكەتتەر سىرتقى ىستەر مينيسترلىكتەرىنىڭ وكىلدەرى باس قوستى
استانا. KAZINFORM - شاڭحاي ىنتىماقتاستىق ۇيىمىنىڭ شتاب-پاتەرىندە ش ى ۇ-عا مۇشە مەملەكەتتەر سىرتقى ىستەر مينيسترلىكتەرىنىڭ اقپاراتتىق قىزمەتتەرىنىڭ جىل سايىنعى كونسۋلتاتسيالارى ءوتتى. بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتى حابارلادى.
ءىس-شاراعا قازاقستان رەسپۋبليكاسى سىرتقى ىستەر مينيسترلىگىنىڭ حالىقارالىق اقپارات كوميتەتىنىڭ ءتوراعاسى ايبەك سمادياروۆ قاتىستى.
كونسۋلتاتسيالار بارىسىندا ش ى ۇ حاتشىلىعى وتكەن جىلداعى اقپاراتتىق جۇمىستىڭ قورىتىندىلارىن ۇسىندى. قاتىسۋشىلار بىرلەسكەن جوبالاردى جۇزەگە اسىرۋ تاجىريبەسىمەن ءبولىسىپ، رەسمي ماتەريالداردى جاريالاۋدا اشىقتىق پەن جەدەلدىكتىڭ ماڭىزدىلىعىن اتاپ ءوتتى.
ا. سمادياروۆ «كونتەنت كەلىسىمدىلىگى مەن نەگىزگى حابارلامالاردىڭ سينحروندالۋى ۇيىم ىشىندەگى سەنىمدى نىعايتۋعا جانە حالىقارالىق ارەنادا ءبىرتۇتاس اقپاراتتىق مايدان قۇرۋعا مۇمكىندىك بەرەتىنىن» اتاپ ءوتتى. سونداي-اق ول قىتاي تاراپى مەن شىۇ حاتشىلىعىنا ءىس- شارانى جوعارى دەڭگەيدە ۇيىمداستىرعانى جانە اقپاراتتىق ىنتىماقتاستىقتى نىعايتۋعا باعىتتالعان كونسترۋكتيۆتى الاڭ ۇسىنعانى ءۇشىن العىس ءبىلدىردى.
قىتاي تاراپى ش ى ۇ اياسىنداعى قازىرگى ءتوراعالىعى شەڭبەرىندەگى مەدياجوبالار شولۋىن ۇسىنىپ، تيانجين قالاسىندا وتەتىن ۇيىمعا مۇشە مەملەكەتتەر باسشىلارى ءسامميتىن اقپاراتتىق سۇيەمەلدەۋ جوسپارىن تانىستىردى. تالقىلاۋعا قاتىسقان شىۇ-عا مۇشە مەملەكەتتەردىڭ سىرتقى ىستەر مينيسترلىكتەرىنىڭ بەيىندى قۇرىلىمدارىنىڭ باسشىلارى مۋلتيمەديالىق ترانسلياتسيانىڭ جاڭا فورماتتارىن ەنگىزۋ جانە ۇيىمنىڭ تسيفرلىق پلاتفورمالارداعى جۇمىسىن كۇشەيتۋ جونىندە ۇسىنىستار ايتتى.
قازاق ديپلوماتى شىۇ- نىڭ اقپاراتتىق كۇن تارتىبىنە جاس جۋرناليستەر مەن بلوگەرلەردى بەلسەندى تارتۋدىڭ ماڭىزدىلىعىنا نازار اۋدارىپ، بۇل اۋديتوريانى كەڭەيتۋگە جانە ۇيىم قىزمەتىنە جاستاردىڭ تۇراقتى قىزىعۋشىلىعىن قالىپتاستىرۋعا سەپتىگىن تيگىزەتىنىن جەتكىزدى.
سونىمەن قاتار اقپاراتتىق ءوزارا ءىس- قيمىلدىڭ نەگىزگى باعىتتارى بويىنشا پىكىر الماسۋ ءوتتى. ەرەكشە نازار «شانحاي رۋحى» قاعيداتتارىن بىرلەسىپ قولداۋعا، سونداي- اق ءوڭىر ەلدەرىندەگى جالعان اقپاراتپەن كۇرەسكە اۋدارىلدى.
كەزدەسۋ سوڭىندا قاتىسۋشىلار كونسۋلتاتسيالار حاتتاماسىنا قول قويىپ، مۇنداي فورماتتاعى كەزدەسۋلەردىڭ سىرتقى ساياسي ماڭىزدى وقيعالاردى جاريالاۋعا ارنالعان كەلىسىلگەن تاسىلدەردى ازىرلەۋ مەن ۇيىمنىڭ ءبىرىڭعاي اقپاراتتىق كەڭىستىگىن ودان ارى نىعايتۋدىڭ ماڭىزدىلىعىن تالقىلادى.