بەيجىڭ ترانسكاسپي حالىقارالىق تەمىرجولىن دامىتۋعا مۇددەلى
استانا. KAZINFORM - قىتاي حالىق رەسپۋبليكاسىنىڭ ءتوراعاسى شي جينپيڭ الداعى مەملەكەتتىك ساپار الدىندا قازاقستاننىڭ بۇقارالىق اقپارات قۇرالدارىنا ارناپ جازعان اۆتورلىق ماقالاسىندا بەيجىڭنىڭ ترانسكاسپي حالىقارالىق تەمىرجولىن دامىتۋعا مۇددەلى ەكەنىن جەتكىزدى.
«ساۋدا-ەكونوميكا، ونەركاسىپ، ينۆەستيتسيا، ەنەرگەتيكا، تاۋ-كەن ونەركاسىبى جانە اۋىل شارۋاشىلىعى سياقتى ءداستۇرلى سالالارداعى ىنتىماقتاستىقتى ۇلعايتۋ، شەكارالىق وتكەلدەردىڭ وتكىزۋ قابىلەتىن ارتتىرۋ، قىتاي- ەۋروپا جۇك پويىزدارىنا قىزمەت كورسەتۋدى جاقسارتۋ جانە كولىك قاتىناسىنىڭ كەڭ ءارى جوعارى ءتيىمدى جەلىسىن جاقسارتۋ ءۇشىن ترانسكاسپي حالىقارالىق تەمىرجولىنىڭ قۇرىلىسىن دامىتۋ قاجەت»، - دەپ جازدى شي جينپيڭ.
ماقالادا قىتايدىڭ قازاقستاندا جۇمىس ىستەپ تۇرعان مادەني-گۋمانيتارلىق نىساندارىنىڭ ءرولىن ايقىنداۋ قاجەتتىگى ايتىلعان.
«حالىقتارىمىز تامىرى تەرەڭگە تارتاتىن دوستىققا مۇددەلى. ونى ساقتاپ دامىتۋ ءۇشىن ەكى حالىقتىڭ جاقىندىعىن ارتتىرۋعا باعىتتالعان مازمۇندى مادەني-گۋمانيتارلىق بايلانىس قاجەت. لۋ بان شەبەرحاناسىنىڭ، كونفۋتسي ينستيتۋتتارىنىڭ، قازاقستانداعى قىتاي سولتۇستىك- باتىس پوليتەحنيكالىق ۋنيۆەرسيتەتى فيليالىنىڭ ءرولىن ايقىنداپ، ەكى ەل اراسىنداعى دوستىقتى لايىقتى جالعاستىرۋشىلاردى تاربيەلەگەن ءجون»، - دەدى قىتاي باسشىسى.
شي جينپيڭ ماقالاسىندا وسى مەملەكەتتىك ساپارىنىڭ ءمانىن ءتۇسىندىرىپ، بەيجىڭنىڭ استاناعا قاتىستى ساياساتىنىڭ نەگىزگى ۇستىندارىن اتادى. سونداي-اق وندا قىتايلىقتاردىڭ داستارحانىندا قازاقستاندىق ءونىم كوبەيە تۇسكەنى ايتىلعان. ق ح ر ءتوراعاسى اۆتورلىق ماقالاسىندا قىتاي مەن قازاقستاننىڭ مادەني بايلانىسىنا ەڭبەك ەتىپ جۇرگەن قازاقتاردى اتاپ ءوتىپ، ەكى ەل اراسىنداعى ۆيزاسىز رەجيمنىڭ ارتىقشىلىعىنا توقتالادى.
بۇعان دەيىن حابارلانعانىنداي، 2-4-شىلدە كۇندەرى پرەزيدەنت قاسىم- جومارت توقايەۆتىڭ شاقىرۋىمەن قىتاي حالىق رەسپۋبليكاسىنىڭ ءتوراعاسى شي جينپيڭ قازاقستانعا مەملەكەتتىك ساپارمەن كەلەدى. ول سونداي-اق، شاڭحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 24-وتىرىسىنا قاتىسادى.
اۆتور
ەسىمجان ناقتىباي