جيىندا قازاقستاننىڭ قىتايداعى ەلشىسى شاحرات نۇرىشەۆ ءسوز سويلەپ، قىتايلىق ساراپشىلارعا ستراتەگيالىق قۇجاتتىڭ نەگىزگى باعىتتارىن جان-جاقتى تانىستىردى. ول الەۋمەتتىك-ەكونوميكالىق دامۋدىڭ باسىم باعىتتارىنا، سيفرلىق ترانسفورماتسياعا، جاساندى ينتەللەكتىنى ەنگىزۋگە، ينفراقۇرىلىمدى جاڭعىرتۋعا جانە ەلدىڭ ينۆەستيتسيالىق الەۋەتىن ودان ءارى نىعايتۋعا ەرەكشە توقتالدى.
سونداي- اق ول وڭىرلىك تۇراقتىلىقتى نىعايتۋ، كوپجاقتى ىنتىماقتاستىقتى كەڭەيتۋ جانە ورنىقتى دامۋ قاعيداتتارىن ىلگەرىلەتۋ جونىندەگى قازاقستاننىڭ حالىقارالىق باستامالارىن، ەكى ەل اراسىنداعى ىنتىماقتاستىقتى ودان ءارى دامىتۋ مۇمكىندىكتەرىن اتاپ ءوتتى.
دوڭگەلەك ۇستەل بارىسىندا قىتاي قوعامدىق عىلىمدار اكادەمياسىنىڭ، ق ح ر مەملەكەتتىك كەڭەسى جانىنداعى دامۋ ماسەلەلەرىن زەرتتەۋ ورتالىعىنىڭ، قازىرگى زامانعى حالىقارالىق قاتىناستار اكادەمياسىنىڭ، شىعىس قىتاي پەداگوگيكالىق ۋنيۆەرسيتەتىنىڭ، سولتۇستىك- باتىس ۋنيۆەرسيتەتىنىڭ جانە لانجوۋ ۋنيۆەرسيتەتىنىڭ وكىلدەرى ءوز باياندامالارىن ۇسىندى.
قىتايدىڭ قازىرگى زامانعى حالىقارالىق قاتىناستار اكادەمياسى اكادەميالىق كوميتەتى حاتشىسىنىڭ ورىنباسارى دين سياوسين بيىلعى جولداۋدا جاريالانعان «حالىقتىق قۇرىلىس» ۇرانى قازاقستان ەكونوميكاسىن دامىتۋدىڭ جاڭا كەزەڭىنە باعىت سىلتەگەنىن ايتتى.
- پرەزيدەنت قاسىم-جومارت توقايەۆ ۇسىنعان «حالىقتىق قۇرىلىس» تۇجىرىمداماسى ينفراقۇرىلىمدى اۋقىمدى دامىتۋعا، وسى ۋاقىتقا دەيىن قالىپتاسقان الەۋەتتى ءتيىمدى پايدالانۋعا جانە قازاقستاننىڭ دامۋىنىڭ كەلەسى كەزەڭىنە بەرىك نەگىز قالاۋعا باعىتتالعان، - دەدى ول.
ونىڭ سوزىنشە، قىتاي كاسىپورىندارى قازاقستانداعى ينفراقۇرىلىم نىساندارىن سالۋعا، سونىڭ ىشىندە تەمىرجولدار مەن اۆتوموبيل جولدارىن، اۋەجايلار مەن اۋرۋحانالاردى تۇرعىزۋعا اتسالىسا الادى. اتوم، جىلۋ، جەل جانە كۇن ەلەكتر ستانتسيالارى سالاسىندا ەكى ەل اراسىندا ىنتىماقتاستىق تاجىريبەسى قالىپتاسقان. بۇل باعىتتاعى جاڭا جوبالار دا قولعا الىنعان.
- قورىتا ايتقاندا، «حالىقتىق قۇرىلىس» جوبالارى قازاقستان ەكونوميكاسىنىڭ دامۋىنا ىقپال ەتىپ، قازاقستان مەن قىتاي اراسىنداعى ىنتىماقتاستىقتى جاڭا دەڭگەيگە كوتەرەدى، - دەپ تۇيىندەدى ول.
قىتاي قوعامدىق عىلىمدار اكادەمياسىنىڭ رەسەي، شىعىس ەۋروپا جانە ورتالىق ازيا ينستيتۋتىنىڭ ساراپشىسى سياو بين قازاقستاننىڭ كولىك-لوگيستيكالىق الەۋەتىنە ەرەكشە نازار اۋداردى.
- پرەزيدەنت قازاقستان حالقىنا جولداۋىندا لوگيستيكالىق ينفراقۇرىلىمدى دامىتۋعا ەرەكشە ءمان بەردى. وسى تۇرعىدان العاندا، «ورتا ءدالىزدىڭ» كەلەشەگى زور. ويتكەنى سولتۇستىك باعىتتاعى جۇك تاسىمالىنىڭ كولەمى ارتىپ كەلەدى، ال وڭتۇستىك باعىت ءالى دە جوبالاۋ كەزەڭىندە، - دەدى ول.
ساراپشىنىڭ پىكىرىنشە، قازاقستان ارقىلى وتەتىن قۇرلىق باعىتىنىڭ تاعى ءبىر ارتىقشىلىعى - كليماتتىڭ وزگەرۋىنە بايلانىستى تەڭىز تاسىمالىندا جيىلەگەن كەدەرگىلەرگە تاۋەلدى بولماۋى.
دوڭگەلەك ۇستەلدىڭ قورىتىندى بولىمىندە قاتىسۋشىلار قازاقستانداعى رەفورمالاردى ەسكەرە وتىرىپ، ەكىجاقتى ىنتىماقتاستىقتى دامىتۋدىڭ جاڭا مۇمكىندىكتەرىن تالقىلادى. سونداي-اق ەكى ەل اراسىنداعى عىلىمي جانە ساراپشىلىق بايلانىستاردى ودان ءارى نىعايتۋدىڭ ماڭىزىن اتاپ ءوتتى.
بۇعان دەيىن پرەزيدەنت جولداۋى قازاقستاننىڭ جاڭا دامۋ مودەلىن ايقىندايتىنى تۋرالى شاڭحاي قوعامدىق عىلىمدار اكادەمياسى ش ى ۇ زەرتتەۋ ورتالىعىنىڭ ديرەكتورى لي ليفاننىڭ پىكىرىن جاريالاعان ەدىك.