بيۋجەتتەن سپورت تۇرلەرىنە قانشا قاراجات بولىنەدى

استانا. KAZINFORM - تۋريزم جانە سپورت ۆيتسە-ءمينيسترى سەرىك جاراسبايەۆ ەلىمىزدە سپورت تۇرلەرىن دامىتۋ ءۇشىن قانشا قاراجات جۇمسالاتىنىن ءمالىم ەتتى.

«سپورت سالاسىنا جالپى وبلىستىق، جەرگىلىكتى جانە رەسپۋبليكالىق بيۋجەتتەردى قوسا العاندا شامامەن 290 ميلليارد تەڭگە بولىنەدى»، - دەدى ۆيتسە-مينيستر ءماجىلىستىڭ الەۋمەتتىك-مادەني دامۋ كوميتەتى وتىرىسىنان كەيىن.

ونىڭ اتاپ وتۋىنشە، بيىل قارجىلاندىرۋ سوماسى بۇعان دەيىن بەلگىلەنگەن دەڭگەيدە قالادى. ءبىراق مەملەكەت تاراپىنان قارجىلاندىرىلاتىن سپورت تۇرلەرىنىڭ سانى قىسقارتىلادى.

«ءبىز قاراجاتتى شاشىپ جىبەرمەۋ ماقساتىندا ونى شوعىرلاندىرىپ، باسىمدىققا يە سپورت تۇرلەرىنە جۇمساعىمىز كەلەدى. بۇل وليمپيادالىق سپورت تۇرىمەن اينالىساتىندار سانىن ارتتىرادى، وليمپيادالىق سپورت تۇرلەرى ىشىندەگى باسەكەلەستىكتى جانداندىرادى. بۇگىندە وليمپيادالىق سپورت تۇرلەرىنەن كەتىپ جاتقانداردى دا كورىپ وتىرمىز. جالپى، بولىنگەن قارجىنىڭ جالپى سوماسى قالادى. ول وليمپيادالىق سپورت تۇرلەرى اراسىندا بولىنەدى»، - دەدى سەرىك جاراسبايەۆ.

ايتا كەتەيىك، ءماجىلىستىڭ الەۋمەتتىك-مادەني دامۋ كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ، سونداي-اق نورمالاردى شەكتەن تىس (شەكتەن تىس) زاڭنامالىق رەتتەۋدى الىپ تاستاۋ تۋرالى» زاڭ جوباسى تالقىلاندى.