بيۋجەت كىرىسىنىڭ تومەندەۋى جىلدار بويى جالعاسىپ كەلەدى - ءماجىلىس ءتوراعاسى

استانا. KAZINFORM - ءماجىلىس سپيكەرى ەرلان قوشانوۆ رەسپۋبليكالىق بيۋجەتتىڭ كىرىس بولىگىن قالىپتاستىرۋدا قيىندىقتار بارىن ايتىپ، ۇكىمەتكە ءبىرقاتار مىندەت جۇكتەدى.

«دەپۋتاتتار بيۋجەت جوباسىمەن جۇمىس بارىسىندا ءبىرقاتار جۇيەلىك كەمشىلىكتى انىقتادى. ول تۋرالى بۇگىن ايتىلدى. ەڭ الدىمەن، بيۋجەتتىڭ كىرىس بولىگىن قالىپتاستىرۋعا قاتىستى. قيىندىقتار بار ەكەنى انىق. اتاپ ايتقاندا، ەكسپورتتىق تاۋارلاردىڭ باعاسى تۇراقسىزدانىپ، الەمدىك نارىقتىڭ وزگەرۋىنە تاۋەلدى بولىپ وتىر. وسىعان بايلانىستى بيۋجەت كىرىستەرىنىڭ تومەندەۋى بىرنەشە جىلدان بەرى جالعاسىپ كەلەدى»، - دەدى ەرلان قوشانوۆ ءماجىلىستىڭ جالپى وتىرىسىندا 2025-2027-جىلدارعا ارنالعان رەسپۋبليكالىق بيۋجەتتى تالقىلاۋدى قورىتىندىلاي وتىرىپ.

سونداي-اق، ءماجىلىس مەملەكەت باسشىسىنىڭ قوسىمشا كىرىس كوزدەرىن تابۋ قاجەتتىگى تۋرالى تاپسىرماسىن ەسكە سالدى.

ونىڭ ايتۋىنشا، ۇكىمەت تاراپىنان كىرىستەردى قالپىنا كەلتىرۋ جانە بيۋجەتتى ۇزاق مەرزىمدى تۇراقتاندىرۋ بويىنشا پارمەندى ارەكەتتەر جوق.

«بۇل دەپۋتاتتار اراسىندا ۇلكەن الاڭداۋشىلىق تۋعىزىپ وتىر، بۇگىن ۇكىمەت باسشىسى مەن مۇشەلەرىنە ءبىراز سۇراق قويىلدى. حالىق تابىسىن ارتتىرۋعا جانە ەكونوميكانى وسىرۋگە دەگەن ۇكىمەتتىڭ تالپىنىسى ءوز جەمىسىن بەرەدى دەپ ۇمىتتەنەمىز. وڭدەۋشى ونەركاسىپتىڭ ۇدەمەلى ءوسۋى جونىندەگى بولجامدا جالاڭ سيفرلاردى قۋالاي بەرمەي، جاڭا ەكونوميكالىق ساياساتتى بەلسەندى ىسكە اسىرۋ قاجەت، ياعني ناقتى ناتيجە كەرەك. جاڭادان وندىرىستەر اشۋ جانە ولاردى دامىتۋ ۇكىمەت جۇمىسىنىڭ نەگىزگى باسىمدىعى بولۋعا ءتيىس. سوندا عانا ءبىز ەل بيۋجەتى كىرىستەرىنىڭ ايقىن ءوسىمىن كورەمىز»، - دەيدى ول.

ايتا كەتەيىك، بۇگىن ءماجىلىستىڭ جالپى وتىرىسىندا «2025-2027-جىلدارعا ارنالعان رەسپۋبليكالىق بيۋجەت تۋرالى» زاڭى قابىلداندى.