بيشىمبايەۆتىڭ ادۆوكاتى ەكس-مينيستر كولونيادا قانداي ءتارتىپ بۇزعانىن ايتتى

استانا. KAZINFORM - قۋاندىق بيشىمبايەۆتىڭ ادۆوكاتى ەرلان عازىمجانوۆ ەكس-مينيستر كولونيادا قانداي جۇمىستارمەن اينالىسقانىن، ول نەگە سوتقا تالاپ ارىز بەرگەنىن ءتۇسىندىردى.

بۇگىن قىلمىستىق-اتقارۋ جۇيەسى كوميتەتى قۋاندىق بيشىمبايەۆ سوتقا تالاپ ارىز جولداعانىن حابارلادى. بۇعان مەكەمە اكىمشىلىگىنىڭ وعان جەڭىلدىك بەرمەۋى سەبەپ بولعان. ق ا ج ك وكىلدەرى بيشىمبايەۆ ءبىر رەت ءتارتىپ بۇزعاندىقتان، جەڭىلدىك بەرىلمەگەنىن مالىمدەدى.

ەرلان عازىمجانوۆ Tengrinews.kz-كە بەرگەن سۇحباتىندا قىلمىستىق-اتقارۋ جۇيەسىنىڭ ەرەجەلەرىنە سايكەس سوتتالۋشى كەلگەن ساتتەن باستاپ ءۇش اي ىشىندە باقىلاۋدا بولۋى قاجەت ەكەنىن ايتقان. وسى كەزەڭدە سوتتالعان ادامعا جەڭىلدىك بەرىلمەيدى. قۋاندىق بيشىمبايەۆ 18-شىلدەدە ستەپنوگورسك كولونياسىنا تۇسكەن. 18-قازاندا ونى باقىلاۋ مەرزىمى اياقتالعان، ءبىراق ەشقانداي جەڭىلدىك جاسالماعان.

«ءۇش ايدان كەيىن ولار (تۇزەتۋ مەكەمەسىنىڭ اكىمشىلىگى - ەسك.) سوتتالۋشىنىڭ مىنەز-قۇلقىنا باعا بەرۋى جانە ءتيىستى تۇردە كوتەرمەلەۋى قاجەت. تاربيەلىك سيپاتتاعى ەكى ءىس-شارا بولعان. ءبىرىنشىسى كونستيتۋتسيا كۇنىنە، ەكىنشىسى راحىمجان قوشقاربايەۆتىڭ 100 جىلدىعىنا ارنالعان. قۋاندىق ەكى ءىس-شاراعا دا بەلسەندى قاتىسقان. كونستيتۋتسيا كۇنىندە ول شاحمات ويناپ، جارىستا ءبىرىنشى ورىن العان. قوشقاربايەۆتىڭ ءجۇز جىلدىعىندا سوتتالعاندارعا باتىردىڭ ءومىرى، ونىڭ كىم ەكەنى تۋرالى بايانداعان. تيىسىنشە ول ءوزىن جاقسى ۇستاعان»، - دەدى ەرلان عازىمجانوۆ.

عازىمجانوۆتىڭ پىكىرىنشە، ونىڭ قورعاۋىنداعى ادامعا ءبىرجاقتى كوزقاراس بار.

«ادۆوكاتتىق ساۋال جىبەرىپ، قانداي سەبەپپەن بيشىمبايەۆقا جەڭىلدىك بەرىلمەگەنىن انىقتاماق بولدىم. مەكەمە بيشىمبايەۆ از زەرتتەلگەنىن ايتتى. ولار راحىمجان قوشقاربايەۆقا قاتىستى ءىس-شارادا بيشىمبايەۆ سوتتالعانداردىڭ الدىندا ءسوز سويلەمەگەنىن، بۇل وتىرىك ەكەنىن مالىمدەدى. ستەپنوگورسك قالاسىندا وتكەن سوت وتىرىسىندا جاساق باستىقتارىنىڭ ءبىرى ونىڭ ءسوز سويلەگەنىن راستادى»، - دەدى ادۆوكات.

ادۆوكاتتىڭ ايتۋىنشا، كولونياعا بيشىمبايەۆتان كەيىن كەلگەندەر كوتەرمەلەۋگە يە بولعان. سوندىقتان 18-قازاننان باستاپ سوتتالعان ەكس-مينيستر تاراپىنان شاعىم باستالعان. ال جەلتوقساندا ءتارتىپ بۇزۋشىلىق تىركەلىپتى.

«7-جەلتوقساندا ولار رەسمي ءتارتىپ بۇزۋشىلىق تىركەپتى. بيشىمبايەۆ تۇندە تۇرىپ، ءتىسى اۋىرعاندىقتان ءدارى ىشكەن بولۋى كەرەك. ول ءدارىنى سۋمەن ءىشۋ ءۇشىن اسحاناعا بارۋى قاجەت بولعان. ول ءدارى-دارمەك اسەر ەتكەنىن كۇتىپ، كىتاپ وقىعان. وسىعان بايلانىستى ولار بيشىمبايەۆپەن پروفيلاكتيكالىق اڭگىمە جۇرگىزگەن. قۋاندىق سوتتالعاندار جازاسىن وتەپ جاتقان مەكەمەدە تۇندە بارلىعى ەركىن ءجۇرىپ تۇراتىنىن ايتادى: بىرەۋى دارەتحاناعا بارادى، بىرەۋى سۋ ىشەدى، بىرەۋى مۇلدەم ۇيىقتامايدى. مەكەمە باسقا سوتتالعاندارعا ەشقانداي شارا قولدانبايدى، ءبىراق شاعىمدار باستالعاننان كەيىن ولار مۇنى ءتارتىپ بۇزۋشىلىق دەپ ساناپ، پروفيلاكتيكالىق اڭگىمە جۇرگىزگەن»، - دەدى ەكس-ءمينيستردىڭ قورعاۋشىسى.

3-اقپاندا ستەپنوگورسك قالالىق سوتىندا قۋاندىق بيشىمبايەۆتىڭ تالابى بويىنشا وتىرىس وتكەن. شاعىمدانۋشى تاراپ مۇنداي قارىم-قاتىناسقا شاعىمدانۋعا، نەگە ءۇش اي وتكەننەن كەيىن سوتتالۋشىعا كوتەرمەلەۋ قولدانىلماعانىن بىلۋگە تىرىسقان. الايدا سوت مەكەمەنى قولداعان. مۇنداي شەشىمگە بيشىمبايەۆ پەن ونىڭ قورعاۋشىسى تاعى شاعىمدانۋعا نيەتتى، ءبىراق ولار ءالى اپەللياتسياعا بەرگەن جوق.

«ءبىزدىڭ باستى شاعىمىمىز - وعان باسقالارعا قاراعانىنداي قاراماۋلارى»، - دەيدى ادۆوكات.

ادۆوكاتتىڭ ايتۋىنشا، بيشىمبايەۆ قارت اتا-اناسىن ءجيى كورگىسى كەلەدى. زاڭ بويىنشا قاۋىپسىزدىگى جوعارى كولونيادا ءبىر جىل ىشىندە ءتورت قىسقا مەرزىمدى (2 ساعاتتان) جانە ءبىر ۇزاق (2 كۇن) كەزدەسۋگە رۇقسات. ال ادۆوكات سوتتالعان ادامعا كەز كەلگەن ۋاقىتتا كەلە الادى.

ەسكە سالايىق، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ايەلى سالتانات نۇكەنوۆانىڭ ولىمىنە قاتىستى ءىس بويىنشا 24 جىلعا سوتتالدى.