بيشىمبايەۆ مەرزىمىنەن بۇرىن بوستاندىققا شىعىپ كەتۋى مۇمكىن - ادۆوكات

استانا. KAZINFORM - ايەلىن ءولتىردى دەگەن كۇدىككە ىلىنگەن ەكس-مينيستر قۋاندىق بيشىمبايەۆتان مورالدىق وتەماقى الىنباسا ول مەرزىمىنەن بۇرىن بوستاندىققا شىعىپ كەتۋى مۇمكىن.

بۇل تۋرالى مارقۇم سالتانات نۇكەنوۆانىڭ وتباسىنىڭ ادۆوكاتى جاننا ورازباحوۆا حابارلادى.

«ماسەلە اقشادا ەمەس. باستىسى - قىلمىسكەردى مەرزىمىنەن بۇرىن شىعىپ كەتۋ مۇمكىندىگىنەن ايىرۋ. وتەماقى سوماسى كوپ بولعان سايىن ونىڭ بوستاندىققا شىعىپ كەتۋ مۇمكىندىگى دە از بولادى»، - دەيدى ادۆوكات.

استانا سوتى قۋاندىق بيشىمبايەۆقا قاتىستى تۇسكەن ءىستى قاراۋعا كىرىسكەن. وسىلايشا، سالتاناتتىڭ اعاسى ايتىم امانگەلدى ەكس-مينيستردەن وتەماقى ءوندىرىپ الماق.

ايتا كەتەيىك، 27-تامىزدا ايتبەك امانگەلدى قۋاندىق بيشىمبايەۆتان مورالدىق وتەماقى تالاپ ەتكەنى بەلگىلى بولدى. بۇل تۋرالى سوت كابينەتىندەگى قۇجاتتا بەلگىلى بولدى. ءىس 2024-جىلدىڭ 2-تامىزىندا باستالعان. ءىستى سۋديا دوسجان جۇمابايەۆ قارايدى.

ەسكە سالايىق، 13-مامىردا قۋاندىق بيشىمبايەۆقا قاتىستى سوت ءىسى اياقتالعان بولاتىن. سوت ۇلتتىق ەكونوميكانىڭ ەكس-ءمينيسترى قۋاندىق بيشىمبايەۆتى جۇبايىن ازاپتاعانى جانە ولتىرگەنى ءۇشىن كىنالى دەپ تاپتى. ول 24 جىلعا باس بوستاندىعىنان ايىرىلدى.

ونىڭ اعاسى باقىتجان بايجانوۆ قىلمىستى جاسىرعانى ءۇشىن كىنالى دەپ تانىلىپ، 4 جىلعا باس بوستاندىعىنان ايىرىلدى.

26-ماۋسىمدا سوت القاسى بيشىمبايەۆ پەن بايجانوۆتىڭ اپەللياتسيالىق شاعىمى بويىنشا شەشىم قابىلداپ، ولاردىڭ ۇكىمدەرىن وزگەرىسسىز قالدىردى.

ال 6-تامىزدا قۋاندىق بيشىمبايەۆ ۇكىمدى جەڭىلدەتۋ ءۇشىن كۇرەسىن جالعاستىرىپ جاتقانى بەلگىلى بولدى. بۇل تۋرالى اقپارات سوت كابينەتىندە بار.