بيشىمبايەۆ ءىسىن جۇرگىزگەن سۋديانى قورقىتقاندارعا ءىس قوزعالدى

استانا. KAZINFORM - جوعارعى سوت بيشىمبايەۆ پەن بايجانوۆتىڭ ءىسىن جۇرگىزگەن سۋديا ايجان قۇلبايەۆاعا بەلگىسىز نومىردەن قوڭىراۋلار مەن قورقىتۋ حابارلامالارى تۇسكەنىن مالىمدەدى.

استانا قالاسىنىڭ پوليتسيا دەپارتامەنتى سۋديا ا. قۇلبايەۆاعا قاتىستى قورقىتۋ فاكتىسى بويىنشا قىلمىستىق ءىس قوزعادى.

قىلمىستىق كودەكستىڭ 407-بابىنىڭ 1-بولىگى (سوت تورەلىگىن جۇزەگە اسىرۋعا كەدەرگى جاساۋ ماقساتىندا سوتتىڭ قىزمەتىنە ارالاسۋ) بويىنشا سوتقا دەيىنگى تەرگەۋ باستالدى.

قازىرگى ۋاقىتتا سۋديا جەكە قاۋىپسىزدىك شارالارىمەن قامتاماسىز ەتىلدى.

سونىمەن قاتار، ينتەرنەت كەڭىستىگىندە جۇرگىزىلگەن مونيتورينگ بارىسىندا سۋدياعا قاتىستى قىلمىس ارەكەتتەرى بار كوپتەگەن جاعىمسىز جاريالانىمدار انىقتالدى.

تەكسەرۋ ناتيجەسى بويىنشا تەرگەۋ ورگانى قىلمىستىق كودەكستىڭ 411-بابىنىڭ 1-بولىگى (سۋدياعا جالا جابۋ) بويىنشا قىلمىستىق ءىس قوزعادى.

«زاڭ كەز كەلگەن ادامعا سوت تورەلىگىن جۇزەگە اسىرۋ پروتسەسىنە، ونىڭ ىشىندە سۋديانىڭ اتىنا جالا جابۋ نەمەسە قورقىتۋ سيپاتىنداعى ماتەريالداردى جاريالاۋ جولىمەن، ىقپال ەتۋگە تىيىم سالاتىنىن ەسكەرتەمىز. سوت بيلىگىنىڭ بەدەلىن تۇسىرەتىن ارەكەتتەردىڭ جولى كەسىلەدى»، - دەپ حابارلادى جوعارعى سوت.

اۆتور

ايجان سەرىكجان قىزى