بيشىمبايەۆ ءىسى: سوت الەۋمەتتىك جەلىدە ءىس تۋرالى پىكىر بىلدىرۋگە تىيىم سالدى

استانا. KAZINFORM - سوت ەكس-مينيستر قۋاندىق بيشىمبايەۆتىڭ ىسىندەگى تاراپتارعا الەۋمەتتىك جەلىدە پىكىر بىلدىرۋگە تىيىم سالدى.

مەملەكەتتىك ايىپتاۋشى تاراپتان پروكۋرور ايجان ايماعانوۆا القابيلەر سوتىنىڭ پىكىرىنە الەۋمەتتىك جەلى ارقىلى اسەر ەتۋ قاتەرى بار ەكەنىن ايتىپ، وسىنداي شارا قولدانۋدى ۇسىنعان بولاتىن. سوت ول ۇسىنىستى قابىلدادى.

«پروتسەسكە قاتىسۋشىلارعا ايتارىم، سوت وتىرىستارىنان كەيىن ب ا ق-تا ايتقان سوزدەرىڭىز سوتقا قىسىم كورسەتۋ رەتىندە باعالانۋى مۇمكىن. وسىعان بايلانىستى پروتسەسكە قاتىسۋشىلاردىڭ بارىنە ونداي ارەكەتتەردەن اۋلاق بولۋعا كەڭەس بەرەمىن. ءوز قۇقىقتارىڭىزدى سوت وتىرىسى ءوتىپ جاتقان زالدا ىسكە اسىرىڭىزدار. ويتكەنى، سوت وتىرىسىنان تىس ارەكەتتەر وتىرىستاعى القابيلەردىڭ پىكىرىنە اسەر ەتۋى مۇمكىن جانە قىلمىستىق ءىستى وبەكتيۆتى قاراۋعا كەسىرىن تيگىزۋى مۇمكىن. وسىعان بايلانىستى ايىپتاۋشى تاراپتىڭ ۇسىنىسىن قاناعاتتاندىرۋ قاجەت دەپ ەسەپتەيمىن»، - دەدى سۋديا ايجان قۇلبايەۆا.

ەسكە سالساق، 2023 -جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى، 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

1-ناۋرىزدا قۋاندىق بيشىمبايەۆتىڭ ءىسى بويىنشا الدىن الا تىڭداۋ كۇنى بەلگىلەندى. 11-ناۋرىز كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءىس بويىنشا الدىن الا تىڭداۋ ءوتتى. الدىن الا تىڭداۋ 12-ناۋرىزدا جالعاستى.

27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى.

29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس- كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت-الپەتى كوگەرگەن سۋرەت كورسەتتى.

بۇگىنگى سوت وتىرىسىندا ايىپتالۋشى قۋاندىق بيشىمبايەۆ مارقۇم س. نۇكەنوۆانىڭ تۋىستارىنان كەشىرىم سۇرادى.

اۆتور

ەسىمجان ناقتىباي