بيشىمبايەۆ ءىسى: ەكىنشى كۇدىكتى بايجانوۆ شىندىق دەتەكتورىنان وتكىسى كەلەدى

استانا. KAZINFORM - بۇرىنعى مينيستر، ايەلىن ءولتىردى دەپ ايىپتالعان قۋاندىق بيشىمبايەۆتىڭ تۋىس ءىنىسى، ەكىنشى كۇدىكتى باقىتجان بايجانوۆ سوتتا ءسوز سويلەدى.

«مەنى بيشىمبايەۆپەن بىرگە سالتاناتتىڭ دەنەسىن شىعارۋدى جوسپارلادى دەپ ايىپتاپ وتىر. جابىرلەنۋشى تاراپتىڭ پايىمداۋىنشا، بۇعان كۇنى بويى دايىندالعان ەكەنبىز. مەن مۇنى جاساعان جوقپىن. الدىمدا تۇتاس قاراڭعى ءتۇن تۇرسا دا، مەيرامحانادا ەشكىم جوق، قولايلى ءسات بولسا دا، مۇنداي قادامعا بارمادىم. ويتكەنى ونداي وي مەندە مۇلدەم بولعان جوق. سالتاناتتىڭ قايتىس بولعانىن دا بىلمەدىم»، - دەدى ب. بايجانوۆ بۇگىنگى سوت وتىرىسىندا.

ب. بايجانوۆ جەيدە مەن ءمۇساتىر سپيرتىن ءوزى الىپ كەتتى دەگەن نۇسقاعا نەلىكتەن ءبارى سەنىمدى ەكەنىنە قايران قالۋدا.

«بۇل زاتتار عيماراتتان تابىلماعان سوڭ ايىپتاۋدىڭ ءبىر بولجامى رەتىندە شىقتى. بالكىم دۇرىس ىزدەمەگەن شىعار؟ وقيعا ورنىن ءتورت رەت - ءبىر رەت بيشىمبايەۆتىڭ كولىگىن، ءۇش رەت سول VIP-كابينانى تەكسەردى. ال مەيرامحاناداعى باسقا ورىندار، اس ءۇي نەمەسە باسقا بولمەلەر ەش تەكسەرىلمەگەن. مۇمكىن جەيدە مەن ءمۇساتىر سپيرتى ءالى عيماراتتا شىعار، نەگە مەن ونى الىپ شىعۋىم كەرەك؟ ەگەر راسىندا دا ۆيدەولاردى ءوشىرىپ، قىلمىستىڭ ءىزىن جاسىرعىم كەلسە، ءبارىن ءوزىم اتقارار ەدىم. مەن ونى باسقالارعا تاپسىردىم. شىنىمەن دالەلدەردى جويۋعا تىرىسسام، دەرەكتەردى ساقتايتىن سەرۆەردى فيزيكالىق تۇردە جويا الار ەدىم جانە جازبالار ەشقاشان قالپىنا كەلتىرىلمەس ەدى. ءبىراق بۇل بولعان جوق. مەن ءبارىن بۇكپەسىز ايتىپ بەردىم، ەشتەڭەنى جاسىرمادىم، تەك شىندىقتى ايتتىم. قاجەت بولسا جانە مۇمكىن بولسا، شىندىق دەتەكتورىنان دا وتۋگە ءازىرمىن. قالعانى سىزدەردىڭ قولىڭىزدا، كەز كەلگەن شەشىمدى قابىلدايمىن»، - دەدى ب. بايجانوۆ.

اۆتور
ايجان سەرىكجان قىزى