بىشكەكتە 5-دۇنيەجۇزىلىك كوشپەندىلەر ويىندارى قارساڭىندا ورتالىق ازيا ەلدەرىنىڭ مادەني مۇراسى تالقىلاندى

استانا. KAZINFORM - قىرعىزستان استاناسىندا استانادا وتەتىن V دۇنيەجۇزىلىك كوشپەندىلەر ويىندارى قارساڭىندا «مادەني مۇرا جانە داستۇرلەردى ساقتاۋ: دۇنيەجۇزىلىك كوشپەندىلەر ويىندارى ورتالىق ازيا ەلدەردىڭ مادەني مۇراسىن نىعايتۋعا جانە تانىمال ەتۋگە قالاي ۇلەس قوسادى؟» تاقىرىبىندا دوڭگەلەك ۇستەل ءوتتى.

شارانى قازاقستان رەسپۋبليكاسىنىڭ قىرعىز رەسپۋبليكاسىنداعى ەلشىلىگى ۇيىمداستىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ءىس-شاراعا قازاقستاندىق ديپلوماتتار، «دۇنيەجۇزىلىك كوشپەندىلەر ويىندارى» جوباسى مەن بۇكىلالەمدىك ەتنيكالىق ويىندار كونفەدەراتسياسى جوبالارىنىڭ اۆتورى جانە جەتەكشىسى اسحات اكىبايەۆ، قىرعىز رەسپۋبليكاسى مادەنيەت، اقپارات، سپورت مينيسترلىگى جانىنداعى دەنە شىنىقتىرۋ جانە سپورت دەپارتامەنتى ديرەكتورىنىڭ ورىنباسارى سامات توكتوناليەۆ، قىرعىز رەسپۋبليكاسى الپينيزم فەدەراتسياسىنىڭ پرەزيدەنتى ەدۋارد كۋباتوۆ، قوعام قايراتكەرلەرى، قازاق دياسپوراسىنىڭ مۇشەلەرى، ب ا ق جانە تۋريزم وكىلدەرى، بلوگەرلەر قاتىستى.

قازاقستان رەسپۋبليكاسىنىڭ قىرعىزستانداعى ەلشىلىگىنىڭ كەڭەسشىسى گۇلميرا ءسۇلتانالى كەزدەسۋگە قاتىسۋشىلارعا V دۇنيەجۇزىلىك كوشپەندىلەر ويىندارىن استانادا وتكىزۋدىڭ قازاقستان ءۇشىن قانداي ماڭىزى بار ەكەنىن ايتتى.

«قازاقستان استاناسى V دۇنيەجۇزىلىك كوشپەندىلەر ويىندارىن وتكىزۋگە دايىن. بۇل ءبىزدىڭ حالىقتارىمىزدىڭ رۋحاني جانە وركەنيەتتىك قۇندىلىقتارىنىڭ ءوزارا قولداۋى مەن ورتاقتىعىن كورسەتەدى. ولار 8-13-قىركۇيەك ارالىعىندا استانادا «ۇلى دالا ءدۇبىرى» ۇرانىمەن وتەدى. جارىسقا 2800 دەن استام سپورتشى، سونداي-اق 89 ەلدەن رەسمي دەلەگاتسيالار قاتىسادى دەپ جوسپارلانعان. وزدەرىڭىز بىلەتىندەي، د ك و يۋنەسكونىڭ ماتەريالدىق ەمەس قۇندىلىقتارى تىزىمىنە ەنگىزىلگەن، وعان كوشپەلى حالىقتاردىڭ عانا ەمەس، سونىمەن قاتار الەمنىڭ تۇكپىر-تۇكپىرىنەن سپورتشىلار قاتىسادى. قازاقستاندا بۇل شارالارعا ۇلكەن ءمان بەرىلەدى. ويتكەنى ويىندار ادامزات وركەنيەتىنىڭ مۇراسى جانە كوشپەلى حالىقتاردىڭ رۋحاني مۇراسى رەتىندە ەتنوسپورت پەن ەتنومادەني قوزعالىستى دامىتۋعا وراسان زور ۇلەس قوسادى. سونىمەن قاتار، د ك و تەك ءبىزدىڭ ەلدەردە عانا ەمەس، بۇكىل ورتالىق ازيادا تۋريزمدى دامىتۋعا ۇلكەن سەرپىن بەرەدى»، - دەپ اتاپ ءوتتى ديپلومات.

ونىڭ ايتۋىنشا، ويىندار اياسىندا بۇقارالىق مادەني شارالار ۇيىمداستىرىلادى. ەتنواۋىل اۋماعىندا كوشپەلىلەر وركەنيەتىنىڭ مۇراجايى، قولونەرشىلەر قالاسى جانە ءمۇسىن كورمەلەرى اشىلادى. ۇلتتىق مۋزەيدە «كوشپەندىلەر: تاريح، ءبىلىم، تاعىلىم» اتتى حالىقارالىق عىلىمي-تاجىريبەلىك كونفەرەنسيا وتەدى.

اتاپ وتەيىك، 8-13-قىركۇيەكتە استانا قالاسىندا 5-دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000 نان استام سپورتشى قاتىسادى دەپ جوسپارلانۋدا. 5-دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC، ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.