بيۋدجەتتىڭ نەگىزگى ۇلەسى الەۋمەتتىك سالاعا باعىتتالادى - ءماجىلىس زاڭدى قابىلدادى
استانا. KAZINFORM - بۇگىن ءماجىلىستىڭ جالپى وتىرىسىندا «2025 - 2027 -جىلدارعا ارنالعان رەسپۋبليكالىق بيۋدجەت تۋرالى» زاڭ قابىلداندى.
«2025 -جىلعا تۇسىمدەر وسى جىلمەن سالىستىرعاندا 1,2 تريلليون تەڭگەگە ۇلعايا وتىرىپ، 21,7 تريلليون تەڭگە دەڭگەيىندە بولجاندى. 2025 -جىلى بيۋدجەت تاپشىلىعى جالپى ىشكى ونىمگە شاققاندا %2,7 دەڭگەيىندە ەسكەرىلگەن، ال 2027 -جىلعا قاراي بۇل كورسەتكىش %1,9 عا دەيىن تومەندەيدى. بيۋدجەتتىڭ 2025 -جىلعا ارنالعان بيۋدجەت تاپشىلىعىن ەسكەرە وتىرىپ، 25,8 تريلليون تەڭگەنى قۇرايدى، ياعني بيىلمەن سالىستىرعاندا 1,7 تريلليون تەڭگەگە ۇلعايىپ وتىر. زاڭ جوباسىن تالقىلاۋ بارىسىندا حالىقتىڭ ءومىر ءسۇرۋ ساپاسىن ارتتىرۋعا جانە وڭىرلەردى دامىتۋعا باعىتتالعان ءبىرقاتار ۇسىنىستار ەنگىزىلدى. ونىڭ ىشىندە، حالىقتى تازا سۋمەن قامتاماسىز ەتۋگە، جىلۋ ءارى ەلەكتر ەنەرگەتيكاسىن، كولىك، ينجەنەرلىك- كوممۋنيكاتسيالىق ينفراقۇرىلىمىنا، سونداي-اق «اۋىل - ەل بەسىگى» جوباسىن ىسكە اسىرۋعا قوسىمشا شىعىستار كوزدەلگەن. سونىمەن قاتار، تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا مەديتسينالىق قىزمەتتەر كورسەتۋگە، سىبايلاس جەمقورلىققا قارسى ساراپتاما جۇرگىزۋگە ارنالعان شىعىستار قاراستىرىلعان»، - دەدى ق ر قارجى ءمينيسترى ءمادي تاكيەۆ.
وسى تۇزەتۋلەردى ەسكەرە وتىرىپ، بيۋدجەت شىعىستارىنىڭ نەگىزگى باعىتتارى كەلەسىدەي قالىپتاستى:
ءبىرىنشى باعىت - الەۋمەتتىك سالانى دامىتۋ. بيۋدجەت، وتكەن جىلدارداعىداي الەۋمەتتىك باعدارلانعان بولىپ قالا بەرەدى.
2025 -جىلى الەۋمەتتىك سالانىڭ شىعىستارى وسى جىلعا قاراعاندا 862 ميلليارد تەڭگەگە ۇلعايىپ، 9,8 تريلليون تەڭگە كولەمىندە جوسپارلاندى. ونىڭ بيۋدجەت شىعىستارىنداعى ۇلەسى 38 پايىزدى قۇرايدى. ءبىرىنشى باسىمدىق - الەۋمەتتىك قامتاماسىز ەتۋ جانە ازاماتتارعا الەۋمەتتىك كومەك كورسەتۋ.
2025 -جىلعا الەۋمەتتىك تولەمدەرگە ارنالعان شىعىستار - يندەكستەۋ مەن تولەمدەردى الۋشىلار سانىنىڭ ۇلعايۋىن ەسكەرە وتىرىپ، 6 تريلليون تەڭگە سوماسىندا قاراستىرىلعان.
ەكىنشى باسىمدىق - ءبىلىم بەرۋدى دامىتۋ. 2025 -جىلى بۇل باعىتقا شىعىستار بيىلعى دەڭگەيىنەن 73 ميلليارد تەڭگەگە ۇلعايىپ، 1 تريلليون تەڭگەنى قۇرايدى.
ء«ۇشىنشى باسىمدىققا توقتالساق، حالىق سانىنىڭ ءوسۋى مەن ناۋقاستار سانىنىڭ ارتۋىن ەسكەرە وتىرىپ، تەگىن مەديتسينالىق كومەكتىڭ كەپىلدەندىرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ اياسىندا حالىقتى مەديتسينالىق كومەكپەن قامتۋدى ۇلعايتۋ قاراستىرىلعان. دەنساۋلىق ساقتاۋ جۇيەسىنە 2025-2027 -جىلدارعا ارنالعان شىعىستار 7,6 تريلليون تەڭگەنى قۇرايدى، ونىڭ ىشىندە بيىلمەن سالىستىرعاندا 180 ميلليارد تەڭگەگە ۇلعايىپ، 2025 -جىلعا 2,4 تريلليون تەڭگە قاراستىرىلعان. جالپى، 2025 -جىلى تەگىن مەديتسينالىق كومەكتىڭ كەپىلدىك بەرىلگەن كولەمىنە 1,6 تريلليون تەڭگە سوماسىندا شىعىستار جوسپارلاندى. الەۋمەتتىك مەديتسينالىق ساقتاندىرۋ قورىنا 675 ميلليارد تەڭگە، ونىڭ ىشىندە مەملەكەتتىك جارنالارعا 668 ميلليارد تەڭگە كوزدەلگەن»، - دەدى مينيستر.
سونىمەن قاتار ول 2025 -جىلى تۋريزم مەن سپورتتى دامىتۋعا رەسپۋبليكالىق بيۋدجەت شىعىستارى 141 ميلليارد تەڭگە، ال مادەنيەت پەن اقپاراتتى دامىتۋعا 165 ميلليارد تەڭگە كولەمىندە جوسپارلانعانىن ايتتى.
«ەكىنشى باعىت - وڭىرلەردى قولداۋ. 2025 -جىلى وڭىرلەرگە رەسپۋبليكالىق بيۋدجەت قاراجاتى ەسەبىنەن 7,5 تريلليون تەڭگە بولىنەدى. بۇل سوما وسى جىلمەن سالىستىرعاندا 405 ميلليارد تەڭگەگە ارتىق. ول - بيۋدجەتتىڭ جالپى شىعىستارىنىڭ شامامەن 30 پايىزىن قۇرايدى. ءۇشىنشى باعىت - ەكونوميكانىڭ ناقتى سەكتورىن دامىتۋدى قولداۋ. 2025 -جىل بۇل باعىت بويىنشا 2,1 تريلليون تەڭگە قاراستىرىلعان. ونىڭ ىشىندە، مەملەكەت باسشىسىنىڭ تاپسىرماسىنا سايكەس اگروونەركاسىپتىك كەشەندى دامىتۋ كۇشەيتىلدى. وسى باعىتقا 2025 -جىلى بيىلمەن سالىستىرعاندا 30%- عا ۇلعايا وتىرىپ، 635 ميلليارد تەڭگە قاراستىرىلدى. كولىك سالاسىن دامىتۋعا 2025 -جىلى 568 ميلليارد تەڭگە ءبولۋ جوسپارلانعان، وندا اۆتوجول سالاسىن دامىتۋعا 423 ميلليارد تەڭگە كوزدەلگەن»، - دەدى ۆەدومستۆو باسشىسى.
ءمادي تاكيەۆتىڭ سوزىنە قاراعاندا، 2025 -جىلعا ارنالعان كۇش قۇرىلىمدارىنىڭ شىعىستارى 109 ميلليارد تەڭگەگە ۇلعايىپ، 2,7 تريلليون تەڭگە كولەمىندە جوسپارلانىپ وتىر.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ەلمىزدىڭ 2025-2029 -جىلدارعا ارنالعان الەۋمەتتىك-ەكونوميكالىق دامۋ بولجامىن تانىستىردى.
اۆتور
رۋسلان عابباسوۆ