بيۋدجەتتىڭ دەربەس كىرىسى اۋىلدى دامىتۋ ءۇشىن جەتكىلىكسىز - ۇلتتىق ەكونوميكا ۆيتسە- ءمينيسترى

استانا. KAZINFORM - وتكەن جىلدىڭ قورىتىندىسى بويىنشا IV دەڭگەيدەگى بيۋدجەتكە 320 ميلليارد تەڭگە ءتۇسىپ، جوسپار %103,8- عا ارتىعىمەن ورىندالدى. ءبىراق، بۇل كورسەتكىش اۋىلداردى دامىتۋ ءۇشىن ازدىق ەتەدى. بۇل تۋرالى ۇلتتىق ەكونوميكا ۆيتسە-ءمينيسترى باۋىرجان وماربەكوۆ ءمالىم ەتتى.

«جەرگىلىكتى ءوزىن-ءوزى باسقارۋداعى ەڭ وزەكتى ماسەلە - اۋىل بيۋدجەتىنىڭ كىرىس كوزدەرىن كەڭەيتۋ. بۇگىندە بيۋدجەتتىڭ IV دەڭگەيدەگى كىرىستەر 8 ءتۇرلى سالىق تۇسىمىنەن، ءتۇرلى تولەمنەن، ايىپپۇلداردىڭ جانە اۋداندىق بيۋدجەتتەن بەرىلەتىن ترانسفەرتتەردەن قالىپتاسادى. بيۋدجەتتىڭ IV دەڭگەيى ەنگىزىلگەن ساتتەن باستاپ تۇسىمدەر ديناميكاسى 2 ەسە ۇلعايدى. ماسەلەن، 2023 -جىلدىڭ قورىتىندىسى بويىنشا IV دەڭگەيدەگى بيۋدجەتكە 308 ميلليارد تەڭگە جوسپارلانسا، ءىس جۇزىندە 320 ميلليارد تەڭگە ءتۇستى، وسىلايشا جوسپار 3,8- عا ارتىعىمەن ورىندالدى. ونىڭ ىشىندە ءوز تابىسى 53 ميلليارد تەڭگە جوسپارلانسا، ءىس جۇزىندە 68 ميلليارد تەڭگە ءتۇستى. ءوزىن-ءوزى قامتاماسىز ەتۋ ۇلەسى !,2- عا جەتتى»، - دەدى باۋىرجان وماربەكوۆ ءماجىلىس جانىنداعى قوعامدىق پالاتا وتىرىسىندا.

دەگەنمەن ۆيتسە- ءمينيستردىڭ مالىمدەۋىنشە، بۇل كورسەتكىشتەر اۋىلداردى دامىتۋ ءۇشىن جەتكىلىكسىز.

وسى ورايدا ۇلتتىق ەكونوميكا مينيسترلىگى اۋىل بيۋدجەتىنىڭ ءوزىن- ءوزى قامتاماسىز ەتۋىن ۇلعايتۋدى ۇسىنىپ وتىر، ول ءۇشىن:

- ءماسليحاتتى ءبولۋ بويىنشا زاڭدى تۇلعالار مەن جەكە كاسىپكەرلەردىڭ مۇلىك سالىعىنىڭ ۇلەسىن ءبولۋ؛

- سۋ رەسۋرستارىن پايدالانعانى ءۇشىن تولەماقى؛

- جەكەلەگەن قىزمەت تۇرلەرىمەن اينالىسۋ قۇقىعى ءۇشىن ليتسەنزيالىق الىم؛

- جەكەلەگەن قىزمەت تۇرلەرىمەن اينالىسۋعا ليتسەنزيالاردى پايدالانعانى ءۇشىن تولەماقى.

«سونىمەن قاتار جاڭا بيۋدجەت كودەكسىنىڭ جوباسى شەڭبەرىندە پايدالى قازبالاردى ءوندىرۋ سالىعىن بيۋدجەتتىڭ IV دەڭگەيىنە بەرۋ جوسپارلانىپ وتىر. وسىلايشا، IV دەڭگەيدىڭ مەنشىكتى كىرىستەر 4 ەسە ارتۋى كۇتىلەدى. جالپى اۋىل بيۋدجەتىنىڭ كىرىس كوزدەرىن كەڭەيتۋ جونىندەگى جۇمىس جالعاسادى»، - دەيدى ءمينيستردىڭ ورىنباسارى.

بۇعان دەيىن سايلانعان اۋىل اكىمدەرىنىڭ قىزمەتىنە، اتاپ ايتقاندا سايلاۋالدى باعدارلامالارىن ورىنداۋ، حالىقپەن ەسەپتىك كەزدەسۋلەر وتكىزۋ، سونداي- اق الەۋمەتتىك جەلىلەردە قىزمەتتى جاريالاۋ بولىگىندە مونيتورينگ جۇرگىزىلەتىنى تۋرالى حابارلاعان ەدىك.

اۆتور

داۋلەت ىزتىلەۋ