بيۋدجەتتەن نازاربايەۆ ۋنيۆەرسيتەتىنە بولىنەتىن قارجى كولەمى ايتىلدى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك نازاربايەۆ ۋنيۆەرسيتەتىن بيۋدجەتتەن قارجىلاندىرۋعا قاتىستى تۇسىنىك بەردى.

- نازاربايەۆ ۋنيۆەرسيتەتىنىڭ 3 جىلدىق بيۋدجەتى شامامەن 42-43 ميلليارد تەڭگە. ۋنيۆەرسيتەت ءبىلىمىنىڭ ساپاسى جوعارى، حالىقارالىق ستاندارتتارعا ساي، نارىقتا دالەلدەندى. بۇل سومانى ءبىر دەڭگەيدە ۇستاپ تۇرامىز، ۇلعايتپايمىز، - دەپ جاۋاپ بەردى ساياسات نۇربەك ءماجىلىس قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي-اق مينيستر اتالعان ۋنيۆەرسيتەتتىڭ قىزمەتىنە اۋديتورلىق ەسەپ جۇرگىزۋگە قاتىستى تۇسىنىك بەردى.

- جوعارى اۋديتورلىق پالاتا ۇسىنىمىنىڭ 60-70 پايىزى ورىندالدى. مىسالى، تاعايىنداۋ ساياساتى تولىعىمەن قايتا قارالدى. ساتىپ الۋ پروتسەدۋراسى جاقىندا بەكىتىلدى. بۇعان دەيىن 93 پايىز ءبىر كوزدەن ساتىپ الۋ بولسا، قازىر كونكۋرستىق نەگىزدە، - دەپ تولىقتىردى ۆەدومستۆو باسشىسى.

ەسكە سالايىق، 2026 -جىلدان باستاپ نازاربايەۆ ۋنيۆەرسيتەتىن قارجىلاندىرۋ مەحانيزمى وزگەرەدى.

ايتا كەتسەك، 2024 -جىلدىڭ سوڭىندا نازاربايەۆ ۋنيۆەرسيتەتىندە 73 ميلليارد تەڭگەنىڭ ءتيىمسىز يگەرىلگەنى انىقتالدى.

اۆتور

داۋلەت ىزتىلەۋ