بيۋدجەت-2024: ءبىرقاتار مينيسترلىكتىڭ شىعىندارى ازايدى

استانا. KAZINFORM - ق ر قارجى مينيسترلىگى 2024 -جىلعا ارنالعان رەسپۋبليكالىق بيۋدجەتتىڭ كورسەتكىشتەرىنە تۇزەتۋلەر ەنگىزدى. ءتيىستى قاۋلى «اشىق زاڭدى تۇلعالار» پورتالىندا جاريالاندى.

ەڭ كوپ بيۋدجەتتىك قىسقارتۋلار قارجى نارىعىن رەتتەۋ جانە دامىتۋ اگەنتتىگىندە (5,9 ميلليارد تەڭگە)، كولىك مينيسترلىگىندە (3,8 ميلليارد تەڭگە) جانە تسيفرلىق دامۋ مينيسترلىگىندە (1,9 ميلليارد تەڭگە) تىركەلدى.

ال، سىرتقى ىستەر مينيسترلىگى سىرتقى ساياسي قىزمەتتى ۇيلەستىرۋگە شىعىستاردى 366 ميلليون تەڭگەگە، سونداي-اق ق ر ازاماتتارىنىڭ شەتەلدە قۇقىقتارى مەن مۇددەلەرىن قورعاۋ شارالارىنا بولىنگەن قارجىنى 6 ميلليون تەڭگەگە قىسقارتۋدى جوسپارلاپ وتىر. دەسە دە، سىرتقى ىستەر مينيسترلىگى شەتەلدىك ءىسساپارلارعا جانە حالىقارالىق ۇيىمداردا ەلدىڭ مۇددەسىن قورعاۋعا جۇمسالاتىن شىعىنداردى، سايكەسىنشە، 142 ميلليونعا جانە 49 ميلليونعا ۇلعايتپاق.

ق ر قورعانىس مينيسترلىگى ءوز شىعىستارىن 118 ميلليون تەڭگەگە قىسقارتادى. قىسقارتۋ قارۋلى كۇشتەردىڭ جاۋىنگەرلىك ازىرلىگىن قامتاماسىز ەتۋمەن بايلانىستى.

ال، جوعارى جانە ورتا ارناۋلى ءبىلىمى بار مامانداردى دايارلاۋعا ارنالعان بيۋدجەتتى 229 ميلليون تەڭگەگە ۇلعايتۋ جوسپارلانعان.

قۇقىق قورعاۋ ورگاندارى سالاسىنا توقتالساق، ۇلتتىق قاۋىپسىزدىك كوميتەتىنىڭ بيۋدجەتى 98 ميلليون تەڭگەگە قىسقارتىلدى.

ال، قارجى مونيتورينگى اگەنتتىگىنىڭ سىبايلاس جەمقورلىق قىلمىستارىمەن كۇرەسۋگە جۇمساعان شىعىنى 300 ميلليون تەڭگەگە ءوستى.

ەنەرگەتيكا مينيسترلىگى گاز تاسىمالداۋ جۇيەسىن دامىتۋعا بەرىلەتىن نىسانالى ترانسفەرتتەردى 464 ميلليون تەڭگەگە، يندۋستريا جانە قۇرىلىس مينيسترلىگى تۇرعىن ءۇي-كوممۋنالدىق شارۋاشىلىققا جۇمسالاتىن شىعىنداردى 2 ميلليارد تەڭگەگە قىسقارتقانىن اتاپ وتكەن ءجون.

ۆەدومستۆولىق بيۋدجەتتەردىڭ جاپپاي قىسقارتىلۋىنا قاراماستان سيفرلىق دامۋ مينيسترلىگى «ەلەكتروندىق ۇكىمەتتى» دامىتۋعا 3,9 ميلليارد تەڭگە ءبولدى.

تۋريزم جانە سپورت مينيسترلىگى بۇقارالىق جانە ۇلتتىق سپورتتى دامىتۋعا بولىنگەن قاراجاتتىڭ 41 ميلليون تەڭگەسىن، ال مادەنيەت مينيسترلىگى ازاماتتىق قوعام ينستيتۋتتارىن نىعايتۋعا جانە قوعامدىق سانانى جاڭعىرتۋعا بولىنگەن قارجىنىڭ 325 ميلليون تەڭگەسىن قىسقارتتى.

ۇكىمەت رەزەرۆى 6,5 ميلليارد تەڭگەگە ۇلعايتىلدى.

وزگەرىستەرگە قاراماستان، 2024 -جىلعا ارنالعان بيۋدجەت شىعىستارىنىڭ كولەمى وزگەرىسسىز قالدى.

اۆتور
ورالحان قوجانوۆ