بيبىگۇل تولەگەنوۆا اتىنداعى بايقاۋدىڭ جەڭىمپازى انىقتالدى

الماتىدا بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسى اياقتالدى، دەپ حابارلايدى قازاقپارات ءتىلشىسى.

ۆوكاليستەر بايقاۋى - ورتالىق ازياداعى ءبىرىنشى كونكۋرس. الەمنىڭ ۇزدىك انشىلەرى باق سىنايتىن بايقاۋعا 66 ءوتىنىش تۇسكەن. ولاردىڭ اراسىندا 14 ونەرپاز اقتىق سىنعا جولداما الدى.

«كونكۋرستىڭ قاتىسۋشىلارىن، جاس تالانتتى ورىنداۋشىلاردى شىن جۇرەكتەن قۇتتىقتايمىن. بۇل بايقاۋ ورتالىق ازيا ەلدەرىندەگى كلاسسيكالىق ونەردەگى جالعىز جوبا بولعاندىقتان ءبىزدىڭ كونكۋرسقا قاتىسۋ ءۇشىن الىس جانە جاقىن شەتەلدەردەن كوپتەگەن تالانت يەلەرى كەلىپ، كاسىبي وپەرا جانە كونتسەرتتىك كامەرالىق انشىلەر جينالادى. بۇل - ءبىز ءۇشىن جەتىستىك، قۋانىش. وسى جولعى كونكۋرس ادەتتەگىدەي جوعارى دەڭگەيدە ءوتتى. كونكۋرستا جاڭا ەسىمدەر اتالدى. كلاسسيكالىق ونەردىڭ جاس قارلىعاشتارى قانات قاقتى»، - دەيدى قازاقستاننىڭ حالىق ءارتىسى بيبىگۇل تولەگەنوۆا.

ون ەكىنشى رەت وتكەن ايتۋلى بايقاۋدا ازەربايجاندىق ماحير تاگيزادە توپ جاردى. جۇلدەلى ورىندارعا يە بولعانداردىڭ ىشىندە قازاقستاندىق ۆوكاليستەر مەن قىتايدان، ارمەنيادان كەلگەن ونەرپازدار بار.

«قۋانىشىم قوينىما سىيماي تۇر. مەن ءوز ەلىمدە جانە باسقا دا كوپتەگەن حالىقارالىق كونكۋرستارعا قاتىسقانمىن. بۇل جولى الماتىدا، قازاقستاندا، بيبىگۇل احمەت قىزىنىڭ وتانىندا وتكەن بايقاۋعا قاتىسقانىما وتە قۋانىشتىمىن. قازاقستاندى ەكىنشى ءۇيىم دەپ سانايمىن. كونكۋرس تالابى بويىنشا ءبىز قازاق رومانسىن ورىندادىق، ودان وزگە ءوزىمنىڭ جەكە قالاۋىم بويىنشا فينالدا «اباي» وپەراسىنان اريا ورىندادىم. قازاقتىڭ كلاسسيكالىق مۋزىكاسىن ورىنداۋ جانىما راحات سىيلايدى»، - دەدى باس جۇلدە يەگەرى ماحير تاگيزادە.

ارنايى سىيلىق استانالىق حايرۋللا ايبەك، قىتايدان كەلگەن يۋ جويانعا، سونداي- اق رەسەيلىك ۆيكتوريا يۆانوۆاعا بۇيىردى.

ايتا كەتەيىك، بيبىگۇل تولەگەنوۆا اتىنداعى حالىقارالىق ۆوكاليستەر كونكۋرسى 2001 -جىلدان بەرى ءار ەكى جىل سايىن وتكىزىلىپ تۇرادى. بيىل اباي اتىنداعى قازاق ۇلتتىق وپەرا جانە بالەت تەاترىنىڭ مەرەيتويلىق 90-اشىلۋ ماۋسىمىنىڭ اياسىندا وتكىزىلدى.