1992 -جىلى 7 -مامىردا قازاقستان رەسپۋبليكاسى پرەزيدەنتىنىڭ قارۋلى كۇشتەردى قۇرۋ تۋرالى №745 جارلىعى جاريالاندى. جارلىقتا وتاندىق قارۋلى كۇشتى قالىپتاستىرىپ، ول ءۇشىن ءتيىستى جاعداي جاساۋ كەرەكتىگى ايتىلعان. بۇل - ەل تىنىشتىعىن قورعاپ، بەيبىتشىلىكتى قامتاماسىز ەتەتىن اسكەري قىزمەتشىلەردى قۇتتىقتاپ، قۇرمەت كورسەتەتىن كۇن.
ايتا كەتەيىك، قازاقستان قارۋلى كۇشتەر قاتارىندا ەر ازاماتتارمەن قاتار، نازىك جاندار دا تەڭدەي قىزمەت اتقارىپ كەلەدى. ولاردىڭ كوپشىلىگى وفيسەر اتاعىنا يە. سوندىقتان، وتان قورعاۋشى كۇنى - اسكەري سالاداعى قىز-كەلىنشەكتەردىڭ دە مەرەكەسى.
قازاقستان اسكەرى قۇرىلىمىندا قۇرلىق اسكەرلەرى، اۋە قورعانىسى اسكەرلەرى جانە اسكەري-تەڭىز كۇشتەرى قامتىلعان.
2012 -جىلى 7 -مامىر مەملەكەتتىك مەرەكە بولىپ جاريالاندى جانە دەمالىس كۇنى سانالادى. اتاۋلى كۇن قارساڭىندا ەڭبەگى سىڭگەن سالا ماماندارىنا اسكەري اتاقتار بەرۋ جانە ەرەكشە كوزگە تۇسكەن اسكەري قىزمەتشىلەرگە ناگرادالار تاپسىرۋ داستۇرگە اينالعانىن اتاپ ءوتۋ قاجەت.
وسى ورايدا 6 -مامىر كۇنى اقوردادا وتان قورعاۋشى كۇنىنە وراي مەرەكەلىك ءىس-شارا ءوتتى. مەملەكەت باسشىسى - قازاقستان قارۋلى كۇشتەرى جوعارعى باس قولباسشىسى قاسىم-جومارت توقايەۆ ساردارلار مەن ساربازداردى وتان قورعاۋشى كۇنىمەن جانە جەڭىس كۇنىمەن قۇتتىقتادى.
- قوس مەرەكەنىڭ ءمان- مازمۇنى - ۇندەس، تاعىلىمى - ورتاق. وسى مەيرامداردا ەلىمىزدىڭ ەرلىك ءداستۇرى كەڭىنەن دارىپتەلەدى. ءبىز بۇل كۇندەرى جۇرتىمىزعا قورعان بولىپ جۇرگەن ەرلەرگە قۇرمەت كورسەتەمىز. سونداي- اق سۇراپىل سوعىستا وتان ءۇشىن وت كەشكەن باتىرلاردىڭ رۋحىنا تاعزىم ەتەمىز. قازاق - شەكاراسىن اق نايزانىڭ ۇشىمەن، اق بىلەكتىڭ كۇشىمەن بەكەمدەگەن قاھارمان حالىق، ەرجۇرەك ۇلت. باتىر بابالارىمىز ەل تاعدىرى سىنعا تۇسكەن ساتتە ءبىر تۋدىڭ استىنا جينالعان. بىرلىگىن نىعايتىپ، جۇرتىن جاۋدان قورعاعان. بايتاق دالانى كوزدىڭ قاراشىعىنداي ساقتاپ، ۇرپاققا امانات ەتكەن. وسى اماناتقا ادال بولۋ - ءبىزدىڭ قاستەرلى بورىشىمىز. ءبىرتۇتاس قازاقستان حالقى مۇنى جاقسى تۇسىنەدى. ناۋرىز ايىنداعى كونستيتۋتسيالىق رەفورما - سونىڭ ايقىن دالەلى. ساياسي ناۋقان كەزىندە ءبىز ەڭ الدىمەن وسكەلەڭ ۇرپاق الدىنداعى جاۋاپكەرشىلىكتى تەرەڭ سەزىنە وتىرىپ، تاريحي تاڭداۋىمىزدى جاسادىق. ءبارىمىز ءبىر ەل بولىپ، جاڭا كونستيتۋتسيانى قابىلدادىق. مۇنى ۇلت بولاشاعىنا تىكەلەي ىقپال ەتەتىن اسا ماڭىزدى شەشىم دەسەك، قاتە بولمايدى، - دەدى پرەزيدەنت.
مەملەكەت باسشىسى بۇگىنگى تاڭدا ارميانى زامان تالابىنا ساي نىعايتىپ، ەلىمىزدىڭ قورعانىس قابىلەتىن ارتتىرۋعا قاجەتتى بارلىق شارا قابىلدانىپ جاتقانىنا نازار اۋداردى.
- قاۋىپسىزدىك ماسەلەلەرى، ەلىمىزدىڭ قورعانىس قابىلەتىن كۇشەيتۋ، قىزمەتتەردىڭ بەدەلىن كوتەرۋ - نەگىزگى مەملەكەتتىك باسىمدىقتار مەن مىندەتتەر. كەيىنگى جىلدارى اسكەري قىزمەتشىلەرگە، قۇقىق قورعاۋ جانە ارناۋلى ورگاندار قىزمەتكەرلەرىنە كەڭىنەن قولداۋ كورسەتىلىپ كەلەدى، - دەدى قاسىم- جومارت توقايەۆ.
ايتا كەتەيىك، استانادا بۇل مەرەكەگە وراي اسكەري قىزمەتتى ناسيحاتتاۋعا جانە پاتريوتتىق قۇندىلىقتاردى نىعايتۋعا باعىتتالعان مازمۇندى باعدارلاما وتەدى.