«بيگ شانحاي» بازارىنداعى ءورت: 3 ەلوردالىق قۇتقارۋشى جاراقات الدى
استانا. KAZINFORM - وتكەن تۇندە استانادا «بيگ شانحاي» بازارى اۋماعىنداعى عيماراتتاردىڭ ءبىرى ورتەنىپ كەتتى.
استانا توتەنشە جاعدايلار دەپارتامەنتى باسشىسىنىڭ ورىنباسارى قانات التىنبەكوۆتىڭ ايتۋىنشا، العاشقى بولىمدەر كەلگەن كەزدە ءورت عيماراتتىڭ ءۇش قاباتىن تۇگەل شارپىپ ۇلگەرگەن.
- تەپلوۆيزور مالىمەتتەرى بويىنشا سىرتقى قابىرعالاردىڭ تەمپەراتۋراسى 800 گرادۋستان اسقان. ىشىندە نە بولعانىن ەلەستەتىڭىز. قۇرىلىمداردىڭ وپىرىلۋى جانە ءورتتى ءسوندىرۋ بارىسىندا ءۇش قىزمەتكەرىمىز جاراقات الدى. ولاردىڭ بىرەۋى باس جاراقاتىن الىپ، اۋرۋحاناعا جاتقىزىلدى، - دەدى قانات التىنبەكوۆ.
ءورتتى سوندىرۋگە استانا قالاسى ت ج د جانە ج ا و 165 ادام، 62 بىرلىك تەحنيكاسى جۇمىلدىرىلدى.
ەسكە سالساق، وتكەن تۇندە استانادا بايقوڭىر اۋدانى الاش تاس جولىنىڭ بويىنداعى ءۇش قاباتتى بازار عيماراتى ورتكە ورانعانىن جازعان ەدىك. بەلگىلى بولعانداي، بازار اكىمشىلىگى ءورت تۋرالى حابارلاماعان. ءورتتى ءبىرىنشى جانە ءۇشىنشى قاباتتىڭ تەرەزەلەرىنەن شىققان قويۋ قارا ءتۇتىندى بايقاپ قالعان ءورت ءسوندىرۋ ءبولىمىنىڭ قىزمەتكەرلەرى وزدەرى انىقتاعان.