بويىڭىزدا اقشا ۇنەمدەۋدى قالىپتاستىراتىن قاراپايىم 6 ادەت

 العان جالاقىڭىزدى ەسەپسىز جۇمساپ، جەتكىزە الماي جۇرسەڭىز، بيۋدجەتىڭىزدى باقىلاۋعا الۋدىڭ ۋاقىتى كەلدى دەگەن ءسوز. وسىلاي عانا ءسىز اقشا ۇنەمدەپ، كەرەگىڭىزدى ويلانباي ساتىپ الا الاسىز. كوك قاعازعا قارىم-قاتىناسىڭىزدى قاراپايىم كۇندەلىكتى ادەتتەر ارقىلى وزگەرتە الاسىز، - دەپ حابارلايدى قازاقپارات WH-قا سىلتەمە جاساپ. 

كۇن سايىن كىرىس پەن شىعىندى ەسەپتەپ، جازىپ وتىرىڭىز

كوبىنەسە قارجىنىڭ كوپ بولىگى ۇساق، كوزگە كورىنبەيتىن زاتتارعا كەتەدى. مىسالى كۇن سايىن تاڭەرتەڭگى كوفە، دايىن تاماققا تاپسىرىس بەرۋ، دۇكەنگە ويلانباي بارۋ. ەگەر ءسىز كۇن سايىن بارلىق شىعىندى جازىپ وتىرساڭىز، بيۋدجەتىڭىزدىڭ كوپ بولىگى قايدا كەتىپ جاتقانىن ءتۇسىنىپ، ماڭىزى تومەن بولسا ول زاتتان باس تارتىپ، ۇنەمدەي الاسىز.

شىعىندى جوسپارلاڭىز

ايدىڭ باسىندا مىندەتتى جانە تۇراقتى اعىمداعى شىعىندى جازىپ وتىرىڭىز. ولاردى 5 بولىككە: ءار اپتانىڭ جۇمىس جانە دەمالىس كۇندەرىنە ءبولىڭىز. جەكسەنبى كۇنى جوسپارلاعان قاراجاتتان اسىپ كەتپەدىڭىز بە سونى ەسەپتەپ، ەرتەڭگى كۇندى دە ويلاپ وتىرىڭىز. قارجىنى ءاردايىم ەسەپتەۋ قىزىقسىز كورىنگەنىمەن، سىزگە اكەلەر پايداسى كوپ.

جالاقى العان كۇنى اقشا جۇمساماڭىز

كوپتەگەن ادام جالاقى العاندا بۇگىن مەندە اقشا بار، ءوزىمدى ەركەلەتە الامىن دەپ بوساڭسيدى. كەيدە ءبىز كىرىس العان كۇنى شوپپينگ، مەيرامحانادان تاماقتانۋ، ءوزىمىزدى قۋانتۋعا جۇمسالعان اقشانىڭ كەسىرىنەن ايدىڭ سوڭىندى جايلى ءومىر ءسۇرۋىمىز قيىنداپ جاتادى.

سوندىقتان جالاقى تۇسكەن كۇنى جاڭا زات ساتىپ الۋدان باس تارتۋعا تىرىسىڭىز. بۇل سىزگە جاڭا ءامياننىڭ قاجەت نە تاعى ءبىراز كۇتۋگە تۇرارلىق ەكەنىن شەشۋگە كومەكتەسەدى.

اس ءمازىر جاساڭىز

سوڭىندا قوقىسقا كەتەتىن ارتىق ءونىم - قازىرگى زاماننىڭ ناعىز قاسىرەتى. ولار ەكولوگياعا دا، وتباسىلىق بيۋدجەتكە دە كەرى اسەر ەتەدى. كوبىنەسە ادامدار ازىق-تۇلىكتى تىم ارتىق مولشەردە الىپ جاتادى. ناتيجەسىندە توڭازىتقىشتا قۋراپ قالعان كوكونىس، ىرىمشىك، جارامدىلىق مەرزىمى وتكەن ءسۇت قالادى. ەگەر ءسىز 1 ايدا تاستاعان ازىق-تۇلىككە قانشا اقشا كەتكەنىن ەسەپتەپ، ونى 12 ايعا كوبەيتسەڭىز، ناتيجەسىن كورىپ ءوزىڭىز دە تاڭعالاسىز.

ءبىر اپتاعا ارنايى جاسالعان اس ءمازىرى مۇنداي شىعىنعا جول بەرمەيدى، وسىلايشا ءسىز ارتىق ءونىم ساتىپ المايسىز، بارلىعى تۇتىنىلادى.

شوتىڭىزدى تەكسەرىپ وتىرىڭىز

كەيدە ارتارلىقتاي سوما نەگىزسىز شىعىنعا كەتەدى. سول سەبەپتى اقىلى جازىلىمداردى ۇنەمى تەكسەرىپ وتىرىڭىز، مىسالى جىلىنا ءبىر رەت ۇيالى بايلانىس پەن ۇيدەگى ينتەرنەت جوسپارىن قاراپ شىعىڭىز. اكتسيالارعا نازار اۋدارساڭىز، مۇمكىن ءتيىمدى ۇسىنىس تاباسىز.

سىرتتا تاماقتانۋدان باس تارتىڭىز

جوق، مەيرامحاناعا بارۋدان مۇلدە باس تارتۋدىڭ قاجەتى جوق. ءبىراق ءسىز مۇنى ادەتكە اينالدىرماۋىڭىز كەرەك. ءبىر اپتا بويى تاماقتى ۇيدەن ءىشىپ، كافەگە بيزنەس-تۇسكى اسقا بارماي، وزىڭىزبەن بىرگە كوفە ساتىپ الۋدان باس تارتساڭىز، ۇنەمدەلگەن اقشانىڭ مولشەرى بولاشاقتا سىزگە پايداسىن تيگىزۋى مۇمكىن.

ايتا كەتەيىك، بۇعان دەيىن ەكونوميست اقشا جيناۋدىڭ ەڭ ءتيىمدى ادىستەرىن اتاعان ەدى.