بوسانعاننان كەيىنگى تەكسەرۋ نەگە ماڭىزدى - دارىگەر كەڭەسى

استانا. KAZINFORM - بوسانۋ - ايەل اعزاسى ءۇشىن ۇلكەن سىناق. ءسابي امان-ەسەن دۇنيەگە كەلسە دە، اناعا مىندەتتى تۇردە دارىگەرلىك تەكسەرۋدەن ءوتۋ كەرەك. بۇل تۋرالى الماتى قالالىق №4 پەرزەنتحانا ديرەكتورىنىڭ ورىنباسارى، اكۋشەر- گينەكولوگ ەكاتەرينا سامارتسيەۆا ايتىپ بەردى.

ونىڭ سوزىنشە، ايەل بالانى توعىز اي كوتەرىپ، بوسانۋ كەزىندە كوپ كۇش جۇمسايدى. سوندىقتان اعزاعا قايتا قالپىنا كەلۋ قاجەت.

- كوپتەگەن ايەلدەر «امان-ەسەن بوساندىم، ەندى ءبارى ارتتا قالدى» دەپ ويلايدى. ءبىراق اعزاداعى كەيبىر وزگەرىستەر بايقالماي، جاسىرىن ءجۇرۋى مۇمكىن. سول سەبەپتى ۋاقتىلى جاسالعان تولىق تەكسەرۋ اسقىنۋدىڭ الدىن الۋعا كومەكتەسەدى، - دەيدى جوعارى ساناتتى اكۋشەر- گينەكولوگ ەكاتەرينا سامارتسيەۆا.

سول سەبەپتى بوسانعاننان كەيىن ايەلگە مىندەتتى تۇردە تولىق تەكسەرۋدەن ءوتۋ قاجەت. ماماندار بوسانعاننان كەيىنگى تەكسەرىستى پەرزەنتحانانىڭ وزىندە جاساعان دۇرىس دەپ ەسەپتەيدى. سەبەبى ول جەردە ايەلدىڭ جاعدايىن بىلەتىن دارىگەرلەر بار، ءارى انا تانىس ورتادا ءوزىن جايلى سەزىنەدى.

- ءبىز تەك تالداۋ جاساپ قانا قويماي، ايەلدىڭ تولىق قالپىنا كەلۋ پروتسەسىن دە باقىلاپ وتىرامىز. تەكسەرىس بارىسىندا قان اينالىمى مەن قان ءتۇزۋ جۇيەسى، باۋىر مەن بۇيرەك جۇمىسى، گورموندار، زات الماسۋ جانە كىشى جامباس اعزالارى تەكسەرىلەدى. گەموگلوبين دەڭگەيىنە، قابىنۋلارعا قارايمىز، باۋىر-بۇيرەكتىڭ جاعدايىن انىقتايمىز، قاجەت بولسا ۋدز جاسايمىز. بۇل تەك جالپى دەنساۋلىق ءۇشىن ەمەس، ايەلدىڭ بولاشاقتاعى بالا كوتەرۋ قابىلەتىنە دە ماڭىزدى. بوسانعاننان كەيىنگى تەكسەرۋ - كەلەسى جۇكتىلىككە دايىندىقتىڭ العاشقى قادامى. ەگەر ايەل تاعى ءسابي جوسپارلاسا، اعزاسىنىڭ تولىق قالپىنا كەلگەنىنە كوز جەتكىزۋى كەرەك. بۇل اسقىنۋلاردان ساقتاپ، جۇكتىلىكتىڭ ءساتتى وتۋىنە كومەكتەسەدى، - دەپ ءتۇسىندىردى ەكاتەرينا سامارتسيەۆا.

قالالىق №4 پەرزەنتحانادا جاڭا بوسانعان انالارعا جاسالاتىن كەشەندى تەكسەرۋگە: جالپى قان تالداۋى (گەموگلوبين، ەريتروتسيتتەر، لەيكوتسيتتەر فورمۋلاسى، ترومبوتسيتتەر، سوە، گەماتوكريت)، جالپى ءزار تالداۋى، بيوحيميالىق زەرتتەۋلەر (الت، است، كرەاتينين، گليۋكوزا، جالپى بەلوك، جالپى بيليرۋبين، موچيەۆينا)، باكتەريوسكوپيالىق جاعىندى، تامىردان قان الۋ، كىشى جامباس اعزالارىنىڭ ۋدز، گينەكولوگ كەڭەسى كىرەدى. بۇل تەكسەرۋلەر ايەلدىڭ جالپى دەنساۋلىعىنا عانا ەمەس، بولاشاقتا قايتا جۇكتى بولۋىنا دا اسەر ەتەدى.

دارىگەردىڭ بوسانعاننان كەيىنگى تەكسەرۋدەن ءوتۋدىڭ ەڭ قولايلى ۋاقىتى - العاشقى 6- 8 اپتا ەكەنىن ايتتى. بۇل اعزا بەلسەندى تۇردە قايتا قالپىنا كەلەتىن كەزەڭ، ونى «التىن ۋاقىت» دەپ تە اتايدى.

- ەگەر شاعىمدار بولسا، ەتەككىر بۇزىلسا، اۋىرسىنۋلار نەمەسە باسقا دا وزگەرىستەر بايقالسا، كەز كەلگەن ۋاقىتتا تەكسەرىلگەن دۇرىس. ەڭ باستىسى - كەيىنگە قالدىرماۋ كەرەك، سەبەبى «اۋىرىپ ەم ىزدەگەنشە، اۋىرماۋدىڭ جولىن ىزدەۋ» جەڭىل. بوسانۋ - تەك باستاماسى عانا. رەپرودۋكتيۆتى دەنساۋلىق ءسابي دۇنيەگە كەلگەن ساتپەن شەكتەلمەيدى. ايەلدىڭ رەپرودۋكتيۆتى دەنساۋلىعى ءاردايىم كۇتىمدى قاجەت ەتەدى. دەنساۋلىعىڭىزعا نەمقۇرايلى قاراماڭىز، ول ءسابيدىڭ دەنساۋلىعىمەن بىردەي ماڭىزدى، - دەپ قورىتىندىلادى سامارتسيەۆا.

ەسكە سالايىق، بالا تۋعاندا بەرىلەتىن جاردەماقىنى 2025 -جىلدىڭ باسىنان باستاپ ەلىمىزدە 117 مىڭ ادام الدى.