«بولاشاقتىڭ ويىندارى»: قازاقستاندىقتار بىرنەشە جۇلدە يەلەندى

 استانا. KAZINFORM - رەسەيدىڭ قازان قالاسىندا «بولاشاقتىڭ ويىندارى» حالىقارالىق ءتۋرنيرى مارەسىنە جەتتى.

اتالعان العاشقى حالىقارالىق مۋلتيسپورتتىق تۋرنير 21-اقپان مەن 3-ناۋرىز ارالىعىندا ءوتتى. «بولاشاقتىڭ ويىندارى» ءتۋرنيرى - سيفرلىق جانە كلاسسيكالىق 21 سپورت ءتۇرىن بىرىكتىرەتىن يننوۆاتسيالىق فيدجيتال. جارىسقا 12-62 جاس ارالىعىنداعى 2 مىڭنان استام ادام قاتىسىپ، 294 كوماندا قۇرىلدى. ءتۋرنيردىڭ جۇلدە قورى $10 ميلليون قۇرادى.

جارىستارعا گەيمديەۆ، كيبەرسپورت، روبوتوتەحنيكا (درون جارىسى جانە روبوت شايقاستارى)، كەڭەيتىلگەن جانە ۆيرتۋالدى شىندىق، اقپاراتتىق تەحنولوگيالار جانە جاساندى ينتەللەكت بويىنشا ازىرلەمەلەر كىردى. جالپى 21 ءتارتىپ بار، ونىڭ ىشىندە 16 نەگىزگى جانە 5 كەڭەيتىلگەن باعدارلاما. اتالعان ويىندارعا 13 ءتارتىپ بويىنشا 48 قازاقستاندىق قاتىستى. بارلىعى 236 سپورتشى العاشقى «بولاشاقتىڭ ويىندارى» ءتۋرنيرىنىڭ جەڭىمپازدارى مەن جۇلدەگەرلەرى اتاندى. ولار رەسەي، قىتاي، ءۇندىستان، بەلارۋس، وڭتۇستىك كورەيا، يسپانيا، ۋرۋگۆاي، فيليپپين، ارگەنتينا، ەكۆادور، كولۋمبيا ەلىنىڭ سپورتشىلارى. سونداي-اق، قازاقستاندىقتار ويىندا جوعارى دەڭگەيدەگى ناتيجە كورسەتىپ، بىرنەشە مەدال ۇتىپ الدى.

وسىلايشا، xGOD كومانداسىنىڭ قۇرامىندا بەس قازاقستاندىق ونەر كورسەتىپ، كەرەمەت داعدىلارىن كورسەتتى. ولار Counter- Strike 2 ويىنى مەن لازەرتاگ بويىنشا «بولاشاقتىڭ ويىندارى-2024» چەمپيوناتىندا جەڭىسكە جەتتى. فينالدىق ويىندا xGOD ۇجىمى رەسەيلىك LookingForOrg قۇرامىمەن كەزدەسىپ، 2:0 ەسەبىمەن ۇتتى. ماتچ Inferno كارتاسىندا 13:9 جانە Overpass كارتاسىندا 13:11 جيىنتىق ۇپايمەن اياقتالدى. بۇل جەتىستىك xGOD ويىنشىلارىنىڭ جوعارى دايىندىعى مەن كاسىبيلىگىن راستايدى. قازاقستاندىقتار $175 مىڭ جۇلدە ۇتىپ الدى.

سونىمەن قاتار، قازاقستاندىقتار Dota2 بويىنشا ءار ءتۇرلى حالىقارالىق كوماندالار قۇرامىندا ءتۋرنيردىڭ 1/16 دان 1/4 فينالىنا ءوتتى. قازاقستاننان كەلگەن فيدجيتال- حوككەيشىلەر (Cyber Barys) 1/8 فينالعا دەيىن ءوتتى، Young كومانداسىنىڭ جاتتىقتىرۋشىسى ءالىم راحمەتوۆ ءوز كومانداسىن ءبىرىنشى ورىنعا شىعارىپ، ۇجىم 87,5 مىڭ دوللار ۇتىپ الدى. «تانكتەر الەمى» ءتارتىبى بويىنشا Rise كومانداسىنىڭ ويىنشىسى ستانيسلاۆ شتىرەنكو فينالدىڭ 1/4 كەزەڭىنە ءوتىپ، 30 مىڭ دوللار الدى. ءادىل ەلدوسوۆ، Absolute كومانداسىنىڭ مۇشەسى Standoff جارىسىنىڭ جەڭىمپازى اتاندى، ونىڭ كومانداسى 87,5 مىڭ دوللاردى قۇرايتىن جۇلدەگە يە بولدى.

قازاقستاندا كيبەرسپورت ينفراقۇرىلىمى 2018 -جىلدان باستاپ قارقىندى دامىپ كەلەدى، كەيىن رەسمي سپورت ءتۇرى بولىپ تانىلدى. وتكەن جىلى جازدا قازاقستان رەسپۋبليكاسىنىڭ كيبەرسپورت فەدەراتسياسى قۇرىلدى. سودان بەرى ەلدە جۇزدەگەن تۋرنير، سونىڭ ىشىندە ءبىرقاتار حالىقارالىق جارىس ءوتتى.

ايتا كەتەيىك، 2024 -جىلعى 22-اقپاندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستاندا «بولاشاقتىڭ ويىندارى» حالىقارالىق مۋلتيسپورتتىق ءتۋرنيرىن وتكىزۋدى ۇسىنعان ەدى.

اۆتور

داۋلەت ىزتىلەۋ