بۇل تۋرالى Astana Media Week 2026 فورۋمىندا مادەنيەت جانە اقپارات ءبىرىنشى ۆيتسە- ءمينيسترى قانات ىسقاقوۆ ايتتى.
ونىڭ ايتۋىنشا، سيفرلىق تەحنولوگيالار مەن جاساندى ينتەللەكت رەداكسيالاردىڭ قالىپتاسقان جۇمىس ءتارتىبىن وزگەرتىپ جاتىر. الداعى ۋاقىتتا تەلەارنالار، ينتەرنەت باسىلىمدارى مەن گازەتتەر بولەك جۇمىس ىستەمەي، ماتەريالداردى ورتاق جۇيەدە ازىرلەپ، ءتۇرلى ارنالار ارقىلى تاراتۋى مۇمكىن.
- بولاشاقتا ينتەرنەت رەداكتسياسى دا، تەلەۆيزيا دا بولەك بولمايدى. بارلىعىن بىرىكتىرەتىن ءبىرتۇتاس مەديا كەڭىستىك قالىپتاسادى، - دەدى قانات ىسقاقوۆ.
ءبىرىنشى ۆيتسە-مينيستر بۇعان Euronews كومپانياسىن مىسالعا كەلتىردى. كومپانيا بۇگىندە تەلەارنا مەن جاڭالىقتار سايتىن جۇرگىزۋمەن عانا شەكتەلمەي، سيفرلىق پلاتفورمالار مەن ستريمينگ قىزمەتتەرىن دامىتىپ، ينتەرنەت ارقىلى دا حابار تاراتادى.
قانات ىسقاقوۆتىڭ پىكىرىنشە، جاساندى ينتەللەكت اقپارات قۇرالدارىنىڭ وسىنداي ورتاق جۇيەگە كوشۋىن جەدەلدەتۋى مۇمكىن. ويتكەنى بۇل تەحنولوگيا ماتەريال دايىنداۋدى جەڭىلدەتىپ، ونى ءتۇرلى ارنالار ارقىلى تاراتۋعا مۇمكىندىك بەرەدى. الايدا ءبىرىنشى ۆيتسە-مينيستر جاساندى ينتەللەكتىنىڭ مۇمكىندىگىن اسىرا باعالاماۋ كەرەگىن ەسكەرتتى. ونىڭ ايتۋىنشا، جاڭا تەحنولوگيا ەڭ الدىمەن جۋرناليستەردىڭ جۇمىسىن ءتيىمدى ەتۋگە كومەكتەسەتىن قۇرال رەتىندە قولدانىلۋى ءتيىس.
- ەڭ باستىسى - ونى قولدانۋداعى جاۋاپكەرشىلىك، - دەدى ول.
سونىمەن قاتار ءبىرىنشى ۆيتسە-مينيستر تەحنولوگيالار مەن اقپارات تاراتۋ تاسىلدەرى وزگەرگەنىمەن، اۋديتوريا سەنىمىن ساقتاۋ، رەداكسيالاردىڭ جاۋاپكەرشىلىگى جانە كاسىبي تالاپتاردى ۇستانۋ ماڭىزدى بولىپ قالا بەرەتىنىن اتاپ ءوتتى.
ايتا كەتەيىك، Astana Media Week 2026 فورۋمى 14-16-قازان ارالىعىندا استاناداعى بەيبىتشىلىك جانە كەلىسىم سارايىندا وتەدى.
بۇعان دەيىن ءداستۇرلى جۋرناليستيكانىڭ قازىرگى جاعدايى مەن بولاشاعى تۋرالى جازعان ەدىك.