«بولاشاق» تۇلەكتەرى ەلدىڭ دامۋىنا قانداي ۇلەس قوسىپ ءجۇر

- «بولاشاقتىقتار قايدا ءجۇر؟» دەگەن سۇراق قوعامدا جيى قويىلادى. اسىرەسە حالىقارالىق «بولاشاق» باعدارلاماسىنا قاتىستى «تۇلەكتەر شەتەلدە قالىپ قويادى»، «مەملەكەت قارجىسى سىرتقا كەتىپ جاتىر» دەگەن پىكىرلەر دە ايتىلىپ كەلدى. باعدارلاما جۇزەگە اسقان ۋاقىت ىشىندە الەمنىڭ ۇزدىك جوعارى وقۋ ورىندارىندا 13,2 مىڭنان استام مامان دايارلانعان. بۇگىندە 10922 تۇلەك كەلىسىمشارتتىق مىندەتتەمەلەرىن تولىق ورىنداسا، ەڭبەكپەن وتەۋ مونيتورينگىندە تۇرعانداردىڭ 98,4 پايىزى قازاقستان ىشىندە ەڭبەك ەتىپ ءجۇر، - دەدى ول.

ونىڭ ايتۋىنشا، بولاشاقتىقتار تەك ءوز سالاسىندا تابىسقا جەتىپ قانا قويماي، ەلدىڭ ستراتەگيالىق دامۋىنا ۇلەس قوسىپ كەلەدى.

- ينۆەستيتسيا قايتارىمىنىڭ ناقتى دەڭگەيىن ولشەۋ وڭاي ەمەس، ءبىراق ول جۇمسالعان قاراجاتتان كەم دەگەندە ونداعان، ءتىپتى جۇزدەگەن ەسە اسىپ تۇسەدى. جاڭا وندىرىستەر، جۇمىس ورىندارى مەن سالىقتار ارقىلى ەكونوميكاعا قوسىلاتىن تىكەلەي ۇلەستەن بولەك، قۇتقارىلعان ومىرلەر مەن جۇيەلى رەفورمالاردىڭ قۇنى باعا جەتپەس جوعارى. ماسەلەن، قازىرگى كۇندەلىكتى ءومىرىمىزدى ونسىز ەلەستەتۋ قيىن بولاتىن ح ق و سياقتى جاڭاشىلدىقتاردى ءدال وسى ستيپەنديانىڭ العاشقى تۇلەكتەرى ەنگىزگەن بولسا، كۇن تارتىبىندەگى وزەكتى جاساندى ينتەللەكت، سيفرلاندىرۋ جۇمىستارىنىڭ كوشباسىندا كەيىنگى بۋىن تۇلەكتەرى تۇر، - دەدى جانىبەك كاترەنوۆ.

سونداي-اق ول قازىرگى تاڭدا تۇلەكتەردىڭ قاي سالالاردا نەمەنەمەن اينالىسىپ جۇرگەنىن دە اتاپ ءوتتى.

- 45 پايىزى جەكە سەكتور مەن كاسىپكەرلىك سالاسىندا جۇمىس ىستەيدى. 25 پايىزى مەملەكەتتىك قۇرىلىمداردا قىزمەت ەتسە، 18 پايىزى ۇلتتىق كومپانيالاردا ەڭبەك ەتەدى. قالعان 12 پايىزى ءبىلىم، عىلىم جانە مەديتسينا سالاسىندا جۇمىس ىستەيدى. سوڭعى 25 جىل ىشىندە «Bolashaq» تۇلەكتەر قاۋىمداستىعى ءبىلىم بەرۋ، الەۋمەتتىك قولداۋ، جاستار ساياساتى، كاسىپكەرلىك جانە مادەنيەت باعىتتارىندا 150 دەن استام جوبانى جۇزەگە اسىردى. قاۋىمداستىق گرانتتارى ارقىلى 25 جاڭا كاسىپورىن اشىلدى. بۇگىندە قاۋىمداستىق قاتارىندا 3 مىڭعا جۋىق مۇشە بار، - دەدى كەڭەس ءتوراعاسى.

سونىمەن قاتار كەڭەس ءتوراعاسى بولاشاقتىقتاردىڭ باستاماسىمەن Disney جانە Hollywood ستۋديالارىنىڭ مۋلتفيلمدەرى العاش رەت قازاق تىلىنە دۋبلياجدالىپ، ەلىمىزدىڭ 26 قالاسىندا ينكليۋزيۆتى ءبىلىم بەرۋدى قولدايتىن 71 ارنايى كابينەت اشىلعانىن اتاپ ءوتتى.