بوكستان ۇلتتىق قۇراما باپكەرىن اتىپ كەتتى: سەبەبى ايتىلدى

استانا. KAZINFORM - بىشكەكتەگى بوكس زالدارىنىڭ بىرىندە ۇلتتىق قۇراما جاتتىقتىرۋشىسى جىلدىزبەك نيازاليەۆ پەن ونىڭ كومەكشىسىنە وق ءتيىپ، جاراقات الدى. ءبىر ادام قازا تاۋىپ، ەكەۋى اۋىر جاراقاتپەن اۋرۋحاناعا جەتكىزىلگەن، - دەپ حابارلايدى 24.kg.

قاندى وقيعا كەشە كەشتە بولعان. قىرعىزستان ءى ءى م تاراتقان اقپارات بويىنشا، جۋىردا عانا قاماۋدان شىققان بۇرىنعى تورەشى مۇقاش ىرساليەۆ جىلدىزبەكتەن كەك الۋ ءۇشىن كەلگەن. قۇراما باپكەرىمەن قارجىلاي كەلىسپەۋشىلىك بولعان. جىلدىزبەكتىڭ ارىزى بويىنشا مۇقاش قاماۋعا الىنعان.

زالداعى كەزدەسۋ كەزىندە مۇقاش «سايگا» قارۋىمەن جاتتىقتىرۋشى مەن كومەكشىسىنە وق اتقان. جانتالاسقان ساتتەگى قاربالاستا شابۋىلداۋشى مۇقاشقا وق ءتيىپ، وقيعا ورنىندا قازا تاپقان. جاتتىقتىرۋشىلار اۋرۋحاناعا جەتكىزىلدى.

دەرەككوز اقپاراتى بويىنشا، بوكس زالى بوكستان الەم چەمپيونى، جوعارعى كەڭەستىڭ بۇرىنعى دەپۋتاتى ورزۋبەك نازاروۆقا تيەسىلى بولعان. ول تىلشىلەرگە بەرگەن سۇحباتىندا قاۋىپ جايلى بىلمەگەنىن ايتادى.

ىرساليەۆ تاراپىنان قانداي دا ءبىر قاۋىپ-قاتەر بولعانى تۋرالى بىلمەيمىن، سوندىقتان بۇل تۋرالى ەشتەڭە ايتا المايمىن. وقيعا تۋرالى الەۋمەتتىك جەلىلەردەن ءبىلدىم. جانجال بۇرىن شەشىلگەن سياقتى ەدى. مۇقاش ىرساليەۆپەن جاقىن ارالاسقان جوقپىن، تەك تورەشىلىك ىستەر بويىنشا تانىسپىن. ونى جاقسى ادام رەتىندە سيپاتتاي الامىن. ول ءارقاشان كومەكتەسىپ، تۋرنيرلەر ۇيىمداستىرىپ جۇرەتىن، - دەيدى ورزۋبەك نازاروۆ.

اتىس كەزىندە زالدا جاتتىعىپ جۇرگەن بالالار دا بولعان.

ماعان تۇرعىندار قوڭىراۋ شالدى، مەن بىردەن كەلدىم. ىشكە كىرگەندە، اۋىر كورىنىستى كوردىم. زالدا بالالار بولدى، ال اتىس باپكەرلەر بولمەسىندە باستالعان. قۇدايعا شۇكىر، بالالارعا زيان كەلگەن جوق، - دەيدى ول.

اتالعان فاكتى بويىنشا بىشكەك قالاسى وكتيابر اۋدانى ءى ءى ب تەرگەۋ قىزمەتى قىرعىز رەسپۋبليكاسى قىلمىستىق كودەكسىنىڭ 122-بابى «كىسى ءولتىرۋ» بويىنشا قىلمىستىق ءىس قوزعالدى.

ايتا كەتەيىك، باستاپقىدا قىرعىزستاننىڭ اقپارات قۇرالدارى جاتتىقتىرۋشى جىلدىزبەك نيازاليەۆتىڭ قايتىس بولعانى جايلى جازعان. كەيىننەن جانساقتاۋ بولىمىندە جاتقانى ايتىلدى.