بوكستان استاناداعى الەم كۋبوگىنا كىمدەر قاتىسادى

استانا. قازاقپارات - World Boxing ۇيىمداستىراتىن الەم كۋبوگىندا باق سىنايتىن قازاقستان بوكسشىلارى انىقتالدى.

باس باپكەر قايرات ءساتجانوۆتىڭ ايتۋىنشا، استانادا وتەتىن الەم كۋبوگىنا قازاقستان ۇلتتىق قۇراماسىنىڭ ءبىرىنشى ءنومىرلى بوكسشىلارى قاتىسادى.

الدىن الا جاريالانعان ءتىزىم مىناداي:

• 50 كەلى - سانجار تاشكەنباي

• 55 كەلى - ماحمۇد سابىرحان

• 60 كەلى - سەرىك تەمىرجانوۆ

• 65 كەلى - ەرتۋعان زەينوللينوۆ

• 70 كەلى - ابىلايحان ءجۇسىپوۆ

• 75 كەلى - سابىرجان اققالىقوۆ

• 80 كەلى - نۇربەك ورالباي

• 85 كەلى - بەكزاد نۇرداۋلەتوۆ

• 90 كەلى - ساعىندىق توعامباي

• 90+ كەلى - ايبەك ورالباي

تۋرنير استانادا 30-ماۋسىم مەن 7-شىلدە ارالىعىندا وتەدى.

نەگىزى بۇل بوكستان الەم كۋبوگىنىڭ ەكىنشى كەزەڭى بولۋى ءتيىس ەدى. الايدا قازىر بۇل ماسەلەگە قاتىستى ءبىراز تۇسىنبەستىك بار. ويتكەنى ەكىنشى كەزەڭ كۇتپەگەن جەردەن ۆارشاۆادا ءوتىپ كەتتى. قازاقستان قۇراماسى وعان قاتىسقان جوق. سەبەبى باستاپقىدا بۇل جارىس «فەليكس شتامم» تۋرنيرى رەتىندە جوسپارلانعان ەدى. ال الەم كۋبوگىنىڭ مارتەبەسى وعان ەڭ سوڭعى ساتتە عانا بەرىلدى.