بوكستان الەم چەمپيونى مەرەي اقشالوۆ جاۋاپتى قىزمەتكە تاعايىندالدى
استانا. KAZINFORM - بوكستان الەم چەمپيونى مەرەي اقشالوۆ استانا قالاسىنداعى ق. مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنە ديرەكتور بولىپ تاعايىندالدى.
اتالعان وقۋ ورنى اتاپ وتكەندەي، قازاقستان رەسپۋبليكاسى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى سەرىكوۆ روللان سەرىك ۇلى، مەكەمە قىزمەتكەرلەرىن ءتوراعا بۇيرىعىمەن تانىستىرىپ، اقشالوۆ مەرەي تولەگەن ۇلى وسى لاۋازىمعا تاعايىندالعانىن مالىمەت ەتتى.
ەستەرىڭىزگە سالساق، سۋ جاڭا باسشى وسى مەكتەپتىڭ 2005-جىلعى تۇلەگى، بوكس ءبولىمىنىڭ نۇسقاۋشى-سپورتشىسى.
مەرەي اقشالوۆ 1988-جىلى 8-مامىردا اياگوز قالاسىندا (قازىرگى اباي وبلىسى) دۇنيەگە كەلدى. قازاقستان رەسپۋبليكاسىنا ەڭبەگى سىڭگەن سپورت شەبەرى. 2013-جىلعى الەم چەمپيونى، ازيا چەمپيونى. 2010-جىلعى اسكەريلەر اراسىنداعى الەم چەمپيونى. 2013-جىلعى ازيا قۇرلىعىنىڭ ەڭ ۇزدىك بوكسشىسى. 2013-جىلعى قازاقستاننىڭ «جىل سپورتشىسى». 2008-جىلعى وليمپيادا ويىندارىنىڭ قاتىسۋشىسى. سپورتتىق مانسابىندا 60 جانە 64 كەلىگە دەيىن سالماق دارەجەسىندە جۇدىرىقتاستى.
«قۇرمەت» وردەنىمەن ماراپاتتالدى.
ەڭبەك جولىن استانا قالاسىنىڭ دەنە شىنىقتىرۋ جانە سپورت باسقارماسىنىڭ بالالار مەن جاس وسپىرىمدەر سپورت مەكتەبىنىڭ ادىسكەرى بولىپ باستادى. كەيىن، قالالىق جوعارعى سپورتتىق شەبەرلىگى مەكتەبى، سپورت مەكتەبى ديرەكتورىنىڭ ورىنباسارى، ديرەكتورى بولىپ جالعاستىردى.
ق ر ۇلتتىق وليمپيادا كوميتەتىندە، اقمولا وبلىسى دەنە شىنىقتىرۋ جانە سپورت باسقارماسى باستىعىنىڭ ورىنباسارى لاۋازىمدىق قىزمەتتەرىن اتقاردى. اقمولا وبلىسى شورتاندى اۋدانى اكىمىنىڭ ورىنباسارى بولدى.
سوڭعى جۇمىس ورنى – ق ر تۋريزم جانە سپورت مينيسترلىگى، سپورت جانە دەنە شىنىقتىرۋ ىستەرى كوميتەتى، سپورتتى دامىتۋ ديرەكتسياسىنىڭ بوكستان مەملەكەتتىك جاتتىقتىرۋشى.
اۆتور كۇنسۇلتان وتارباي