بوكسقا رەفورما جاسالمايىنشا، ادىلدىك بولمايدى - ساراپشى

داۋىرىندە جانكۇيەرلەردىڭ شەكسىز ىقىلاسىنا بولەنگەن بوكس سپورتىنىڭ كەلەشەگى بۇلىڭعىر ەكەنى جايلى ءجيى ايتىلادى. ءتىپتى، 2028 -جىلى لوس-اندجەلەستە وتەتىن وليمپيادا ويىندارىندا بوكس جارىسى وتكىزىلە مە - ول دا بەلگىسىز. ازىرگە World Boxing مەن IBA ۇيىمىنىڭ اراسىندا باقتالاستىق ءجۇرىپ جاتىر. اتالعان ەكى ۇيىمعا دا مۇشە سانالاتىن قازاقستان قانداي پوزيتسيانى ۇستانىپ وتىر؟ Kazinform ءتىلشىسى ماسەلەنى سپورت ساراپشىسى ايدوس رىمقۇلمەن بىرگە تالقىلاپ كوردى.

- قازىر قازاقستان بوكسى ەكى تاڭداۋدىڭ ورتاسىندا تۇرعانداي - WB نەمەسە IBA. سپورت ساراپشىلارىنىڭ اراسىندا بۇل جونىندە تالقى كوپ. ەلىمىز ازىرگە ەكى ۇيىمنىڭ دا كوڭىلىن قالدىرماي كەلەدى، دەگەنمەن ناقتى ءبىر تاڭداۋعا توقتالاتىن كەز كەلەتىنى انىق. ءسىزدىڭ ويىڭىزشا، قاي ۇيىم قازاق بوكسىنا ارتىقشىلىق بەرە الادى؟

- قالاي العاندا دا، IBA (بۇرىنعى AIBA) - بوكس سپورتىنداعى حالىقارالىق العاشقى ۇيىم. رەسمي تۇردە 1946 -جىلى قۇرىلعانىمەن، 1920 -جىلدان باستاپ بۇل ۇيىمنىڭ العىشارتتارى جاسالىپ، انتۆەرپەندە وتكەن وليمپيادادا بوكس ءتۋرنيرىن ۇيىمداستىردى.

سودان بەرى ۇيىم 1 عاسىرعا جۋىق ۋاقىت بويى ۇزدىكسىز وليمپيادا باعدارلاماسى اياسىندا بوكس تۋرنيرىن ۇيىمداستىرىپ كەلدى. ءبىراق 2019 -جىلى بۇل ۇيىم وليمپيادادا بوكسقا جاۋاپتى ۇيىم قاتارىنان الىنىپ تاستالدى، اياق استى بەدەلىنەن ايىرىلدى. نەگە؟ سەبەبى ۇيىم ادىلەتسىز شەشىمدەرىمەن جانكۇيەرلەردىڭ كوزىنە تۇسە باستادى، اشىق ساياسات ۇستانباۋى اۋەسقوي بوكسقا كەسىرىن تيگىزدى.

ال World Boxing ۇيىمى - جاڭا ۇيىم. جاڭا بولسا دا امبيتسيالارى ۇلكەن. 2028 -جىلى لوس-اندجەلەستە وتەتىن وليمپيادا ويىندارىندا بوكس تۋرنيرىن وتكىزۋگە مۇددەلى ەكەندەرىن جاسىرمايدى. ۇيىمنىڭ وليمپيادالىق كوميسسياسىنىڭ ءتوراعاسى رەتىندە گەننادي گولوۆكين تاڭدالدى. بوكس الەمىندە ابىرويى بار ادامنىڭ تاعايىندالۋى بۇل ۇيىمنىڭ تۇپكى ماقساتىنا جەتپەي قويمايتىنىن كورسەتەدى. دەگەنمەن كەلەشەگى ۋاقىت ەنشىسىندە.

فوتو: ايدوس رىمقۇلدىڭ جەكە مۇراعاتىنان

- بيىل قازاقستاندىق بوكسشىلار WB جانە IBA ۇيىمداستىرعان جاستار اراسىنداعى ەكى الەم چەمپيوناتىنا دا قاتىستى. ءتىپتى، وتكىزىلگەن كەزەڭدەرى سايكەس. وسى تۇستا «قازاقستان نەگە بىرەۋىنە تۇراقتامادى؟» دەگەن ساۋال تۋىندايدى. الدە تولىققاندى شەشىم قابىلداۋعا كەدەرگى فاكتورلار بار ما؟

- ءبىر ۇيىمنان ەكىنشى ۇيىمعا اۋىسۋ وڭاي پروتسەسس ەمەس. سپورتشىلاردىڭ 2024 -جىلعى ءار جارىسقا قاتىساتىن كەستەسى 2023 -جىلدىڭ اياعى مەن 2024 -جىلدىڭ باسىندا سپورت مينيسترلىگىنىڭ رەسمي كۇنتىزبەسىنە ەنگىزىلىپ، ۆەدومستۆو تاراپىنان بەكىتىلەدى. وعان ساي ءار جارىستىڭ جول شىعىندارىنا قاراجات بولىنەدى. نەگىزى قازاقستان IBA ۇيىمداستىرعان بۋدۆاداعى تۋرنيرگە باسىمدىق بەرگەنى انىق كورىندى، 25 بوكسشىمىز باردى. ال WB ۇيىمداستىرعان ا ق ش-تا وتكەن تۋرنيرگە قاتىسۋ تەز ارادا قابىلدانعان شەشىم سەكىلدى. ويتكەنى ەلىمىز بار-جوعى 4 بوكسشى اپاردى.

- IBA- نىڭ كۇماندى شەشىمدەرىن تالقىلاپ بىتپەي جاتىپ، بىلتىر عانا قۇرىلعان WB ۇيىمىنىڭ تورەشىلەرى دە جارىستارىندا ادىلەتسىز شەشىمدەرگە بارىپ جاتقانىن ايتىپ ءجۇرسىز. جالپى، بوكس سپورت رەتىندە تەك ناتيجەلەردى نەگىزسىز بۇرمالاۋعا اۋىپ كەتكەن جوق پا؟

- بوكستاعى باعالاۋ جۇيەسىن تۇبەگەيلى وزگەرتپەيىنشە، قاي ۇيىم بولسا دا ادىلەتتى جارىس وتكىزەدى دەگەنگە سەنۋ قيىن. ماسەلەن، مەن 5-0 جۇيەسىنە كوشىرگەندى قۇپ كورەر ەدىم. بوكستا ادامي فاكتوردىڭ ىقپالى قاتتى، اعىلشىندار ءبىر-بىرىنە جاقتاسسا، مىنا جاقتا تۇركى ەلدەرى ءبىر-ءبىرىن قولداپ جاتاتىنى داۋسىز. سول سياقتى ءارتۇرلى توپقا بىرلەسكەن ەلدەردىڭ تورەشىلەرى وزىنە جاقىن ەلدىڭ سپورتشىسىنا بۇيرەگى بۇرادى. سوندىقتان بوكستاعى باعالاۋ جۇيەسىنە تۇبەگەيلى رەفورما جاسالمايىنشا، 100 پايىز ادىلدىك تۋرالى ايتۋ ابەستىك بولادى.

- 2028 -جىلى لوس-اندجەلەستە وتەتىن وليمپيادا ويىندارىندا بوكس باعدارلاماسى بولماۋى مۇمكىن. حالىقارالىق وليمپيادا كوميتەتى WB ۇيىمىنا بوكس تۋرنيرىن وتكىزۋگە مۇمكىندىك بەرەدى دەپ ويلايسىز با؟

- وتانداسىمىز ءارى جاڭا ۇيىمنىڭ وليمپيادالىق كوميسسياسىنىڭ ءتوراعاسى رەتىندە گەننادي گولوۆكيندى جوعارى باعالايمىن، ءار قادامىن ويلاپ باساتىن سپورت فۋنكتسيونەرى سانايمىن. مەنىڭ ويىمشا، ەگەر WB-دىڭ بولاشاعى جوق بولسا، جەرلەسىمىز ۇيىمنىڭ وليمپيادا كوميسسياسىن باسقارۋعا كەلىسپەس ەدى. دەمەك، كەلەسى وليمپيادادا بوكس تۋرنيرىن وتكىزۋگە WB-دىڭ مۇمكىندىگى جوعارى بولعانى ءۇشىن ىسكە بىلەك سىبانا كىرىسىپ كەتتى. ماقساتىنا جەتسە يگى. قالاي العاندا دا، جاڭا ۇيىم بوكسشىلارىمىزدىڭ ساعىن سىندىرماي، «قازاقستان - بوكس دەرجيەۆاسى» دەگەن ابىرويىمىزدى قايتارۋ جولىندا كەدەرگى جاسامايدى دەپ سەنەمىن.

- اڭگىمەڭىزگە راقمەت!

اۆتور
ماديار تولەۋوۆ