بوكس: باس باپكەر وليمپياداعا قالاي دايىندالىپ جاتقانىن ايتتى

استانا. KAZINFORM - بوكستان قازاقستان ۇلتتىق قۇراماسى وليمپيادا ويىندارىنا تۇركىستان وبلىسىنداعى «الما تاۋ» بازاسىندا وزبەكستان، كۋبا، قىرعىزستان، تاجىكستان جانە تۇركىمەنستان ەلدەرىمەن بىرلەسكەن وقۋ-جاتتىعۋ جيىنىن وتكىزىپ جاتىر.

بۇل تۋرالى KAZINFORM تىلشىسىنە بوكستان ۇلتتىق قۇرامانىڭ باس باپكەرى مىرزاعالي ايتجانوۆ ايتىپ بەردى.

«ءبىز بۇگىنگى تاڭدا تۇركىستان وبلىسىنداعى «الما تاۋ» بازاسىندا وزگە ەل بوكسشىلارىمەن بىرىككەن وقۋ-جاتتىعۋ جيىندارىن وتكىزىپ جاتىرمىز. قاتارىمىزدا وليمپياداعا جولداما جەڭىپ العانى دا، جولداماعا ەندى تالاساتىنى دا بار. وزگە ەلدەردەن وزبەكستان، كۋبا، قىرعىزستان، تاجىكستان جانە تۇركىمەنستان بوكسشىلارى كەلدى»، - دەدى باس باپكەر ايتجانوۆ.

ايتجانوۆ وليمپيادا ويىندارىنىڭ قارساڭىندا وسىنداي بىرىككەن وقۋ-جاتتىعۋ جيىنادارىن كوپتەپ وتكىزۋ بوكسشىلاردىڭ تاجىريبەسىن جەتىلدىرۋگە، شەبەرلىكتەرىن شىڭداۋعا ۇلكەن سەپتىگىن تيگىزەتىنىن اتاپ ءوتتى.

«ءبىزدىڭ وقۋ جيىنىمىزعا تاجىكستاننان 92 كەلى سالماقتا وليمپياداعا ليسەنزيا جەڭىپ العان بوكسشى ارنايى كەلدى. تۇركىمەن مەن قىرعىزدىڭ ەندى ليسەنزياعا تالاساتىن بوكسشىلارى كەلدى. وزبەكستان مەن كۋبادان وليمپيادا جولداماسىن جەڭىپ العان ءتورت-تورتتەن 8 بوكسشى كەلسە، يزرايلدان ءبىر بوكسشى ارنايى ليسەنزيالىق تۋرنيرگە دايىندالۋ ءۇشىن ءبىزدىڭ ەلدى تاڭداپتى. بۇل ءبىزدىڭ بوكسشىلارعا ۇلكەن دەمەۋ بولارى انىق. سەبەبى، وزگە بوكسشىلارمەن سپارنيگ كەزدەسۋلەر وتكىزۋ ءبىزدىڭ بىلعارى قولعاپ شەبەرلەرىنىڭ مۇمكىندىگىن شىڭداۋعا، تاجىريبەلەرىن جەتىلدىرۋگە ۇلكەن سەپتىگىن تيگىزەدى. بىرلەسكەن جاتتىعۋ جيىنى 21-ساۋىرگە دەيىن جالعاسادى»، - دەدى مىرزاعالي ايتجانوۆ.

ەستەرىڭىزگە سالا كەتسەك، بوكستان ەرلەر قۇراماسى پاريج وليمپياداسىنا 6 جولداما جەڭىپ العان.

ەندى تايلاندتاعى سوڭعى ليسەنزيالىق جارىسقا مۇحاممەدسابىر بازارباي ۇلى بارادى.

اۆتور كۇنسۇلتان وتارباي