بوكس: پاريج وليمپياداسىنان كەيىن قانداي قورىتىندى جاسالدى

استانا. KAZINFORM - ق ر تۋريزم جانە سپورت ۆيتسە- ءمينيسترى سەرىك جاراسبايەۆ لوس-اندجەلەستەگى الداعى وليمپيادا ويىندارىنا بوكستان ەلىمىزدىڭ قۇراماسى قالاي دايىندالىپ جاتقانى تۋرالى تۇسىنىك بەردى.

- قازاقستان بوكسىنىڭ جاعدايى ەلىمىزدە ءجيى تالقىلاناتىنى بەلگىلى. دەگەنمەن، ءبىزدىڭ سپورتشىلار الەمدىك ارەنادا ءوزىنىڭ باسەكەگە قابىلەتتى ەكەنىن دالەلدەپ كەلەدى. بۇعان دالەل رەتىندە جاقىندا وتكەن الەم چەمپيوناتتارىندا جاقسى ورىنداردان كورىنگەنىن ايتۋعا بولادى. راسىندا دا، پاريجدە وتكەن سوڭعى وليمپيادا ويىندارىندا ءساتتى ونەر كورسەتكەن جوق. سول كەزدە ءبىرقاتار تۇسىنىكتەمە بەرىلدى. وسى وليمپيادا ويىندارىنىڭ قورىتىندىسى بويىنشا ءبىز ءبىرقاتار كادرلىق وزگەرىستەر جاسادىق. اتاپ ايتقاندا، فەدەراتسيانى جاس ءارى بولاشاعى زور باسشى باسقارۋعا كىرىستى. قازىر ول بۇل سالادا ءوزىن جاقسى كورسەتىپ وتىر. مەنىڭ ويىمشا، بارلىق وسى لاۋازىمدار مەن باس باپكەردىڭ جاڭارۋىن جانە بۇعان دەيىنگى قاتەلىكتەردى ەسكەرە وتىرىپ، ءبىز لوس-اندجەلەستەگى ويىندارعا جاڭا فورماتتا دايىندالىپ جاتىرمىز. بۇل جارىسقا ءۇش جىل عانا ۋاقىت قالدى، - دەدى س. جاراسبايەۆ سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بوكستان ەلىمىزدىڭ قۇراماسى تولىقتاي جاساقتالعان.

بۇدان بۇرىن حابارلانعانداي، گرەكيانىڭ كوستا- ناۆارينو قالاسىندا وتكەن حالىقارالىق وليمپيادالىق كوميتەتىنىڭ (ح و ك) 144- سەسسياسىندا 2028 -جىلى لوس-اندجەلەستە وتەتىن وليمپيادا ويىندارىنىڭ باعدارلاماسىنا بوكستى قوسۋ تۋرالى شەشىم قابىلداندى.