بەس مىڭنان استام ازامات جاڭا ۇلگىدەگى قورعانىس ەلەمەنتتەرى بار پاسپورتتى الدى

استانا. KAZINFORM - اباي وبلىسىندا 5 مىڭنان استام ازامات جاڭا ۇلگىدەگى پاسپورت الدى. بۇل تۋرالى ءى ءى م باسپا ءسوز قىزمەتى حابارلادى.

2025 -جىلدىڭ شىلدە ايىنىڭ ورتاسىنان باستاپ ەل ازاماتتارى جاڭا قورعانىس ەلەمەنتتەرىمەن جابدىقتالعان پاسپورتتاردى الا باستادى.

بۇل وزگەرىس ازاماتتاردىڭ جەكە دەرەكتەرىن قورعاۋ دەڭگەيىن ارتتىرۋ، قۇجاتتاردى قولدان جاساۋدان ساقتاۋ ماقساتىندا ەنگىزىلدى. «جەكە باستى كۋالاندىراتىن قۇجاتتار تۋرالى» زاڭىنىڭ 26-بابىنا سايكەس، ىشكى ىستەر مينيسترلىگى ازاماتتاردىڭ پاسپورتتارى مەن ازاماتتىعى جوق ادامنىڭ كۋالىگىن قورعاۋعا قويىلاتىن تالاپتاردى جەتىلدىرۋ بويىنشا جۇمىس جۇرگىزىپ، جاڭا قورعانىش ەلەمەنتتەرىن ەنگىزۋدى پىسىقتادى.

سونىڭ ناتيجەسىندە، قازاقستان ازاماتىنىڭ پاسپورتى مەن ازاماتتىعى جوق ادامنىڭ كۋالىگىنىڭ 2-بەتىنە قورعانىش گولوگرافيالىق پلەنكاعا سالىنعان بارىس بەينەسى بار HDM- ەلەمەنتى (جوعارى اجىراتىمدىلىق مەتالداندىرۋ ەلەمەنتى) ورنالاستىرىلادى. HDM - زاماناۋي تەحنولوگياعا نەگىزدەلگەن، قۇجاتتاردىڭ قولدان جاسالۋىنان قورعاۋ دەڭگەيىن ايتارلىقتاي كۇشەيتەتىن شەشىم.

بۇل ەلەمەنت ۆيزۋالدى تۇرعىدا تانىمال ءارى تانۋعا وڭاي، سول ارقىلى قۇجاتتىڭ ءتۇپنۇسقالىعىن جىلدام انىقتاۋعا مۇمكىندىك بەرەدى.

اتالعان وزگەرىس ۇلتتىق قاۋىپسىزدىككە اسەر ەتپەيدى، سونداي-اق تەرىس الەۋمەتتىك- ەكونوميكالىق نەمەسە قۇقىقتىق سالدارعا اكەپ سوقپايدى. جارامدىلىق مەرزىمى ءالى بىتپەگەن قۇجاتتار ءوز كۇشىندە قالا بەرەدى جانە ولاردى اۋىستىرۋ مىندەتتى ەمەس.

جاڭا قورعانىس ەلەمەنتى بار پاسپورتتار كەلەسى جاعدايلاردا بەرىلەدى: پاسپورتتىڭ مەرزىمى اياقتالعان كەزدە، قۇجات جارامسىز بولىپ قالعان جاعدايدا نەمەسە ازامات ءوز ەركىمەن اۋىستىرۋ تۋرالى ءوتىنىش بەرگەندە.

وسى جىلدىڭ شىلدە ايىنىڭ ورتاسىنان بەرى 5 مىڭنان استام ازامات جاڭا ۇلگىدەگى پاسپورت العان. بۇل - حالىقتىڭ جەكە مالىمەتتەر قاۋىپسىزدىگىنە دەگەن قىزىعۋشىلىعىنىڭ ارتقانىن جانە جاڭارتىلعان قۇجات ۇلگىسىنە سەنىمنىڭ جوعارى ەكەنىن كورسەتەدى. قوسىمشا اقپارات پەن كەڭەس الۋ ءۇشىن ازاماتتار جەرگىلىكتى كوشى-قون قىزمەتىنە نەمەسە حالىققا قىزمەت كورسەتۋ ورتالىقتارىنا جۇگىنە الادى.

ايتا كەتەلىك قازاقستان پاسپورتى الەمدىك رەيتينگتە 61-ورىنعا كوتەرىلگەن ەدى.