بەس ميلليون مال «قاعازدا» عانا بولعان - پرەزيدەنت جولداۋى

استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا اگروونەركاسىپ كەشەنىن مەملەكەتتەن قولداۋدىڭ جاڭا باعدارى تۋرالى تاپسىرمالار بەردى.

«اگروونەركاسىپ كەشەنىن تىكەلەي سۋبسيديالاۋ تاسىلىنەن ارزان نەسيە بەرۋ تاسىلىنە بىرتىندەپ كوشۋ - اسا ماڭىزدى مىندەت. بولىنگەن قاراجاتتىڭ ءبارى ءتيىمدى جۇمسالۋعا ءتيىس. الايدا شىندىققا جاناسپايتىن اقپارات بەرۋ، باسقاشا ايتقاندا، مالىمەتتەردى بۇرمالاۋ اۋىل شارۋاشىلىعىنداعى شىنايى احۋالدى باعالاۋعا كەدەرگى كەلتىرىپ وتىر.

ارنايى كوميسسيا 2 ميلليون ءىرى قارا جانە 3 ميلليوننان استام ۇساق مال ساندا بار، ساناتتا جوق ەكەنىن انىقتادى. ەگىن شارۋاشىلىعى سالاسىندا دا وسىنداي جايتتار بار ەكەنى بەلگىلى بولدى. شىن مانىندە، مۇنىڭ ءبارى - مەملەكەتتەن سۋبسيديا الۋ ءۇشىن جاسالعان كوزبوياۋشىلىق. ونداي قىلمىستىق ارەكەتتەرگە توسقاۋىل قويۋ قاجەت. ال مۇنداي ىسپەن اينالىسقان ادامداردى جاۋاپكەرشىلىككە تارتۋ كەرەك»، - دەدى مەملەكەت باسشىسى.

پرەزيدەنت جولداۋىندا جەر تەلىمدەرىن قايتارۋ جونىندەگى ارنايى كوميسسيانىڭ جۇمىسىنا دا توقتالدى.

«بۇل ماسەلە قاتىستى ەكىۇشتى ۇستانىم بولماۋى قاجەت. زاڭسىز الىنىپ، پايدالانىلماي جاتقان جەر وڭتايلاندىرىلعان ءراسىم بويىنشا مەملەكەتكە قايتارىلۋعا ءتيىس. ال جەردى پايدالانۋشى وعان ينۆەستيسيا سالىپ، ادال ەڭبەك ەتىپ جاتسا، جۇمىسقا بوگەت جاساماۋ كەرەك. سونداي-اق ونىڭ اۋىلدى كوركەيتىپ، تۇرعىندارعا تۇراقتى جۇمىس بەرىپ وتىرعانىن دا ەسكەرگەن ءجون»، - دەدى قاسىم-جومارت توقايەۆ.

اۆتور
ەسىمجان ناقتىباي