بريتانياعا زاڭسىز بارۋ لاڭكەستىكپەن تەڭەستىرىلەدى

استانا. قازاقپارات - ەۋروپادا ەڭ قاتال ەرەجە بريتانيادا. ەلدە زاڭسىز كوشى-قونمەن اينالىسۋ لاڭكەستىكپەن تەڭەستىرىلەدى. بۇل تۋرالى بىرىككەن كورولدىك پاتشاسى كارل Ⅲ پارلامەنت سەسسياسىندا مالىمدەدى.

جاڭا زاڭ جاقىندا ۇسىنىلماق. بريتانيانىڭ ەۋرووداق قۇرامىنان شىعۋىنىڭ ءبىر ۇلكەن سەبەبى دە وسى زاڭسىز ەڭبەك ميگرانتتار ءنوپىرى بولاتىن. ءبىراق «كارى قۇرلىق» بىرلەستىگىنەن ىرگەسىن اۋلاق سالعانىمەن، شەكارا ورتاق. بىلتىر ەۋرووداق شەكاراسىنان 1 ميلليون 200 مىڭ ادام زاڭسىز وتكەن. ماماندار بۇل كەيىنگى 10 جىلداعى رەكوردتى كورسەتكىش دەيدى.

دەۆيد لەممي، ۇلى بريتانيا سىرتقى ىستەر ءمينيسترى:

«ءبىز قايتسەك تە بريتانياعا زاڭسىز جۇمىسقا اكەلەتىن قىلمىستىق توپتاردى اشكەرەلەپ، ءتۇپ-تامىرىمەن جويۋىمىز كەرەك. مۇنى ەۋروپاداعى ەڭ جاقىن كورشى ەلدەرمەن بىرىگىپ قانا ىسكە اسىرا الامىز. الاياقتارعا الداناتىن زاڭسىز ەڭبەك ميگرانتتارىنىڭ كوبى بىزگە فرانسيا، گەرمانيا سياقتى ەۋروپالىق مەملەكەتتەر ارقىلى كەلەدى. ادامداردى زاڭسىز جەتكىزەتىن جولدار كوپ. سولاردىڭ ءبارىن قۇرتۋىمىز قاجەت».

ەڭبەك ميگرانتتارى الەۋمەتتىك جەلىدەگى اقپاراتقا الدانادى ەۋرووداقتا زاڭسىز كوشى-قونمەن كۇرەسۋ بويىنشا داۋ كوپ. بىرلەستىككە مۇشە 15 ەل كەلىمسەكتەردى قابىلداي بەرمەي، ەلىنە بىردەن قايتارۋ تۋرالى زاڭ قابىلداۋدى تالاپ ەتىپ كەلەدى. ءبىراق ءالى كۇنگە دەيىن ورتاق كەلىسىم جوق. ەۋروپالىق ساراپشىلار جۇمىس ىزدەگەن ادامدار كوپ جاعدايدا الەۋمەتتىك جەلى ارقىلى كەلگەن حابارلاندىرۋلارعا سەنىپ، شەتەل اسۋعا بەل بۋادى دەيدى.

حالىقارالىق «ينتەرنەت قىلمىسىنا قاتىستى ارىز- شاعىم ورتالىعىنا» WhatsApp جەلىسىن پايدالانعان الاياقتىق تۋرالى جارتى مىڭنان استام ارىز تۇسكەن. شاعىمدانۋشىلار اراسىندا 60-تان اسا ەلدىڭ ازاماتتارى بار.

ەلۆيسس سترازدينس، سيفرلىق قاۋىپسىزدىك ورتالىعىنىڭ باسشىسى:

«ءتۇرلى ينتەرنەت سايتتارى مەن الەۋمەتتىك جەلىلەر باسقا ەلدىڭ ادامدارىن وزدەرى مۇلدە بىلمەيتىن، بولماعان سىرت جەرگە بارىپ زاڭسىز جۇمىس ىستەۋگە شاقىرادى. ءبىر قىزىعى، مۇنى ول كىسىلەردىڭ ءوزى وتە جاقسى بىلەدى. ءبىراق سوندا دا الدانىپ، قارماققا ءتۇسىپ، ماڭدايى تاسقا تيگەننەن كەيىن عانا بارماعىن شايناپ، وپىق جەيدى».

گەرمانياعا 330 مىڭنان استام زاڭسىز ميگرانت كەلگەن

گەرمانيا قاتاڭ شارالار قابىلدادى. بىلتىر ەل اۋماعىنا 330 مىڭنان استام زاڭسىز ميگرانت كىرىپ، ماسىل بوسقىنعا اينالعان. ولاردىڭ اراسىندا سيريا، اۋعانستان، تۇركيا، سەربيا مەن سولتۇستىك ماكەدونيا ازاماتتارى كوپ ەكەن. ولار دا نەمىس جەرىنە اياق باسۋ ءۇشىن حالىقارالىق قىلمىستىق توپتاردىڭ قىزمەتىنە جۇگىنگەن. ءار ەكىنشى ميگرانت پولشا، ءۇشىنشى ميگرانت اۆستريا جاقتان كەلىپتى. گەرمانيا ازىرگە 1100 كەلىمسەكتى سولتۇستىك ماكەدونيا مەن سەربياعا قايتاردى. قازىر گەرمانيادا 3 ميلليون 200 مىڭ بوسقىن ءومىر ءسۇرىپ جاتىر.

«بالەن جەردە التىن بار، بارساڭ باقىر دا جوق». تابىس تابامىن دەپ تاقىرعا وتىرماۋدىڭ ءبىر امالى - ەكى قولعا ءبىر كۇرەكتى ءوز ەلىڭنەن تابۋ. حاكىم اباي «ەسەكتىڭ ارتىن جۋساڭ دا، مال تاپ» دەپ بەكەر ەسكەرتپەسە كەرەك.

24.kz