بريتان پرەمەر- ءمينيسترى: جاساندى ينتەللەكتتىڭ ادامزات باقىلاۋدان شىعۋىنا ءبىر جىل قالدى

استانا. قازاقپارات - جاساندى ينتەللەكتتىڭ ادامزات باقىلاۋىنان شىعاتىن ۋاقىت تاياپ قالدى. بۇل جونىندە ۇلى بريتانيا پرەمەر- ءمينيسترى ريشي سۋناك مالىمدەدى، دەپ حابارلايدى Zakon.kz.

The Telegraph باسىلىمىنىڭ جازۋىنشا، ريشي سۋناك ءوزىنىڭ باستاماسىمەن ۇلى بريتانيادا جاساندى ينتەللەكت ماسەلەلەرىنە ارنالعان سامميت وتەتىنگە از ۋاقىت قالعاندا ەرەكشە مالىمدەمە جاساعان. پرەمەر- مينيستر اقپاراتتىق تەحنولوگيالاردىڭ قارقىندى دامىپ جاتقانىن، تەوريالىق تۇرعىدان ونى تەرروريستتەر دە پايدالانا الاتىنىن ەسكەرتتى. جاساندى ينتەللەكت جۇيەلەرىنىڭ جاڭا بۋىنى شىعارىلعانعا دەيىنگى ءبىر جىل ىشىندە ءوزىن قورعاپ ۇلگەرۋ كەرەك.

بريتان بيلىگى ChatGPT سياقتى قازىرگى بالامالاردان بارلىق جاعىنان جوعارى بولاتىن جاساندى ينتەللەكت جۇيەلەرىنىڭ كەلەسى بۋىنى قارا نيەتتى ادامداردىڭ قولىنا ءتۇسىپ، ادامزاتقا زيان كەلتىرەدى دەپ قورقادى. مىسالى، ۇلى بريتانيا ۇكىمەتى جاساندى ينتەللەكت ادامدارعا بيولوگيالىق قارۋدىڭ جاسالۋ جولى تۋرالى اقپارات بەرۋگە قابىلەتتى ەكەنىن ەسكەرتتى. ەل بيلىگىن ەرەكشە الاڭداتاتىن جايت - جاساندى ينتەللەكتىنى زياندى ماقساتتاردا - تەرروريستىك شابۋىلدار، كيبەرشابۋىلدار جانە ت. ب. ءۇشىن پايدالانۋ مۇمكىندىگى.

قاراشا ايىندا ريشي سۋناكتىڭ باستاماسىمەن ۇلى بريتانيا جاساندى ينتەللەكت پەن سوعان بايلانىستى قاۋىپتەرگە ارنالعان جاھاندىق قاۋىپسىزدىك سامميتىن وتكىزۋدى جوسپارلاپ وتىر. سيەزگە جيىرماعا جۋىق ەلدىڭ وكىلدەرى قاتىسادى. ساميتتە ۇلى بريتانيا پرەمەر- ءمينيسترى جاساندى ينتەللەكت ازىرلەۋشىلەرىنەن ولاردىڭ جاڭا بۋىنىنىڭ ادامزاتقا قاۋىپ توندىرمەيتىنىنە كەپىلدىك بەرۋىن تالاپ ەتۋى مۇمكىن.

ءوز تۋىندىسىنا "اتومدىق قارۋدان كەم" قاراماۋعا كەڭەس بەرگەن كەيبىر ازىرلەۋشىلەر بريتان بيلىگىنىڭ ۇستانىمىمەن كەلىسەدى. جاساندى ينتەللەكت جۇيەلەرىنىڭ كەلەسى بۋىنى قازىرگىدەن ءجۇز ەسە كۇشتى بولۋى مۇمكىن ەكەنىن ەسكەرسەك، بۇل بوس ءسوز ەمەس ەكەنى انىق.

ماسەلەن، ChatGPT- ءتىڭ مۇمكىندىگى كۇننەن- كۇنگە ارتىپ كەلەدى: ەندى ۇيىقتار الدىندا ەرتەگى ايتىپ، داستارحان باسىنداعى داۋ- دامايدى شەشەدى ءارى پايدالانۋشى ەنگىزگەن ءماتىندى داۋىستاپ ايتىپ بەرە الادى.

AstanaTV