بريتان حالقى بيلىككە سەنۋدەن قالدى
لوندون. KAZINFORM - بريتانيالىقتاردىڭ ساياساتكەرلەرگە دەگەن سەنىمى بۇرىن-سوڭدى بولماعان رەكوردتىق تومەن دەڭگەيگە ءتۇسىپ كەتتى. ساراپتاماعا سايكەس، بۇل ەڭ الدىمەن برەكسيتپەن بايلانىستى.
بۇعان ساياسي جانجالدار مەن ءومىر ءسۇرۋ قۇنىنىڭ داعدارىسىن قوسىڭىز. كونسەرۆاتورلار بيلىكتە قالۋ ءۇشىن سايلاۋالدى ۋادەلەرىن ءۇيىپ-توگىپ بەرۋدە. ءبىراق 14 جىل ەل باسقارعان توريلەردەن ەلەكتورات تاعى ءبىر مۇمكىندىك بەرە مە؟
ۇلتتىق الەۋمەتتىك زەرتتەۋلەر ورتالىعىنىڭ ساۋالناما ناتيجەلەرىنە سايكەسسايلاۋشىلاردىڭ باسىم كوپشىلىگى باسقارۋ جۇيەسىنەن جانە بيلىكتەگىلەردەن كوڭىلى قالعانىن ايتادى. ءبارى برەكسيتتەن باستالعان. ەۋرو وداقتان قۇتىلدىق دەپ بورىكتەرىن اسپانعا اتقانداردىڭ قۋانىشتارى ۋاقىت وتە كەلە وكىنىشپەن الماسىپتى.
بريتانيالىقتار، اسىرەسە، قارجىلىق جاعدايىنىڭ ناشارلاعانىنا قىنجىلادى. دۇكەندە ازىق-تۇلىك قىمبات، جىلۋ مەن جارىقتىڭ اقىسى اسپانداپ تۇر. ۇلتتىق دەنساۋلىق ساقتاۋ قىزمەتىنىڭ دە جاعدايى ءماز ەمەس. ۇزىن-سونار كەزەك، دارىگەرلەردىڭ جەتىسپەۋشىلىگى قاراشا حالىقتىڭ جانىنا قاتتى باتقان.
«سوزدەرى مەن ىستەرى ەش ۇيلەسپەيدى. انت-سۋ ءىشىپ، ۋادەنى ءۇيىپ-توگىپ بەرەدى، ءبىراق بيلىككە كەلگەننەن كەيىن ەشتەڭە ىستەمەيدى. جانە وسى ارەكەتتەرى قايتالانا بەرەدى»، - دەيدى لوندون تۇرعىندارىنىڭ ءبىرى.
سايلاۋشىلاردىڭ كەيبىرى، ءتىپتى، داۋىس بەرۋگە بارمايتىندارىن ايتادى. ويتكەنى ەسەگى سۋدان وتكەننەن كەيىن پارتيالار ءىس ءبىتتى، قۋ كەتتىگە سالادى دەگەن ويدا.
«وكىنىشكە قاراي، ۇلتتىق دەنساۋلىق ساقتاۋ قىزمەتىنىڭ جاعدايى مۇشكىل، پوليتسيا قىزمەتكەرلەرىنىڭ سانى ازايىپ جاتىر. مەريالار قارىزعا بەلشەسىنەن باتتى. ءبىر بۇيىردەن قىمباتشىلىق قىستى. ماسەلەنى شەشىپ جاتقان ەشكىم جوق»، - دەيدى دەپ ناليدى تاعى ءبىر كوشە جۇرگىنشىسى.
دەگەنمەن دە، كونسەرۆاتورلاردىڭ قارقىنى قاتتى. پارتيا كوشباسشىسى سۇحباتتارىنىڭ بىرىندە بالا كەزىندە كوپ نارسەدەن قالىس قالعانىن ايتىپ، اعىنان اقتارىلدى — ريشي سۋناك اقىلى كابەلدىك تەلەارنا كورمەي وسكەن ەكەن. ونىڭ بۇل ەستەلىگى كەدەيشىلىكتىڭ قامىتىن كيگەن بريتانيالىقتاردىڭ اشۋ- ىزاسىن تۋعىزدى. 2-چارلز پاتشادان دا اۋقاتتى، ۇلىبريتانيا تاريحىنداعى ەڭ باي پرەمەر- مينيستر قاراشا حالىقتىڭ مۇڭ-مۇقتاجىنان حاباردارسىز با دەگەن وي كەلدى.
«بالا كۇنىمىزدە كوپ نارسەدەن قالىس قالدىق. ويتكەنى مەنىڭ اتا-انالارىم اقشانى بىلىمىمىزگە قۇيدى. ماسەلەن، ءبىزدىڭ ۇيىمىزدە Sky TV بولمادى»، - دەدى ۇلى بريتانيانىڭ پرەمەر-ءمينيسترى ريشي سۋناك.
ءومىر ءسۇرۋ قۇنى قىمباتتاعاندىقتان ايلىعىن شايلىعىنا جەتكىزە الماي جۇرگەندەر كوپ. ءبىراق وعان كونسەرۆاتورلار وزدەرىن كىنالى سانامايدى. پرەمەردىڭ پىكىرىنشە، بيلىكتە وتىرعان سوڭعى 14 جىلدىڭ ىشىندە پارتيا ءبىراز بەلەستەردى باعىندىرعان. ءبىراق سايلاۋشىلار سۋناكتىڭ سوزىنە سەنۋدەن قالدى. سوڭعى جۇرگىزىلگەن ساۋالناماعا سايكەس ولار رەفورماتورلاردى قولدايتىندىقتارىن ايتقان. نايدجەل فارادج باسقاراتىن پارتيا لەيبوريستەردەن كەيىن ەكىنشى ورىندا كەلەدى.
«ەگەر ءسىز ماعان پارلامەنت مۇشەسى بولۋ مارتەبەسىن بەرسەڭىز، مەن حالىق مۇددەسى ءۇشىن كۇرەسەمىن. مەن رەتتەۋشى ورگاندارعا قارسى شىعىپ، شاعىن بيزنەسكە جاقتاسامىن. مەن حالىقتىڭ قۇقىقتارى ءۇشىن كۇرەسەمىن»، - دەدى رەفورمالار پارتياسىنىڭ كوشباسشىسى نايدجەل فارادج.
كەزىندە برەكسيتتى قولداپ، ەلدىڭ ەۋرو وداق قۇرامىنان شىعۋىنا اتسالىسقان ساياساتكەردى دە سۇيكىمسىز سانايتىندار كوپ. سايلاۋالدى ناۋقان كەزىندە ۇگىت-ناسيحاتپەن اينالىسىپ جۇرگەن فارادجدىڭ بەتىنە سۇتتەن جاسالعان كوكتەيل دە شاشىلدى، كونسەرۆ قۇتىسى دا لاقتىرىلدى.
«كوۆيد كەزىندەگى داۋنينگ ستريتتە ويىن-ساۋىق قۇرعان بوريس دجونسون وتستاۆكاعا كەتتى. ودان كەيىن پرەمەرلىككە ليز تراسس كەلىپ، قىسقا مەرزىمدە ەلدىڭ استان- كەستەڭىن شىعاردى. ونى اۋىستىرعان ريشي سۋناكتىڭ دا ساياساتى ءساتتى جۇزەگە اسپادى. كونسەرۆاتورلاردىڭ بيلىكپەن قوشتاساتىن ۋاقىتى كەلگەن سياقتى. وعان ساۋالنامالاردىڭ ناتيجەسى دالەل»، — دەيدى سايلاۋ ساراپشىسى دجون كەرتيس.
كونسەرۆاتور، لەيبوريست جانە رەفورماشىلاردان بولەك ليبەر- دەموكراتتار دا الامانعا ءتۇسىپ جاتىر. كوپ داۋىس جيناعان پارتيا جەڭىمپاز اتانىپ، ءوزىنىڭ ۇكىمەتىن جاساقتايدى جانە كوشباسشىسى پرەمەر- مينيستر اتانادى. 4-شىلدە كۇنى سايلاۋ ناتيجەلەرى بەلگىلى بولماق.