بريۋسسەلدە العاش رەت ورتالىق ازيا-ەۋروپا شىعارماشىلىق فورۋمى ءوتىپ جاتىر

استانا. KAZINFORM - وسى اپتادا ەۋروپا استاناسىندا ورتالىق ازيانىڭ بەس ەلىنەن كەلگەن ءبىرقاتار ديزاينەرلەر مەن شىعارماشىلىق تۇلعالاردىڭ باستاماسىمەن ورتالىق ازيا -ەۋروپا شىعارماشىلىق فورۋمى باستالدى.

بۇل تۋرالى بريۋسسەلدەن Kazinform مەنشىكتى ءتىلشىسى ارنۇر راحىمبەكوۆ حابارلايدى.

وسى باستاما اياسىندا قازاقستاندىق زەرگەرلەردىڭ «الماتى زەرگەرلىك اپتالىعى» جوباسى تانىستىرىلىپ جاتىر.

بريۋسسەلگە ورتالىق ازيانىڭ بارلىق رەسپۋبليكالارىنان، ونىڭ ىشىندە قازاقستاننان 12 ديزاينەر كەلىپ، ءوز جۇمىستارى مەن جوبالارىن ەۋروپالىق سىرتقى ءىس- قيمىل قىزمەتىندە (ە و ديپلوماتيالىق ورگانى)، سونداي-اق بەلگياداعى تۇرىكمەنستان ەلشىلىگىندە ۇسىندى.

الداعا كۇندەرى كورمە ەۋروپالىق پارلامەنتتە، بريۋسسەل مەن انتۆەرپەن قالالارىنىڭ مۇراجايلارىندا وتەدى.

ورتالىق ازيا -ەۋروپا كرەاتيۆتى فورۋمىنىڭ باستاماشىسى ەلەنا ۆان حاريتونوۆا ءىس-شارانى ۇيىمداستىرۋ جۇمىستارىمەن بىرنەشە اي بويى اينالىسقانىن ايتادى.

- بەس كۇن ىشىندە قاتىسۋشىلار مادەني ديپلوماتيا جانە حالىقارالىق مادەني بايلانىستار الەمىنە ەنىپ، ءبىرتۇتاس شىعارماشىلىق ايماق رەتىندە ورتالىق ازياعا ەرەكشە نازار اۋدارادى. قاتىسۋشىلارىمىز ە و سىرتقى ساياساتىنىڭ نەگىزگى اسپەكتىلەرىمەن جانە ەۋروپارلامەنتتىڭ ايماققا دەگەن كوزقاراسىمەن تانىسۋعا مۇمكىندىك الادى. مادەني ديپلوماتيا - جۇرەكتەر مەن ويلاردى جاۋلاۋ، حالىقارالىق مادەني قارىم-قاتىناستار - ءوزارا ىنتىماقتاستىق پەن مۇددەلەرگە نەگىزدەلگەن بىرلەسكەن ءىس- ارەكەتتەر مەن سىندارلى ىنتىماقتاستىق. ءبىزدىڭ فورۋمدا ءبىز پراكتيكالىق جاعدايلار مەن داعدىلاردى پايدالانا وتىرىپ، كەلىسسوزدەر جۇرگىزۋدى، قازىرگى جىلدام وزگەرەتىن الەمدە ستراتەگيالىق بايلانىستاردى قۇرۋدى ۇيرەنەمىز. ءوز ەلدەرى مەن مادەنيەتتەرىنىڭ جاۋاپتى ەلشىلەرى سانالاتىن شىعارماشىلىق ماماندار ءۇشىن ديپلوماتيالىق داعدىلار وتە ماڭىزدى،- دەيدى ەلەنا ۆان حاريتونوۆا.

ەۋرووداق استاناسىنا قازاقستاننان الماتىلىق سۋرەتشى-زەرگەر نۇردوس ءالياسقاروۆ باردى.

— بۇگىن بريۋسسەل قالاسىندا وتكەن شارالارعا قازاقستان، قىرعىزستان، تۇركىمەنستان، وزبەكستان سياقتى ەلدەردىڭ وكىلدەرى قاتىستى. بۇل - ەۋروپالىق وداق عيماراتىنداعى وسىنداي فورماتتاعى العاشقى فورۋم ەكەنىن ايتقىم كەلەدى. ءبىز وسىنداي فورۋم بولاشاقتا جىل سايىن وتكىزىلەتىندەي دەڭگەيگە جەتكەنىن قالايمىز. مۇندا شىعارماشىلىق ادامدار اراسىنداعى "مادەني ديپلوماتيا" سياقتى شىعارماشىلىق ساتتەر تالقىلانادى، وعان ساياساتقا قاتىسى جوق جانە تەك شىعارماشىلىقپەن اينالىساتىن ءوز ءىسىنىڭ شەبەرلەرى، سۋرەتشىلەر، زەرگەرلەر قاتىسىپ، باس قوسادى. كەرەمەت مادەني الماسۋ ءجۇرىپ جاتىر جانە وسىعان بايلانىستى بۇگىن ەۋرووداقتىڭ جۇرەگىندە "Almaty Jewelry Week" جوباسى تانىستىرىلعانىن اتاپ وتكىم كەلەدى. بۇل پلاتفورما دامىپ، جاڭا قاتىسۋشىلاردى تارتادى جانە وسىلايشا ءبىز ونەر ارقىلى ۇلكەن وداق قۇرامىز. بۇل حالىقارالىق جوبا بولادى. مۇنداي مادەنيەتتى كەلەسى ۇرپاققا، ياعني جاستارعا قالدىرۋ ءۇشىن وسى فورۋمنىڭ جۇمىسىن دامىتۋ قاجەت، - دەدى نۇردوس ءالياسقاروۆ.

اۆتور

ەركەجان سماعۇلوۆا