بۇرىنعى جۇيەدەن نەمەسە ساياسي تۇلعالاردان كىنا ىزدەي بەرۋگە بولمايدى - پرەزيدەنت

استانا. KAZINFORM - ەلىمىزدىڭ بەيبىت ءومىر سۇرۋىنە جانە تۇراقتى دامۋىنا قولايلى سىرتقى جاعداي قالىپتاستىرۋىمىز قاجەت. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ جاتقان مەملەكەت باسشىسى قاسىم-جومارت توقايەۆ ايتتى.

«ىلعي دا كەيىن قايىرىلىپ، وتكەنمەن ءومىر سۇرۋگە، بۇرىنعى جۇيەدەن نەمەسە ساياسي تۇلعالاردان كىنا ىزدەي بەرۋگە بولمايدى. ءوز حالقىڭنىڭ تاريحىن ءبىلۋ كەرەك، ءبىراق ودان تەك ەڭسەڭدى ءتۇسىرىپ، وزگەگە وكپە ارتۋعا سەبەپ ىزدەمەۋ قاجەت. قانداي قاسىرەتتى بولسا دا، وتكەن وقيعالاردان، ەڭ الدىمەن، تاعىلىم الا بىلگەن ءجون. ءبىز كەلەشەككە سەنىممەن كوز تىگىپ، ەلىمىزدىڭ ءوسىپ-وركەندەۋى مەن دامۋىن ويلاۋىمىز قاجەت. مەن بۇل تۋرالى ۇنەمى ايتىپ كەلەمىن»، - دەدى قاسىم- جومارت توقايەۆ.

وسى رەتتە پرەزيدەنت قوعامىمىزدا زاڭ مەن ءتارتىپ ۇستەمدىك قۇرۋعا تيىستىگىن تاعى دا باسا ايتتى.

«بۇل - بۇكىل قوعامنىڭ جانە ءار ادامنىڭ قاۋىپسىزدىگىن قامتاماسىز ەتۋگە قاتىستى ەڭ باستى تالاپ. ءبىز سوندا عانا ادىلەتتى، تازا جانە قاۋىپسىز قازاقستاندى قۇرا الامىز. وسى ستراتەگيالىق ماقساتىمىزعا جەتۋ ءۇشىن ەلىمىزدىڭ بەيبىت ءومىر سۇرۋىنە جانە تۇراقتى دامۋىنا قولايلى سىرتقى جاعداي قالىپتاستىرۋىمىز قاجەت. بۇل - قازىرگى اسا كۇردەلى گەوساياسي احۋال كەزىندە وتە جوعارى كاسىبيلىكتى تالاپ ەتەتىن ديپلوماتيانىڭ مىندەتى»، - دەدى مەملەكەت باسشىسى.

اۆتور

مارلان جيەمباي