بۇرىن قازاقستاندىقتار رەسەيگە ءبىلىم ىزدەپ بارسا، قازىر كەرىسىنشە - ساياسات نۇربەك
الماتى. KAZINFORM - الماتىدا جوعارى ءبىلىم بەرۋ ماسەلەلەرىنە ارنالعان QS Higher Education: Asia Pacific 2024 پرە-ءسامميتى ءوتتى. وندا عىلىم جانە جوعارى ءبىلىم ءمينيسترى ساياسات نۇربەك ەلىمىزدەگى حالىقارالىق ۋنيۆەرسيتتەردىڭ جۇمىسىنا توقتالدى.
ۆەدومستۆو باسشىسىنىڭ ايتۋىنشا، قازاقستان حالىقارالىق ۋنيۆەرسيتەتتەرمەن تىعىز بايلانىستا جۇمىس ىستەپ كەلەدى. سونىڭ ارقاسىندا ەلىمىزدە حالىقارالىق ج و و- لار سانى كوبەيگەن.
- بۇگىنگى كۇنى 34 حالىقارالىق ۋنيۆەرسيتەتتەر قازاقستانعا كەلۋگە شەشىم قابىلدادى. ونىڭ 5 ءى ەلىمىزدە ءوز كامپۋستارىن سالىپ جاتىر. Cardiff University استانا قالاسىندا ءوز ينفراقۇرىلىمىن دامىتادى. وڭتۇستىك كورەيانىڭ Woosong ۋنيۆەرسيتەتى تۇركىستان وبلىسىندا كامپۋسىن سالىپ جاتىر. سونداي-اق، 14 ۋنيۆەرسيتەت قازاقستاندىق ۋنيۆەرسيتتەرمەن سەرىكتەستىكتە جۇمىس ىستەۋدە. جەرگىلىكتى ۋنيۆەرسيتەتتەر ولاردى قابىلداۋشى رەتىندە ينفراقۇرىلىممەن قامتاماسىز ەتىپ وتىر. مىسالى، اريزونا شتاتىنىڭ ۋنيۆەرسيتەتىنىڭ فيليالى م. قوزىبايەۆ اتىنداعى سولتۇستىك قازاقستان ۋنيۆەرسيتەتتىڭ جانىنان ىسكە قوسىلدى، - دەدى مينيستر.
سونداي-اق، عىلىم جانە جوعارى ءبىلىم ءمينيسترى ەلىمىزگە حالىقارالىق ۋنيۆەرسيتەتتەردىڭ كەلۋىنىڭ ارقاسىندا قازاقستانعا ءبىلىم ىزدەپ كەلەتىن شەتەلدىك ستۋدەنتتەردىڭ قاراسى كوبەيگەنىن اتاپ ءوتتى.
- رەسەيدەن كەلگەن 1,5 مىڭ ستۋدەنت بيىل قازاقستاندا ءبىلىم الىپ جاتىر. بۇرىن ورتالىق ازيا مەملەكەتتەرىنىڭ، ونىڭ ىشىندە قازاقستاننىڭ ستۋدەنتتەرى ساپالى ءبىلىم الۋ ءۇشىن رەسەيگە باراتىن بولسا، قازىر كەرى باعىتتا تەندەنتسيا ءجۇرىپ جاتىر. بۇگىنگى كۇنى رەسەيلىك ءبىلىم الۋشىلار ءبىزدىڭ ەلىمىزگە ساپالى ءبىلىم ءۇشىن كەلەدى. قازاقستان جىلدام قارقىنمەن ءبىلىم مەن ساپالى زەرتتەۋلەردىڭ جاڭا حابىنا، جاڭا ورتالىعىنا اينالىپ كەلەدى، - دەدى ساياسات نۇربەك.
ەسكە سالايىق، بۇعان دەيىن عىلىم جانە جوعارى ءبىلىم مينيسترلىگى ج و و ۇزدىك وقىتۋشىسى اتاعىنا كونكۋرس جاريالاعانىن جازعانبىز.