بەرىك ءۋالي: قۇسبەگىلىكتەن كەم دەگەندە ەكى التىننان ءۇمىتتىمىز
استانا. KAZINFORM - جارىستىڭ اشىلۋىندا فەدەراتسيا پرەزيدەنتى بەرىك ءۋالي كوپتەگەن شەتەلدىك سپورتشىنىڭ ويىندارعا قاتىسۋى جوعارى مارتەبە ەكەنىن ءارى جاۋاپكەرشىلىك جۇكتەيتىنىن اتاپ ءوتتى.
«كوشپەندىلەر ويىندارىنا كوپتەگەن شەتەلدىك قوناقتاردىڭ كەلگەنىن كورىپ وتىرمىز. بۇل تەك سپورتقا دەگەن قىزىعۋشىلىق قانا ەمەس، سونىمەن قاتار عاسىرلار بويعى كوشپەندىلەر مادەنيەتىنە دەگەن سۇيىسپەنشىلىك، شىنايى جاناشىرلىق پەن قۇرمەتتىڭ بەلگىسى. بۇل ءبىزدىڭ ەجەلگى تۇركى سپورت تۇرلەرىن ناسيحاتتاۋ بارىسىندا دۇرىس باعىت العانىمىزدىڭ ايعاعى. ءدۇبىرلى دودادان قازاقستان قورجىنىنا كەم دەگەندە ەكى التىن تۇسەدى دەگەن ءۇمىت بار»، - دەدى قۇسبەگىلىك فەدەراتسياسىنىڭ باسشىسى.
سونداي-اق، بەرىك ءۋالي تورەشىلەردەن ءادىل تورەشىلىك دەڭگەيىن قامتاماسىز ەتۋدى سۇراعانىن، ازىرگە ەشقانداي شاعىم تۇسپەگەنىن اتاپ ءوتتى.
ايتا كەتەيىك، سايىستاردا قازاقستاننان 6 تورەشى، قىرعىزستاننان 2 جانە موڭعوليا مەن رەسەيدەن ءبىر-ءبىر تورەشىدەن قىزمەت ەتەدى.