بەرىك ءۋالي اباي وبلىسىنىڭ ءۇش جىلدىق دامۋ جوسپارىن تانىستىردى

سەمەي. KAZINFORM - سەمەيدەگى اباي تەاترىندا وبلىس اكىمى بەرىك ءۋاليدىڭ توراعالىعىمەن ءوڭىردىڭ الداعى جىلدارداعى دامۋىنا ارنالعان جيىن ءوتىپ جاتىر، دەپ حابارلايدى اباي وبلىسىنىڭ اكىمدىگىنىڭ باسپا ءسوز قىزمەتى.

ايماقتىڭ ءبىلىم، دەنساۋلىق ساقتاۋ، مادەنيەت، سپورت، الەۋمەتتىك، بيزنەس سالاسىنىڭ وكىلدەرى، دەپۋتاتتار، قۇقىق قورعاۋ ورگاندارىنىڭ جەتەكشىلەرى، جوعارى وقۋ ورىندارىنىڭ باسشىلارى قاتىسۋدا. ماڭىزدى شارا وبلىستىڭ بارلىق اۋداندارىندا يۋتۋب جەلىسى ارقىلى كورسەتىلۋدە.

ايماق باسشىسى جيىندى اشقان سوزىندە پرەزيدەنتتىڭ وبلىستى قۇرۋ تۋرالى شەشىمى شىن مانىندە تاريحي ادىلدىكتىڭ سالتانات قۇرۋى ەكەنىن اتاپ ءوتتى.

- وبلىس قۇرىلعان ساتتەن باستاپ ءوڭىرىمىزدىڭ الەۋمەتتىك-ەكونوميكالىق دامۋى مەملەكەت باسشىسىنىڭ تىكەلەي باقىلاۋىندا. وزدەرىڭىزگە بەلگىلى، بيىل ءبىز اباي قۇنانباي ۇلىنىڭ 180 جىلدىق ءىس-شاراسىن اتاپ وتەمىز. ۇكىمەت بۇل باعىتتاعى كوپتەگەن جۇمىستاردى قولعا الىپ جاتىر. ءىس-شاراعا دايىندىقتى قازىردەن باستادىق، جوعارى دەڭگەيدە وتكىزۋگە اتسالىسۋ وبلىسىمىزدىڭ ءاربىر تۇرعىنىنىڭ مىندەتى دەپ بىلەمىن، - دەدى وبلىس اكىمى.

ايماق باسشىسى وبلىس اكىمى رەتىندە قىزمەتكە كىرىسكەن ءۇش اي ۋاقىت ارالىعىندا ءوڭىردىڭ بارلىق اۋدان، قالالارىن، بۇرىن اۋدان ورتالىقتارى بولعان شار قالاسىندا، بارشاتاس، تاسكەسكەن جانە قاينار اۋىلدارىندا، جالپى سانى 68 ەلدى مەكەندە بولىپ، تۇرعىنداردىڭ تىنىس تىرشىلىگىمەن، وزەكتى ماسەلەلەرىمەن تانىستى.

- ءبىز وبلىستىڭ ترانزيتتىك الەۋەتىن جانە گەوگرافيالىق ەرەكشەلىكتەرىن ەسكەرە وتىرىپ، الداعى ءۇش جىلعا دامۋ جوسپارىن ايقىنداپ، دامۋدىڭ نەگىزگى باعىتتارىن بەلگىلەدىك. ءوڭىردىڭ وندىرىستىك، ەت، ءسۇت كلاستەرىن قۇرۋ مەن سۋارمالى ەگىنشىلىك الەۋەتىن ارتتىرۋعا، ىشكى تۋريزمدى، الەۋمەتتىك سالانى دامىتۋعا، جول جانە ينفراقۇرىلىم جۇيەلەرىن جاڭارتۋعا باسىمدىق بەرىلەدى، - دەدى وبلىس اكىمى.