بۇگىندە ودان ۇيلەرگە ارنالعان جىلۋ جانە دىبىس وقشاۋلاعىش ماتەريالدار، ونەركاسىپكە قاجەتتى تەحنيكالىق كيىز ءوندىرىلىپ، ءتىپتى اعاش وتىرعىزۋ كەزىندە دە پايدالانىلىپ جاتىر.
وسىدان ءبىراز ۋاقىت بۇرىن قازاقستانداعى قوي ءجۇنىنىڭ عا جۋىعى وڭدەلمەي، كادەگە جاراتىلاتىن. قازىر قوي ءجۇنىن ونەركاسىپتىك دەڭگەيدە وڭدەۋ اقتوبەدە قولعا الىنعان. مۇندا 100 پايىز تابيعي قوي جۇنىنەن توقىما ەمەس ماتەريالدار شىعاراتىن ورتالىق ازياداعى العاشقى ءارى جالعىز KazFelTec كاسىپورنى جۇمىس ىستەيدى.
زاۋىتقا شيكىزات نەگىزىنەن قازاقستاننىڭ باتىس جانە وڭتۇستىك وڭىرلەرىندەگى شارۋا قوجالىقتارىنان جەتكىزىلەدى. كاسىپورىن جىلىنا 3600 تونناعا دەيىن ءجۇن وڭدەپ، 2100 تونناعا دەيىن دايىن ءونىم شىعارۋعا قاۋقارلى. وندىرىستە 50 دەن استام جۇمىس ورنى اشىلعان.
قازاقستاندىق ءجۇن يتاليالىق Cormatex S. r.l. كومپانياسىنىڭ جابدىعىندا Airlay تەحنولوگياسى بويىنشا وڭدەلەدى. دايىن ءونىم NomadTherm برەندىمەن شىعارىلادى.
ءوندىرىستىڭ نەگىزگى باعىتتارىنىڭ ءبىرى - NomadTherm Panel. بۇل قابىرعا قاپتامالارى، شاتىر مەن ەدەنگە ارنالعان جىلۋ جانە دىبىس وقشاۋلاعىش پانەلدەر. سونداي-اق ولار سيپ جانە سەندۆيچ-پانەلدەردىڭ تولتىرعىشى رەتىندە قولدانىلادى.
ماتەريال 50- گرادۋستان 200 گرادۋسقا دەيىنگى تەمپەراتۋرادا ءوز قاسيەتىن ساقتايدى جانە قۇرىلىم ىشىندە ىلعال جينامايدى. سونداي-اق باياۋ تۇتاناتىن ءارى وزدىگىنەن سونەتىن ماتەريالدار ساناتىنا جاتادى.
ءوندىرىستىڭ ەكىنشى باعىتى - NomadTherm Felt تەحنيكالىق كيىزى. ول ونەركاسىپتىك تىعىزداعىشتاردا، جابدىقتاردىڭ ءدىرىلىن وقشاۋلاۋدا جانە سۇزگىلەۋدە قولدانىلادى. سونىمەن قاتار جەڭىل ونەركاسىپتە ارنايى كيىم، اياق كيىم مەن ءتۇرلى اكسەسسۋارلار جاساۋدا جانە اۋىل شارۋاشىلىعىندا پايدالانىلادى.
كيىزدىڭ ءداستۇرلى قولدانىسى دا ساقتالعان. ونى كيىز ۇيلەردى جىلى ۇستاۋ جانە ارلەۋ ءۇشىن قولدانادى.
بۇدان بولەك، كيىز قالانى كوگالداندىرۋدا دا كادەگە جاراپ وتىر. كومپانيا ەكولوگتارمەن بىرلەسىپ، اعاش وتىرعىزۋ كەزىندە ونى توپىراق بەتىن جاباتىن ماتەريال رەتىندە قولدانادى. كيىز توپىراقتاعى ىلعالدى ساقتاپ، كوشەتتەردىڭ جەرسىنۋىنە كومەكتەسەدى.
- قازاق حالقى ءۇشىن كيىز - تاريحىمىز بەن مادەنيەتىمىزدىڭ اجىراماس بولىگىنە اينالعان، جاقسى تانىس ماتەريال. ءبىزدىڭ مىندەتىمىز - زاماناۋي تەحنولوگيالاردىڭ ارقاسىندا ونىڭ قولدانىلۋ اياسى مۇلدە جاڭا باعىتتارعا جول اشقانىن كورسەتۋ. بۇگىندە كيىز قۇرىلىستان باستاپ ونەركاسىپكە، اۋىل شارۋاشىلىعى مەن قالالاردى كوگالداندىرۋعا دەيىن قولدانىلىپ كەلەدى. قازاقستاندا تابيعي ءارى ەكولوگيالىق تازا ماتەريالدارعا دەگەن قىزىعۋشىلىق الداعى ۋاقىتتا ارتا تۇسەتىنىنە سەنىمدىمىز، - دەدى «KazFelTec» ج ش س ديرەكتورى ەرلان جاڭابەرگەنوۆ.
كاسىپورىنداعى ەكولوگيالىق ءتاسىل تەك تابيعي شيكىزاتتى پايدالانۋمەن شەكتەلمەيدى. تەحنولوگيالىق ۇدەرىستە قولدانىلاتىن سۋدىڭ تازارتىلىپ، قايتادان وندىرىستىك اينالىمعا جىبەرىلەدى.
ماتەريالداردىڭ قۇرامىندا ۋلى شايىرلار مەن سينتەتيكالىق بايلانىستىرعىشتار جوق. مونتاجداۋ كەزىندە شاڭ شىعارمايدى جانە تەرىنى تىتىركەندىرمەيدى. ۇشپا ورگانيكالىق قوسىلىستار (VOC) ەميسسياسىنىڭ دەڭگەيى 10 م ك گ/كۇبمەتردەن اسپايدى. بۇل ماتەريالداردى تۇرعىن ۇيلەر مەن بالالارعا ارنالعان ءۇي-جايلاردا قولدانۋعا مۇمكىندىك بەرەدى.
كاسىپورىننىڭ كەلەسى ماقساتى - حالىقارالىق نارىققا شىعۋ. قازىر KazFelTec شۆەيتساريا مەن ەۋروپالىق وداق ەلدەرىندەگى الەۋەتتى سەرىكتەستەرمەن كەلىسسوزدەر جۇرگىزىپ، ءونىمدى قاجەتتى سەرتيفيكاتتاۋ راسىمدەرىنەن وتكىزۋگە دايىنداپ جاتىر.
بۇگىندە ءونىمنىڭ ق ر سايكەستىك دەكلاراتسياسى (ق ر ت ر 435№)، ە ا ە و دەكلاراتسياسى (ك و ت ر 017/2011) جانە ر ف سايكەستىك سەرتيفيكاتى بار. سونىمەن قاتار ءونىم مىندەتتى زەرتحانالىق سىناقتاردان وتەدى. جاڭا نارىقتارعا شىققان سايىن كومپانيا سەرتيفيكاتتار اياسىن كەڭەيتۋدى جالعاستىرادى.
وسىلايشا، كۇنى كەشەگە دەيىن ەل ىشىندە تولىققاندى كادەگە اسپاي كەلگەن قوي ءجۇنى بۇگىندە قۇرىلىس پەن ونەركاسىپتەن باستاپ اۋىل شارۋاشىلىعى مەن قالانى كوگالداندىرۋعا دەيىنگى بىرنەشە سالاعا قاجەت ءونىمنىڭ شيكىزاتىنا اينالىپ وتىر.
ايتا كەتەيىك، بۇعان دەيىن تەرى مەن ءجۇن وڭدەيتىن 8 ينۆەستيتسيالىق جوبا ىسكە اسىرىلاتىنى حابارلاندى.