بەرليندە پاترۋلدىك قىزمەت اتقارعان: قىزىلوردالىق تولەگەن ءجۇنىسوۆ 103 جاسقا تولدى

قىزىلوردا. KAZINFORM - جەڭىستەن كەيىن بەرليندە پاترۋلدىك قىزمەت اتقارعان قىزىلوردالىق قارت مايدانگەر تولەگەن ءجۇنىسوۆ بيىل 103 جاسقا تولدى.

تولەگەن ءجۇنىسوۆ 1921 -جىلى قىزىلوردا وبلىسى، تەرەڭوزەك اۋدانى، جاڭارىق اۋىلىندا دۇنيەگە كەلگەن. 1942 -جىلى قىزىل اسكەر قاتارىنا قابىلدانىپ، كىشى كومانديرلەر دايىندايتىن كۋرستا ءبىلىم الادى. ۋكراينادا №688-اتقىشتار پولكىندە ۇرىستا بولعان. ۋكراينانى جاۋدان ازات ەتۋ جولىندا ەرلىكتىڭ ەرەكشە ۇلگىسىن كورسەتتى.

بەيبىت كەزەڭدە: بەرلينگە دەيىن جەتكەن مايدانگەر جەڭىستەن كەيىن ەلگە قايتارىلماي بەرليندە قالىپ، قالا ماڭىندا پاترۋلدىك قىزمەت اتقارادى.

ول كىسى رەيحستاگقا تۋ تىگىلگەن ءساتتى ءالى كۇنگە دەيىن ۇمىتپايدى.

«مۇرجانىڭ تۇبىندەگى كەسەكتەر الىنىپ، سول جەردە تۋ جەلبىرەگەندە ەرەكشە قۋاندىق. ءبىراق سوعان جەتۋ ءۇشىن قانشاما بوزداقتىڭ قانى توگىلدى. ەندى سوعىس بولماسىن»، - دەدى قارت مايدانگەر.

1946 -جىلى ەلگە ورالعان سوڭ ءوز اۋىلىندا بەيبىت ەڭبەككە ارالاسادى. تەمىرجول سالاسىندا جول مونتەرى بولادى. توزىعى جەتكەن شپالداردى اۋىستىرۋ، توسەۋ، شەگەندەپ قاعىپ، بەكىتۋ سەكىلدى جۇمىستارىمەن اينالىسادى.

1983 -جىلى زەينەت دەمالىسىنا شىققانعا دەيىن قىزىلوردا بەلگى بەرۋ جانە بايلانىس ديستانتسياسىندا ەڭبەك ەتەدى.

جاۋىنگەرلىك ەرلىگى ءۇشىن مايدانگەر «I دارەجەلى ۇلى وتان سوعىسى» وردەنى، «گەرمانيانى جەڭگەنى ءۇشىن»، «زا بويەۆىە زاسلۋگي»، «زا وتۆاگۋ»، «ك س ر و قارۋلى كۇشتەرىنە - 60 جىل» ، «ك س ر و قارۋلى كۇشتەرىنە - 70 جىل» جانە بەيبىت كۇندەردە «ەڭبەك ارداگەرى»، «استاناعا - 10 جىل» مەدالدارىمەن ماراپاتتالعان.

بۇگىندە اقساقال - 2 قىز، 1 ۇلىنان تاراعان 8 نەمەرە، 2 شوبەرەنىڭ اتاسى.

ايتا كەتسەك، سىر وڭىرىندە جەڭىستىڭ 79 كوكتەمىن قارسى العان 4 مايدانگەر بار. ولاردىڭ ىشىندە تولەگەن ءجۇنىسوۆ بيىل 103 جاسقا تولسا، سىرداريالىق ياحيا تاسىروۆ 102، تىلەۋبەرگەن توبابەرگەنوۆ پەن قىزىلوردالىق ءابدراحمان بايتىكوۆ 100 جاسقا كەلدى.

ەسكە سالساق، بيىل قىزىلوردا وبلىسىندا قارت مايدانگەرلەرگە 2,5 ميلليون تەڭگە بەرىلدى.

اۆتور
ءادىلجان ۇمبەت