باپكەردىڭ ايتۋىنشا، جاس فۋتبولشىنىڭ الاڭعا شىقپاۋىنا «چەلسي» كلۋبىنىڭ شەشىمى سەبەپ بولعان. لوندوندىق كوماندا «بەرنليدىڭ» مەديسينالىق شتابىمەن بىرلەسىپ، ساتپايەۆتىڭ فيزيكالىق جاعدايى مەن جۇكتەمەسىن باقىلاۋدا ۇستاپ وتىر.
بۇعان دەيىن «ۋوتفوردقا» قارسى كەزدەسۋدە قوسالقى قۇرامنان الاڭعا شىققان قازاقستاندىق فۋتبولشىنىڭ كەلەسى ماتچقا قاتىسپاۋى جانكۇيەرلەر اراسىندا سۇراق تۋعىزعان ەدى.
نيككي حايەن بۇل جاعدايعا قاتىستى پىكىر ءبىلدىردى.
— جوق، بىزگە ونى الاڭعا شىعارۋعا رۇقسات بەرىلگەن جوق. بۇل — «چەلسيدىڭ» شەشىمى. ويتكەنى ونىڭ بۇعان دەيىن اۋىر جاراقاتى بولعان. ولار ءبىزدىڭ مەديسينالىق شتابپەن بىرلەسىپ، فۋتبولشىنىڭ جۇكتەمەسىن قاداعالاپ وتىر. بۇگىن ونىڭ ويناۋىنا بولمايتىنىن حابارلادى، — دەدى مامان.
سونىمەن قاتار «بەرنلي» باپكەرى مۇنداي شەكتەۋلەردىڭ ءوزىن اشۋلاندىراتىنىن جاسىرمادى. دەگەنمەن ول ەكى كلۋب اراسىنداعى كەلىسىمنىڭ تالاپتارىن ورىنداۋعا مىندەتتى ەكەنىن اتاپ ءوتتى.
— ءيا، بۇل جاعداي مەنى اشۋلاندىرادى. ءبىراق مۇنىڭ ءبارى كلۋبتار اراسىنداعى كەلىسىمنىڭ ءبىر بولىگى. ەگەر فۋتبولشى جاراقات السا، ونىڭ مەديسينالىق توبى ءبىزدىڭ ماماندارمەن بىرگە جۇمىس ىستەيدى. ءبىز مۇنداي تالاپتاردىڭ بار ەكەنىن الدىن الا بىلدىك، — دەدى حايەن.
وسىلايشا، داستان ساتپايەۆتىڭ ويىندارعا قاتىسۋى ازىرگە ونىڭ دەنساۋلىعىنا جانە «چەلسي» مەن «بەرنلي» مەديسينالىق شتابتارىنىڭ ورتاق شەشىمىنە بايلانىستى بولماق.