بۇركىتاۋى اۋماعى مەن كاتونقاراعايداعى فوتوتۇزاقتارعا سيرەك كەزدەسەتىن قار بارىسى ءتۇسىپ قالدى
استانا. KAZINFORM - التايدىڭ بۇركىتاۋى اۋماعىنداعى فوتوتۇزاققا قىزىل كىتاپقا ەنگەن، سيرەك كەزدەسەتىن اڭداردىڭ ءبىرى - قار بارىسى ءتۇسىپ قالدى.
التايدىڭ عاجايىپ تابيعاتىنا قاتىستى تاعى ءبىر قۋانىشتى جاڭالىق تارادى. بۇركىتاۋى اۋماعىنداعى فوتوتۇزاققا قىزىل كىتاپقا ەنگەن، سيرەك كەزدەسەتىن قار بارىسى ءتۇسىپ قالدى.
- بۇل ەرەكشە ءسات كاتونقاراعاي ۇلتتىق پاركىنىڭ التاي ورمانشىلىعى اۋماعىندا، بۇركىتاۋى مەكەنىندە تىركەلدى. فوتوتۇزاقتى ورناتقان - مەكەمە قىزمەتكەرلەرى ە. قاسىموۆ پەن ا. شاكەنوۆ.
تابيعاتتى قورعاۋعا جاناشىرلىقپەن قارايتىن وسىنداي مامانداردىڭ ەڭبەگىنىڭ ارقاسىندا ەلىمىزدىڭ باي بيوالۋاندىعى تاعى ءبىر مارتە دالەلدەنىپ وتىر، - دەپ جازدى ورمان شارۋاشىلىعى جانە جانۋارلار دۇنيەسى كوميتەتىنەن.
سونىمەن قاتار كاتونقاراعاي ۇلتتىق تابيعي پاركىنىڭ ارشاتى ورمانشىلىعىندا دا قار بارىسى فوتوتۇزاققا تىركەلدى. فوتوتۇزاقتى ورمانشى جومارت امانبايەۆ ورناتقان. ناتيجەسىندە قىزىل كىتاپقا ەنگەن قار بارىسى (Panthera uncia) تۇسىرىلگەن بىرەگەي كادرلار الىندى.
جابايى جانۋارلاردى باقىلاۋ جۇمىستارى جالعاسۋدا.
ايتا كەتەيىك، كەشە شارىن مەملەكەتتىك ۇلتتىق تابيعي پاركى اۋماعىندا ەلىكتەر فوتوتۇزاققا ءتۇسىپ قالدى.