بۇل بانكتىڭ ءتورتىنشى وبليگاتسيالىق باعدارلاماسى بولماق. وبليگاتسيالاردىڭ اينالىم مەرزىمى ءۇش جىلدى قۇرايدى، سىياقى جىلىنا ەكى رەت تولەنەدى.
«جىلدىق سىياقى مولشەرلەمەسى قازاقستان رەسپۋبليكاسى ۇلتتىق بانكىنىڭ كۋپوندىق كەزەڭدە ارەكەت ەتەتىن بازالىق مولشەرلەمەسىنىڭ %0,3 بەلگىلەنگەن مارجانى الىپ تاستاعانداعى ورتاشا ءمانى رەتىندە ەسەپتەلەدى»، - دەلىنگەن Bereke bank حابارلاماسىندا.
بانك ناقتىلاعانداي، ساۋدا-ساتتىقتىڭ باستالۋى تۋرالى اقپارات كەيىن قازاقستان قور بيرجاسىنىڭ (KASE) سايتىندا جاريالانادى.
بۇعان دەيىن KASE وسى جىلدىڭ 1-شىلدەسىنەن باستاپ بۇرىنعى وبليگاتسيالىق باعدارلاما بويىنشا قولدانىستا بولعان Bereke Bank وبليگاتسيالارى اينالىم مەرزىمىنىڭ اياقتالۋىنا بايلانىستى KASE رەسمي تىزىمىنەن شىعارىلعانىن حابارلاعان.
بۇل وبليگاتسيالار KASE رەسمي تىزىمىنە 2023-جىلدىڭ 1-قىركۇيەگىندە «كوممەرتسيالىق وبليگاتسيالار» ساناتىندا ەنگىزىلگەن. ولارداعى ساۋدا 2023-جىلدىڭ 13-قىركۇيەگىندە اشىلدى.
ەسكە سالا كەتسەك، كاتارلىق Lesha bank «بايتەرەك» ۇلتتىق حولدينگىنەن Bereke bank- ءتى ساتىپ الدى. كەلىسىم 2024-جىلدىڭ 31-ناۋرىزىندا جاسالعان. مامىلە سوماسى 65 ميلليارد تەڭگەنى قۇرادى.
Bereke bank- ءتى كاتارلىق Lesha bank- ءتى ساتۋ بويىنشا مامىلەنىڭ اياقتالۋى شامامەن بيىلعى شىلدە ايىنىڭ سوڭىندا كۇتىلۋدە.
«بەرەكە» بانكىن ساتۋدان تۇسكەن اقشا ۇلتتىق قورعا تۇسەدى.