برازيليالىق ءوزىن بورتقا كىرگىزبەي قويعان قىزمەتكەرگە العىس ايتتى

استانا. قازاقپارات - بۇل وقيعا ومىردە كەيدە جاعىمسىز بولىپ كورىنەتىن كەزدەيسوق وقيعالاردىڭ ارتىندا ۇلكەن جاقسىلىق جاتۋى مۇمكىن ەكەنىن ەسكە سالادى.

2024 -جىلعى 9-تامىزدا برازيليانىڭ سان-پاۋلۋ شتاتىنا قاراستى ۆينەدو قالاسىندا ۇشاق اپاتقا ۇشىراپ، 61 جولاۋشى قازا تاپقان بولاتىن. Vive La Plata باسىلىمىنىڭ جازۋىنشا، العاشىندا 62 ادام قازا تاپتى دەپ حابارلانعانىمەن، ءبىر جولاۋشى - ادريانو اسسيس - سول كۇنى ۇشاققا مىنە الماعانىنان امان قالعانى انىقتالعان.

ادريانو اسسيس ءوزىنىڭ امان قالعانىن شىن مانىندە عاجايىپ دەپ سانايتىنىن ايتقان. ول كاسكاۆەل قالاسىنان سان-پاۋلۋ ارقىلى ريو-دە-جانەيروعا ۇشۋدى جوسپارلاعان.

ادريانو تاڭعى 9:40-تا Latam اۋە كومپانياسىنىڭ رەيسىنە دايىندالىپ، اۋەجايعا كەلگەن. الايدا رەيس Voepass كومپانياسىنا اۋىستىرىلعانىن بىلمەگەن. ول تىركەۋ ورنىنا كەلگەندە، ونىڭ جابىق ەكەنىن كورەدى. سول ساتتە ول كافەدە كۇتىپ وتىرا تۇرۋدى شەشكەن، دەگەنمەن، بۇل شەشىم ونىڭ ءومىرىن قۇتقارىپ قالاتىنىن بىلمەگەن ەدى.

ءبىر ساعاتتان كەيىن قايتا ورالعان اسسيس ۇزىن-سونار كەزەكتى كورەدى. ال كەزەگى كەلگەندە، اۋە كومپانياسىنىڭ قىزمەتكەرى وعان ۇشاققا وتىرعىزۋ ۋاقىتى ءوتىپ كەتكەنىن ايتىپ، بورتقا كىرگىزبەي قويعان.

مەن ونىمەن داۋلاستىم، ءبىراق ول مەنى كىرگىزبەدى. بۇگىن سول قىزمەتكەرگە العىس ايتقىم كەلەدى، ويتكەنى ول ءوز جۇمىسىن ورىنداماعان جاعدايدا، مەن قازىر سۇحبات بەرىپ وتىرماس ەدىم، - دەدى اسسيس كوزىنە جاس الىپ.

Flightradar دەرەكتەرىنە سايكەس، ۇشاق اپاتتان ءبىر مينۋت بۇرىن 3500 مەتر بيىكتىكتە ۇشىپ بارا جاتىپ، كەنەتتەن تومەندەي باستاعان. ۆينەدو قالاسىنىڭ بىرنەشە تۇرعىنى ۇشاقتىڭ قۇلاعان ءساتىن بەينەجازباعا ءتۇسىرىپ، بۇل كادرلار الەۋمەتتىك جەلىلەردە تەز تارالدى. كۋاگەرلەر ۇشاق قۇلاماس بۇرىن قاتتى ءدۇرسىل ەستىگەندەرىن ايتتى.

بۇل وقيعا ومىردە كەيدە جاعىمسىز بولىپ كورىنەتىن كەزدەيسوق وقيعالاردىڭ ارتىندا ۇلكەن جاقسىلىق جاتۋى مۇمكىن ەكەنىن ەسكە سالادى.