برازيليادا ديماشتىڭ سۋرەتىمەن بەزەندىرىلگەن اۆتوبۋستار پايدا بولدى

استانا. KAZINFORM - قازاقستاندىق ءانشى ديماش قۇدايبەرگەننىڭ تۋعان كۇنىنە وراي ءارتىستىڭ برازيليالىق فان-كلۋبى «Dimash on the Road» اكسياسىن جالعاستىردى، دەپ جازادى Dimashnews.

جوبا اياسىندا ەكىنشى جىل قاتارىنان قالالىق اۆتوبۋستاردىڭ ءبىرى تولىعىمەن قازاقستاندىق ءانشىنىڭ سۋرەتتەرىمەن بەزەندىرىلىپ، برازيليانىڭ ۇلكەن فورتالەزا قالاسىنىڭ كوشەلەرىمەن ءجۇرىپ وتەدى.

فورتالەزا - 300 جىلدىق تاريحى بار جانە شامامەن 2,7 ميلليون حالقى بار قالا. ول ءوزىنىڭ كوركەم جاعاجايلارىمەن، جىلى كليماتىمەن، بەلسەندى مادەني ومىرىمەن جانە قوناقجاي اتموسفەراسىمەن تانىمال. قازىر بۇل قالانىڭ كوشەلەرىندە ديماشتىڭ سۋرەتى بەينەلەنگەن اۆتوبۋستار ءجۇرىپ وتەدى. اۆتوبۋستا، سونداي-اق، «الەمدەگى ەڭ ەرەكشە داۋىس!» دەگەن جازۋ جازىلعان.

ءانشىنىڭ فوتوسى مەن ۇرانىنان باسقا، اۆتوبۋستىڭ ارتقى جاعىندا ديماشتىڭ 2021 -جىلعى Digital Show-دا «Sos d’un terrien en détress» ءانى بار QR كودى بەرىلگەن.

اۆتوبۋستا، سونىمەن قاتار ديماشتىڭ 2024 -جىلعا ارنالعان كونسەرتتەرى جاريالانعان بارسەلونا، بەرلين جانە لوندون سياقتى قالالار كورسەتىلگەن.

بۇعان دەيىن ديماش قۇدايبەرگەن «تاۋ ىشىندە» اتتى جاڭا انىنە چەللەندج جاريالاعانىن جازدىق.